Read gitonga 2 Vakorinto 2 Bible Online

2 Vakorinto 2 - gitonga bible

2 Vakorinto 2

¹Khavbo avbo, nyi di alakanya, gumbata gambe iyo gwanu gasi nyi siti mi thelani wusiwana,

²kholu nya gu mu thelani wusiwana khu mani oyu a na gu nyi tsakisago, olu a gu enu mu nyi tsakisago?

³Nya gu mi lovelani silo sesi khu lidangalila gasi nyi siti eni wurumba wangu nyita thedwa wusiwana khu vale va yelago gu nyi tsakisa. Nyi ngu tumba enu mwatshavbo khu gu dziti gukheni gutsaka gwangu gutsaka gwanu nenu mwatshavbo.

⁴Nyi mi lovedeni na nyi gu saniseka, monyo na wu gu vbisa, na nyi gu lila marongo. Esi nyi mi lovedego mu nga saniseki khiso, nyi di girela gukheni mu wone lihaladzo nyi gu nalo ga enu.

⁵Aholu a gu bani a romo a thedego wusiwana kha thelela eni, thede ga enu mwatshavbo, nyi na kheni thede ga vambe nya enu.

⁶Gu enede ga muthu yoyo tsayiso a nga ningwago khu enu mwatshavbo.

⁷Olu gu ngu yela gu mu tsetselelani ni gu mu thavelela, gasi a si luzi khu mahungu nya gusaniseke ngudzu.

⁸Nyi ngu mi lombani mu mu girela wuhindzi mu vbanya naye khu lihaladzo.

⁹Gikhati nyi nga mi lovelani, nyi di girela gu mi linga gasi gu wona nya gukheni khu lisine mu vayingisi ga satshavbo.

¹⁰Oyu mu mu tsetselelago eni neni nyi na mu tsetselela, nya gu bani nyi tsetselede gilo nya gukari, nyi giride khu lihaladzo ga enu, khu lina la Kristo;

¹¹kholu kha hi hangwi khu wugengeli waye. Kha nyi vbweti gukheni mu kanganyiswa khu Sathane.

¹²Gikhati nyi vbohidego Trowade, guya tshumayela Ivhangeli ya Kristo. Pfhumu a nyi tulede malimba.

¹³ Ambari ulo hefemulo wangu kha wa mana gurula, khu gumba ya mana ndriyangu Tito. Khu guralo nyi di vbangana vathu vale nyi khuga nyi hongola Makedhoniya.

¹⁴A na rungudzwe Nungungulu, a endredzago mithumo yathu yi gimbila gwadi khu ga Kristo. Khu thumo wathu Nungungulu a ngu phalalegisa malangani yatshavbo mahungu nya gutivise Jesu kha nga mahema nya gunungele gwadi.

¹⁵Ethu, ga Nungungulu hi mahema nya yadi ga vale va vbanyiswago ni ga vale va mbembago.

¹⁶Ga vale va mbembago, mahema nya lufu ma vangago gufa, ga vale va vbanyiswago mahema nya womi ma vangago guvbanya. