Read gitonga 2 Vakorinto 11 Bible Online

2 Vakorinto 11 - gitonga bible

2 Vakorinto 11

¹Nya guvbweta mu timisela gambe vbadugwana, ambari nya gu ganela wupumbu nyi timiseleni!

²Gu khathala gu ngu nyi girisa wufu, linani ga Nungungulu. Kholu enu mu khade nga sagadzyana nya makendzi, nyi mi ningedego ga mwama moyo basi, a gu Kristo.

³ Aholu, nyi na ni hwanga nya gukheni mapimo yanu ma na ghoheka mu diga lisine, ni gukhodwa ga Kristo, kha nga olu Evha a nga sengwa khu malipha ni wugengeli nya nyoga.

⁴Kholu mu nga tshuka mu dzumela mumbe muthu a guta ganela khu Jesu, nya guhambane ni oyu nyi nga mi embelani, ambari gu hakhani liphuvbo nya guhambane ni eli mu li hakhidego, mwendro mahungu nya yadi nya guhambane ni aya mu ma dzumedego.

⁵Aholu, nya gukheni kha nyi vbindrwi khu vapostoli vovo nya vakhongolo.

⁶Ambari khu gu ganela nyi tshala hwane, khu guti, nyi womo mbeli. Ga satshavbo sesi, nyi mi yeyedzideni lisine nya iso.

⁷Nyi mi embedeni Mahungu nya Yadi ya Nungungulu, nyamba lomba gu hakhiswa. Nyi di dzi nogisa gasi mufela gu khusedzwa enu. Mwa gu alakanya gukhenu nyi di ghoha, gani?

⁸Na nyiri vbakari nya guthumele enu, nyi di hakhiswa khu mambe mabandla. Nyi di ma solola khu gufela gu phasa enu.

⁹ Gikhati nyi nga bani nyiri iyo gwanu, ambari na nyi keneledwe khu gilogyo gima kha nya garadza muthu. Vakhodwa va nga tago khu Makedhoniya, khavo va nga nyi phasa khu esi si nga nyi kenelelago. Kha nya dzina gu mi lemedzani, gima kha nyi na mi lemedza.

¹⁰Khu gukhodwa nya lisine nyi gu nago ga Kristo, kha nyi vbweti gu luza wuzundzo wowu ni wevbini wulanga tigoni ga Akaya.

¹¹Khu ginani? Nyi mwalo lihaladzo ni enu? Nungungulu a ngu dziti gwadi!

¹²Aholu esi hi girago, nyi na simamisa gu si gira. Kha hi vbweti gu ninga wulanga vale va dzi khusedzago ni gu alakanya khavo va ngu fanana ni eni.

¹³Avovo khavo vapostoli nya gukanganyise, sithumi nya malipha va dzi girago vapostoli va Kristo.

¹⁴Kha si samadzisi, kholu ambari Sathane a ngu dzi gira ngilozi ya Nungungulu.

¹⁵Khu guralo, khandri silo nya gusamale, avo khu lisine vomo thumoni wa Sathane, va dzi gira vathu va thumago guhaladza ga Nungungulu. Aholu khu guhegisa va na hakha malingano ni mithumo yawe.

¹⁶Nyi ngu engedza gambe gu ganela: Mu nga alakanyi gukhenu nyi gipumbu. Mwa gu alakanya kharalo, nyi digeni nyi dzi zundze gambe.

¹⁷Esi nyi vbwetago gu ganela khandri sa eno ga Pfhumu, nya gu ganela gasi gu dzi zundza, nga khwatshi nyi gipumbu kamwe.

¹⁸Olu nya vangi va dzi zundzago khu wuthu, eni neni nyi na gira kharalo.

¹⁹Enu mu gu vathu nya guti mwa gu yingisa gwadi sipumbu.

²⁰Mu ngu hakha gwadi ava va mi girago dzikhumbi, va mi sololago, va mi nyenyago, va mi vetago.

²¹Eni kha nya tiya longo gu gira isoso. Nya gu ganela khu dzitshoni! A gu bani a romo oyu a gu ni fanelo nya gu dzi gire matshandza, nyi ngu engedza gambe gu ganela nga gipumbu, eni neni nyi nayo.

²²Avo Vahebheru nya tumbunugo? Eni neni! Avo Lihundzu la Abrahama? Eni neni!

²³ Avo sithumi sa Kristo? Nya gu ganela nga gipumbu, nyi na ganela kheni, eni nyi womo mbeli ngudzu guvbindra avo. Nyi va vbindride mbeli ga mithumo yatshavbo; gu khothedwa mapasoni, gu kwamudwa khu dzimboma, gu vbuluga gufa gikhati nya gingi.

²⁴ Nyi sanisidwe livbandre dzinyondro khu Vajudha, nyi kwamudwa magumararu na livbandre na dzina dzimboma.

²⁵ Nyi vetidwe khu misimbo nyondro tharu, nyondro mweyo nyi vetwa khu siwindri. Nyi gimbide linene khu ngalava tanga nya guraru, nyi vbedzide litshigu rumba, wutshigu ni mihani, na nyi gu penga linene.

²⁶ Nyi di gira mapfhumba nyambana tengo, nyi saniseka ngudzu mitsongoni, ni gu saniswa khu dzimbafa, khu va na gyathu, ni va nya mayigo, madhoropani, mugiwulani, linene, ni vandruye nya malipha.

²⁷Nyi diri ni thumo nya wungi, gu ganela, nyi di pila wutshigu nya wungi, nyamba lala, ni ndzala, ni lidora, matshigu nya mangi nyamba hodza, girame, wuhagadzo.

²⁸Vbavbandze nya isoso, nyi di rwala, litshigu ni litshigu, gulemela nya sigaradzo nya Mabandla yatshavbo.

²⁹Khu hayi a guromo mudwali, eni nyi si dwali neni naye? Khu hayi a thegago muthu guvivbani, nyi si saniseki neni khuye?

³⁰Gwa gu dzumedwa gupwani muthu a na dzi zundze, eni nyi ngu dzi zundza khu esi nyi nga saniseka khiso.

³¹Nungungulu, Babe wa Pfhumu yathu Jesu Kristo, a na rungudzwe gikhati gyatshavbo, mu ngu dziti khenu kha nyi liphi.

³²Eyi Dhamasiko, gyandza gya mufumeli Areta, a di ruma gu segwa malimba yatshavbo nya libhiyo nya lidhoropa, gasi a mane gu nyi mola.

³³ Aholu, va di nyi thela gitundruni va nyi tshisa khu vbagihogotunu, gi nga bani giri libhiyoni nya lidhoropa, khayo magirelo nyi nga vbulugisa ayo mandzani gwawe.