Read gitonga 1 Vakorinto 14 Bible Online

1 Vakorinto 14 - gitonga bible

1 Vakorinto 14

¹Dzi garadzeni khu gu vbanya khu lihaladzo, mu dogorela siningwa nya Liphuvbo nya Guage, ngudzungudzu giningwa nya gutivise mahungu.

²Oyu a gu ni giningwa nya guganele malimi nya guhambanelane kha ganeli ga vathu, a gu ganela ga Nungungulu. Kholu kha si tidwi khu muthu esi nya gusihale a ganelago khu gu tiviswa khu Liphuvbo.

³Gasi oyu a tivisago mahungu ya Nungungulu, a gu ganela ga vathu a ngu vbaha ni gu laya ni gu tangadzisa.

⁴Oyu a ganelago mambe malimi a gu dzi phasa uye wurumba waye, gasi oyu a tivisago mahungu ya Nungungulu a gu vbaha Libandla.

⁵Nyi ngu gola gukheni enu mwatshavbo mu ganele malimi. Aholu nya gu gola ngudzu gukheni mu tivise mahungu ya Nungungulu. Oyu a tivisago mahungu ya Nungungulu khongolo guvbindra oyu nya guganele malimi, a gumba khu gu manega muthu nya gutshamusele esi si ganedwago, gasi gu phasedzela Libandla.

⁶Nga pimisani, vandruye, nari pwani eni nya guta iyo gwanu nyita ganela malimi nya guhambanelane, nyi di hadza gu mi phasa kharini olu magana yangu ma si pwadziseligo gutuledwa ga Nungungulu, guti, mahungu, mwendro sihevbudzo?

⁷Khidzosaye ni dzingoma dzi wombwago. Silo si si vbanyigo, kha nga pundru mwendro hwambi; sa gumba wombwa gwadi, si pwala, a na dziti kharini muthu gukhuye ginani a wombago muwombi?

⁸Pundru a gu pwala khu madzumelo nyamba tisega, khu mani a na dzi dongiselago guya nyimbini?

⁹Khidzo nenu kharato, mwa gumba ganela khu lidimi li tidwago khu vathu, va na dzi kodza kharini gu si pima esi mu ganelago? Mu na ganela mahala, mu yingiswa khu liphuvbo.

¹⁰Malimi nya mangi ngudzu ma guromo mafuni, aholu lidimi ni lidimi li na ni tshamuselo yaye.

¹¹A guta muthu ata ganela ni eni khu lidimi nyi si litigo, eni nya gu khala nombo ga muthu yoyo, uye nuye a gu khala nombo gwangu.

¹²Khiso esi si manegago vbakari gwanu. Kha nga mu dogorelago siningwa nya Liphuvbo nya Guage, lombani mu ningwe khu gutala nya iso, gasi guvbaha Libandla.

¹³Kholu oyu a ganelago malimi a na lombe ga Nungungulu giningwa nya gukodze gu ma tshamusela.

¹⁴Kholu nya gu gira nombelo khu lidimi nyamba tidwa, hefemulo wangu khuwo basi wu lombelelago, aholu mapimo yangu kha ma mani giphaso.

¹⁵Hi na rini olu? Gu vbwetega nyi lombelela khu hefemulo ni mapimo gambe. Gu vbwetega nyi embelela rungudzo ga Nungungulu khu hefemulo ni mapimo gambe.

¹⁶Wa gu gira nombelo khu liphuvbo basi, oyu a guromo a gu yingisela a na kodza kharini gu hakha, khuye “Amen” guhegisani nya gubonge gwago, olu a ngamba si mana esi u nga ganelago.

¹⁷Ambari u gira gwadi nombelo wago nya gubonge, wu mwalo giphaso ga mumbe muthu.

¹⁸Nyi ngu mu bonga Nungungulu kholu eni nyi ngu kodza gu ganela malimi nya guhambanelane guvbindra enu.

¹⁹Ambari ulo, vbakari nya tshangano nya Libandla, nya gu gola gu ganela magana madugwanana ya hungoni gwangu ma dzi kodzago gu phasedzela vathu, guvbindra gu ganela mazana magana khu malimi nyamba tidwa khu muthu.

²⁰Vandruye, mu nga khali sanana mapimoni gwanu, aholu, khalani sanana ga esi nya guvivbe, mu khala vagulu nya vathu khu gu pima.

