Read gitonga 1 Vakorinto 15 Bible Online

1 Vakorinto 15 - gitonga bible

1 Vakorinto 15

¹Vandruye, nya guvbweta gu mi dundrugisa Mahungu nya Yadi nyi mi tivisidego, mu ma hakhidego, mu wuya mu ma sayisa khu gu tiya.

²Khayo aya mahungu ma na mi vbanyisago mwa gu ma sayisa gwadi nga edzi nyi mi tivisidego khidzo; mwa gu bani mwa sa khodwa mahala.

³ Gilo nya guphele nyi di mi tivisa esi eni neni nyi nga hakhago: Kristo fude khu kota nya sighoho sathu kha nga edzi gu lovidwego khidzo omu nya Milowo nya Guage.

⁴ Dzingidwe, a wuga khu litshigu nya wuraru, kha nga yi ganelago Milowo nya Guage.

⁵ A dzi wonegiside ga Pedro, a wuya a dzi wonegisa gambe ga tsawa nya vale nya likhumi na vavili.

⁶Khu hwane nya ugo, a di dzi wonegisa gambe ga gikwata nya vathu nya tengo nya guvbindre livbandre mazana (500) vakhodwa khu gumogo. Nya vangi vawe va ngu gu vbanya ni olu, vambe va fude.

⁷Khavbo avbo, a di wonega ga Jakobe ni ga vapostoli vatshavbo.

⁸ Khu guhegisa, a di wonega gambe ga eni, nyi gu khwatshi nyi gyanana nya guvelegwe ma si gu eneli matshigu yaye.

⁹ Kholu eni kheni nyi gu dugwana ga vapostoli, gambe kha nyi faneli gu ranwa mupostoli, khu kotani nyi nga tshanisa Libandla la Nungungulu.

¹⁰Aholu khu wuhigo wa Nungungulu nyi womo kha nga idzo nyi gu idzo. Gambe wuhigo a nyi ningidego, kha nyi ninga mahala. Eni nyi ngu thuma ngudzu guvbindra vatshavbo vapostoli. Ambari ulo khandreni nyi girago esi satshavbo, wuhigo wa Nungungulu wu thumago gumogo ni eni.

¹¹Kholu, eni ni avo ha gu tivisa kharati, enu mu khodwe khu gu embedwa kharato.

¹²Ethu hi ngu tivisa gukhethu Kristo wugide khu ga va fudego, khu ginani vambe va gukhavo va nya gufa kha va wugi?

¹³Ha gukhethu va nya gufa kha va wugi, gu yeyedza gupwani anuye Kristo kha wuga.

¹⁴Aholu, Kristo a gu bani a sa wuga, thumo wathu nya gutivise Mahungu ya Pfhumu khandri wa gilo, ni gukhodwa gwanu gambe kha gu phasi gilo.

¹⁵A gu bani ari kharato, ethu hi khade dzifakazi nya malipha dza Nungungulu. Hi tiviside gukhethu Nungungulu wuside Kristo khu ga va fudego, nari malipha, a gu bani nari lisine gupwani va nya gufa kha va wugi.

¹⁶Ha gukhethu kha va wugi, Kristo nuye kha wuga.

¹⁷Aholu, a gu bani a sa wuga Kristo, gukhodwa gwanu gumwalo tiyiso, gambe mu ngari wugumbini nya sighoho sanu.

¹⁸Ambari ava va fudego na va gu khodwa ga Kristo va luzide navo.

¹⁹Gitumbo hi gu nagyo ga Kristo, gya gu hegela mafuni momu basi nyamba hi tshatugisa khisikheyi nya guvbanye gogu, hi na manega ethu hiri ni libango nya guvbindre vathu vatshavbo.

²⁰Aholu, Kristo wugide, khu lisine, khuye matiwula nya guwuge ga vafudego.

²¹Kha nga olu gufa gu manidego wulanga tigoni khu kota nya muthu moyo, guwuga ga va nya gufa gu bede tigoni khu kota nya muthu moyo.

²²Khu kharato, vathu vatshavbo va modwe khu gufa khu gu hengela ni Adhamu; olu khu gu hengela ni Kristo, vathu vatshavbo va na bweledzedwa gambe guvbanya.

²³Aholu, muthu ni muthu a na hakha guvbanya khu gikhati gyaye. Matiwula khu Kristo a gu gitumbiso ga vatshavbo. Na wugide Kristo, gu na landrela vale va mu lumbago va hakha navo guvbanya.

²⁴Khavbo avbo, gu na vboha mahegiso nya silo satshavbo! Na fuviside mufumo, ni dzitshivba ni valala vatshavbo, Kristo a na ningela mufumo mandzani ga Nungungulu Babe.

²⁵ Kholu gu vbwetega Kristo a fuma kala Nungungulu a khozisa valala vatshavbo khu tshivba yaye.

²⁶Nala nya guhegise a na padwago, khu gufa.

²⁷ Nungungulu a mu ningide gufuma silo satshavbo. A gu pwani Nungungulu a Mu ningide gufuma silo satshavbo, gu yeyedza gu pwani Uye Nungungulu kha valedwi avba nya silo satshavbo, kholu khuye a ningago Mwanaye tshivba nya gufume silo satshavbo.

²⁸Gikhati Nungungulu a na vegago silo satshavbo vbavbatshi nya mufumo wa Mwamana, Mwamana nuye a na dzi vega vbavbatshi nya mufumo wa Babe, a gu uye a mu ningago gu fuma silo satshavbo.

²⁹A gu bani nari kharato, va gu vbweta ginani avo va bhapatiswago khu kotani nya va nya gufa. Ha gukhethu ava va fudego kha va wugi, va gu bhapatisedwa ginani khu kotani nya va nya gufa?

