Read gitonga 2 Vakorinto 12 Bible Online

2 Vakorinto 12 - gitonga bible

2 Vakorinto 12

¹Kha gu vbwetegi gu ganela gambe khu mahungu nya gu dzi zundze. Khu guralo, nyi na ganela khu siwoniso ni gutuledwa khu Pfhumu.

²Nya guti muthu moyo a khodwego ga Kristo, oyu hwane nya likhumi na mina myaga a nga khusedzwa a gwela Ndzadzini. Gani hongode khu givili, gani khu liphuvbo, kha nyi dziti. Nungungulu khuye a dzitigo,

³Aholu, nya gu dziti gukheni muthu yoyo a di gwedziswa a hongola ga Nungungulu. Gani hongode khu givili, gani khu liphuvbo, kha nyi dziti. Nungungulu khuye a dzitigo.

⁴Iyoyo, a dipwa silo nya gusamadzise, si si kodzigo gu ganedwa khu muthu.

⁵Nya gu gira matshandza khu muthu yoyo. Kha nyi vbweti gu gira matshandza khu gwangu, aholu, khu gu vbevbuga gwangu.

⁶Ambari nari gu gira matshandza, kha nya nga vbweta gu gira nga gipumbu, kholu nyi di vbweta gu ganela lisine. Aholu, nya guvbweta gu si diga, gasi muthu a si alakanyi mapimoni gwaye gukhuye nyi khongolo guvbindra edzi a nyi wonago khidzo, ni esi a si pwago khu eni.

⁷Gasi nyi si dzi gugumugisi khu gutuledwa gogu nya silo nya guete, nyi di thedwa muba givilini, a gu ngilozi ya Sathane yi nyi vetelela, gasi nyi si tali khu matshandza.

⁸Khu mahungu yoyo, nyi lombide guraru ga Pfhumu gukheni a nyi duse muba yoyo.

⁹Aholu, uye a di nyi hakha, khuye: “U na eneledwa khu wuhigo wangu, kholu tshivba yangu ya gu dzi yeyedza khu gu tadzisega, ga vale va gu mwalo tshivba.” Khu gu dzina gwangu nyi na seketela wudhumo wangu ngudzungudzu guvbungugani nya tshivba yangu, gasi tshivba ya Kristo yi dzi wonegisa khavbo gwangu.

¹⁰Khidzo kharato nyi nengelago khu gupwa guvbunguga nya tshivba yangu, khu gu vadwa, ni sigaradzo, ni gunyenywa, ni gusaniseka khu khota ya Kristo. Kholu gikhati nyi dzi pwago na nyi vbungugide tshivba, khavbo nyi gu ni tshivba.

¹¹Nyi ganede kharati nga gipumbu. Enu khenu mu nga nyi girisa gu kala nyi ganela esi, mu diri ni fanelo nya gu nyi vhikeleni. Ambari nyi siri gilo, kha va nyi vbindri vapostoli vovo nya vakhongolo.

¹²Wupostoli wangu nya lisine nyi yeyedzide vbakari gwanu: Nyi di dzi vegisa ni gu timisela, nyi mi yeyedzani siwoniso, siliwugiso ni sisamadziso.

¹³Khu ginani mu manega vbavbatshi nya mambe mabandla? Mwendro kholu nyi nga mba mi lemelelani! Nyi tsetseleleni gihoso gyogyo!

¹⁴Nyi dzi emisede guta nya wuraru iyo gwanu. Ambari ulo kha nyi vbweti guta mi lemedzani. Eni nya guvbweta enu basi, kha nyi vbweti esi si gu sanu. Kholu khandri sanana si vegelago vavelegi, khu vavelegi va vegelago sanana.

¹⁵Eni nyi ngu dzumela gu ningela satshavbo nyi gu naso, ambari wurumba wangu khu kota nya enu. Nya gu mi yeyedzani lihaladzo nya lingi, khavbo mu na gu nyi golago vbadugwana?

¹⁶Ambari mu dziti nya gukhenu kha nya mi lemedzani, vambe va na alakanya khavo nyi di mi riyani khu mano nya yadi, nyi mi molani khu naphwi.

¹⁷Ina nyi di nga rumela muthu ata mi sololani, gani?

¹⁸Olu nyi nga lomba Tito, ni vambe vandruye, guta iyo gwanu. Gyomo egi a nga mi hodzelani Tito, gani? Kha ha gimbila khu magimbilelo nya gufanane ni liphuvbo limwedo, ni mavbanyelo nyi nga vbanya khayo eni?

¹⁹Mwa gu dzina sanu mwa gu alakanya gukhenu nya guvbweta gu dzi vhikela vbakari gwanu. Nya gu ganela mbeli ga Nungungulu, esi nya gu gira khu mapimo ya Kristo. Ga satshavbo sesi, nya guvbweta wuwadi wanu.

²⁰Nyi na ni hwanga guta iyo gwanu, nyita mi mana na mu vbindrugedzide mavbanyelo yale nyi ma golago, enu nenu mu nyi wona na nyi vbindrugedzide mavbanyelo. Nyi na ni hwanga nya gukheni nyi nata mi mana na mu bede mayungani, lidiwo, mazondra, gunyenyana, gu dwana, gusingedzana, milembo, ni gumba pwanana.

²¹Gasi Nungungulu wangu a si nyi theli dzitshoni vbakari gwanu, nya gu vboha gambe iyoyo. Ni gulilela vale va nga girago sihoso gale, va si vbindrugedzi guvivbani gwatshavbo, ni gu dzi nyenyezisa khu wubhayi va wu giridego.