Read gitonga 1 Vakorinto 6 Bible Online

1 Vakorinto 6 - gitonga bible

1 Vakorinto 6

¹Muthu wanu a gu dwana ni ndriyaye nya mukhodwa, a gu tiya kharini guya thela mahungu phathani ga va nya mayigo, a diga gu lomba a lamudwa khu madhota nya Libandla?

²Ina mwa gu hangwa khu gukhenu sihathwa sa Nungungulu si fanede gu lamula litigo, gani? Na mu emisedwe gu lamula litigo, khu ginani mu padwa khu gu lamula mahungu nya guvbevbuge?

³Kha mu dzitini nya gukhenu, ambari dzingilozi dza Nungungulu hi na dzi lamula ethu, gani? Ha gu tandrega kharini gu lamula silo sa mafuni?

⁴Mwa gu bani muri ni mahungu nya guvbanye nya mafu, khu ginani mu tutumela guya ma thela ga valamuli va si gu gilo ndrani nya libandla nya vakhodwa?

⁵Nya gu mi embela esi gasi mu khale dzitshoni, kholu nyi ngu dziti gukheni vbakari gwanu vomo vagengeli va dzi kodzago gu lamula mahungu, va gu dwana va na ndruye ni ndruye.

⁶Aholu, gu manega gu muthu a tutumela gu hongola phathani ga va nya mayigo aya thela umo ketso ndriyaye; a ningela, kharati mahungu yawe ma lamudwa khu vathu nyamba khodwa.

⁷Ga gu manega mayunga vbakari gwanu sa gu yeyedza wumbihu wanu gukhodwani. Ina a di siri tshukwana gu tshaniseka nyambana nandru, gani? Ina a disiri gwadi muthu a dzumela gukalavedwa, gani?

⁸Aholu khenu mu girago esi nyamba lulama, mu belana khu gyanu, enu va na ndruye ni ndruye!

⁹Ina mwa gu hangwa khu gukhenu va nya guvivbedwa khu monyo, gima kha va na nga hodza thomba nya Mufumo wa Nungungulu, gani? Mu nga dzi pembi! Va nya horo, va nya guphasa sithombe nya vanungungulu nya malipha, ni sibhayi, ni vama va dzi girago vanyamayi, va bhayana khu gyawe mwama ni mwama kwawe,

¹⁰ni dzimbafa, ni va nya ligungo, ni dzibewudzi, ni va nya milembo, ni va nyambana milayo, gima kha va na bela Mufumoni wa Ndzadzini.

¹¹Vbakari gwanu vomo va nga bani vari ni mavbanyelo yoyo. Olu mu handzidwe, mu agiswa, mu gu girwa vathu nya gululame linani ga Pfhumu Jesu Kristo, khu tshivba nya Liphuvbo la Nungungulu wathu.

¹² Nyi ngu dzumedziswa gu gira silo satshavbo nyi sinago. Lisine; aholu khandri satshavbo a gu sadi gu si thuma; khandri satshavbo si phasago. Nyi tshulegide gu gira ni gevbini gilo, aholu gima kha nyi na dzumela gu dzi gira khumbi nyi fumedwa khu silo.

¹³Guhodza gu emede guya girumbuni, kha nga girumbu nigyo gi emedego gu hakha guhodza. Aholu, Nungungulu a na pfhungumula sa sivili: Guhodza ni girumbu. Aholu, givili gyathu kha gi yeli gu thumiswa wubhayi, kholu khya Pfhumu, Pfhumu nuye khwa givili.

¹⁴Uye Nungungulu a wusidego Pfhumu a na hi wusa nethu khu tshivba yaye.

¹⁵Ina kha mu dzitini nya gukhenu givili gyanu givbango gya Kristo, gani? Nyi na dzega sivbango sa Kristo nyi si gira sivbango nya gibhayi, gani? Kha si kodzegi ni vbadugwana!

¹⁶ Ina mwa gu hangwa khu gukhenu oyu a dzi tshanganisago ni gibhayi a gu khala mili moyo nagyo, gani? Milowo nya Guage yari, khiyo: “Va vavili va na khala nyama mweyo basi.”

¹⁷Gasi oyu a dzi tshanganisago ni Pfhumu a na khala muthu moyo ni Pfhumu khu liphuvbo.

¹⁸Thavani wubhayi! Kholu mambe mafumbu yatshavbo nya sighoho a girago muthu, kha si nyenyezisi givili gyaye. Aholu, oyu a girago wubhayi a ngu nyenyezisa givili gyaye.

¹⁹ Ina kha mu dzitini gukhenu sivili sanu nyumba nya Liphuvbo nya Guage, li vbanyago gwanu; Liphuvbo mu ningidwego khu Nungungulu, gani? Enu kha mu dzi lumbi enu vamune,

²⁰kholu a mi rengide khu tengo nya wungi. Khu kharalo, rungudzani Nungungulu milini gwanu ni hefemuloni gwanu.