³⁰Ina ambari ethu kha hi ngu manega dzimhangoni gikhati gyatshavbo, gani?

³¹Vandruye, khu gutsaka nyi gu nago mbeli ga Pfhumu yathu Kristo Jesu khu kotani yanu, nyi ngu mi embela gukheni matshigu yatshavbo nya gu wona gufa mbeli gwangu.

³² Nari pwani litunga nya likhongolo ngudzu nyi nga li dwanago dhoropani ga Efeso nyi di dwanela silo nya vathu basi, ginani nyi nga hadza gu wuyedwa khigyo? A gu bani ari lisine gupwani ava va fudego kha va wugi, hi na gira nga esi si nga ganedwago, pwani: “Hi na hodze hi sela kholu mindru hi nafa.”

³³Mu nga sengwi! “Gidinga nya vathu nya guvivbedwe khu monyo gi ngu vivbisa mavbanyelo nya yadi.”

³⁴Digani mavbanyelo nya guvivbe, vbanyani khu ndruda kha nga edzi a dzinago khidzo Nungungulu! Kholu, vbakari gwanu vomo va si mutigo Nungungulu. Nya gu ganela esi khu gufela gu mi thela dzitshoni.

³⁵Muthu a ngu dzi kodza gu wudzisa, khuye: “Va gu wuga kharini ava va fudego? Givili muni va na wonegago khigyo?”

³⁶Wupumbu muni uwowo! Esi u yalago kha si ningi mihandro ya gumba mwalalega mbewu yakone.

³⁷Egi U yalago khandri litshina lakone nya simbo wu na bugago, wa gu yala basi nyingi yakone, gani khya givbila, gani khya mumbe simbo.

³⁸Nungungulu a gu ninga nyingi ni nyingi givili a gi wonago gukhuye gi ngu yi yela.

³⁹Sivili satshavbo kha si khali idzosaye. Givili nya muthu gi hambanide ni givili nya sirengo, ni sinyoni ni dzindzandzi.

⁴⁰Somo gambe sivili sa Ndzadzini ni esi sa tigoni. Gungangamela nya sivili sa Ndzadzini gu hambane ni ogu nya esi sa mafuni.

⁴¹Lidambo li na ni mangangamelelo yaye, ngima nuwo wu na ni yaye, dzinyeledzi nidzo dzi na ni yawe nya guhambane; kholu yimbe yi ngu hambana ni yimbe nyeledzi.

⁴²Khidzo gambe kharato gu na giregago guwugani ga vafudego. Ha gu kembela givili nya gufe, gu wuga givili nyamba fa gambe.

⁴³Gu kembedwa givili nyambana wumburi, gi wuga na gi gu ngangamela ngudzu; gu kembedwa givili nyambana tshivba, gi wuga na gi tade khu tshivba.

⁴⁴Gu kembedwa givili ginene nya muthu, guta wonega givili nya gutale khu guvbanya nya guphye nya guningwe khu Liphuvbo nya Guage. Kha nga gi guromo givili nya guvbanye nya wuthu, gyomo gambe givili nya guvbanye nya Liphuvbo nya Guage.

⁴⁵ Milowo nya Guage yari, khiyo: “Muthu nya guhegule, Adhamu, givangwa nya guvbanye,” aholu Adhamu nya mahegiso, liphuvbo li ningago guvbanya.

⁴⁶Oyu nya guhegule a di siri muthu nya liphuvbo, a diri muthu basi, khu hwane khavbo a ngata manega muthu nya liphuvbo.

⁴⁷Oyu nya guhegule a diri muthu wa mafuni. Oyu nya wuvili khwa Ndzadzini.

⁴⁸Vathu va mafuni va gu godza oyu nya guhegule; vathu nya liphuvbo va gu godza oyu nya wuvili.

⁴⁹Nga olu mafuni momu hi godzago muthu nya mafu, kharato gambe, hi na godzana ni muthu wa Ndzadzini.

⁵⁰Khu maganelelo yaya, vandriyangu, nya guvbweta gu mi embela kheni, muthu nya mafu kha dzi kodzi uye wurumba waye, gu hakha thomba nya Mufumo wa Nungungulu. Egi gi gu ni lufa kha gi yeli gu hakha thomba nya guvbanye nya gupindruge.

⁵¹Nya guvbweta gu mi tulela sihalo: Khandri ethu hatshavbo hi nafago, aholu hatshavbo hi na vbindrugedza giemo,

⁵²isoso si na girega khu gikhati gimwegyo basi, khu gukhwavbila nya maho, gikhati wu na wombago pundru nya mahegiso. Wa gu pwala pundru, ava va fudego va na wuga va vbanya nyamba fa gambe, gasi ethu, hi na vbindrugedza giemo.

⁵³Kholu gu vbwetega givili gegi nya guhine gi hakhe gumba hina, ni givili gegi nya gufe gi hakhe gumba fa.

⁵⁴ Gikhati givili nya guhine gi na digago guhina, ni givili gegi nya gufe gi na hakhago gumba fa, gu na tadzisega magana ma lovidwego nya gupwani: “Gufa gu mbembisidwe khu gupala nya mahegiso.

⁵⁵ Uwe gufa, olu gomo hayi gupala gwago? Yomo hayini tshivba yago nya gusonge?”

⁵⁶Tshivba nya gufe khu gighoho; tshivba nya gighoho khu nayo.

⁵⁷A na rungudzwe Nungungulu a hi ningidego gupala khu tshivba ya Pfhumu yathu Jesu Kristo!

⁵⁸ Khu kharato, vandruye nya sigodwa, simamani mu khala na mu tiyide mu thuma gikhati gyatshavbo khu gunengela esi Nungungulu a si vbwetago, Kholu mahoni ga Pfhumu, thumo wanu khandri wa mahala.