²¹ Umo nya Milowo nya Guage, Pfhumu wari, khuye: “Nyi na ganela ga ava vathu khu lito nya vathu nya guganele limbe lidimi, ni likana nya valombo. Ambari ulo kha va na tula dzindzeve va nyi yingisa, a ngu ganela Pfhumu Nungungulu.”

²²Khavbo avbo, gu ganela malimi nyamba tidwa giyeyedzo gya Nungungulu ga vale va si khodwigo, nasiri ga ava va khodwago. Gasi gu tivisa mahungu ya Nungungulu giyeyedzo ga ava va khodwago, nasiri ga ava va si khodwigo.

²³La gu tshangana Libandla, vathu vatshavbo va phela gu lombelela khu malimi nyamba tidwa, va gu vboha vathu nya sipumbu mwendro nyamba khodwa, kha va na ganela khavo, mwatshavbo mu siphuguphugu, gani?

²⁴Aholu, mwatshavbo mwa gu tivisa mahungu ya Nungungulu, a bela muthu nyamba khodwa, mwendro mumbe muthuyo, khu gupwa magana yanu, a na alakanya, a tugula sihoso saye.

²⁵Makungo a gu nawo monyoni gwaye ma na wonegiswa, a na khidzima a tsitsa khovbe vbavbatshi, a khozela Nungungulu na gu ganela khu likana, khuye: Khu lisine, Nungungulu womo vbakari gwanu.

²⁶Egi nyi vbwetago gu mi embela vandruye, khegi: Na mu tshanganide, moyo a na thula ndzimo, mumbe a na hevbudza, mumbe a na ninga wufakazi, mumbe a gira nombelo khu lidimi nyamba tidwa, mumbe a ninga tshamuselo. Girani satshavbo sesi khu gufela guphasana gudandra gukhodwani.

²⁷Va gu manega va nya guganela malimi nyamba tidwa, ningani wulanga a ganele moyo, mwendro vavili ambari vararu khu guhegisa, moyo ni moyo a na ganele khu gyaye gikhati. Aholu gu vbwetega na romo muthu nya gutshamusele esi va ganelago.

²⁸A gu hamugega mutshamuseli, gwadi va degule, va ganela basi khu myonyoni gwawe ni Nungungulu.

²⁹Vaprofeti vavili mwendro vararu va na tivisa mahungu ya Nungungulu, vambe va ninga mawonelo yawe khu esi si nga ganedwago.

³⁰Aholu, Nungungulu a gu embela gilo ga moyo nya ava va khadego vbavbatshi a na degula oyu a nga bani a gu ganela.

³¹Kholu enu mwatshavbo mu ngu dzi kodza gu ganela kha nga vaprofeti, aholu muthu ni muthu khu gikhati gyaye, gasi vatshavbo va mane guhevbula ni guphasega khu magana ya vatshavbo.

³²Gambe giningwa nya gutivise mahungu ya Nungungulu gya gu wonwa khu vambe vaprofeti.

³³Kholu Nungungulu kha goli pfilupfilu, a gu gola gurula. Kha nga edzi gu girwago mabandlani yatshavbo ya va nya guaga,

³⁴vanyamayi va nga ningwi wulanga va ganela mitshanganoni. Khandri gwadi vanyamayi gu ganela mu vathuni. Avo va na yingise kha nga edzi wu rumago khidzo Nayo wa Mosi.

³⁵Va guvbweta guti gambe simbe silo, va na wudzisa vama vawe gaya. Kha gu khali gwadi nyamayi gu khusa lito a ganela vbakari nya tshangano nya vakhodwa.

³⁶Gasi khenu mu nga phela khenu gu hakha mahungu ya Nungungulu, mwendro khenu mwenga mu gu nawo, gani?

³⁷Muthu a dzi pwago gukhuye a na ni giningwa nya gutivise mahungu ya Nungungulu, mwendro gimbe giningwa a na pime gwadi esi nyi mi lovedego, kholu nayo wa Pfhumu.

³⁸A gumba thela kota khu silo sesi, Nungungulu nuye kha na thela kota khu uye.

³⁹Khu kharato, vandriyangu, dzi garadzeni khu gu mana giningwa nya gutivise mahungu ya Nungungulu, gambe mu nga himbedzelini muthu gu lombelela khu malimi nya guhambane.

⁴⁰Aholu girani esi satshavbo khu githawo ni nayo.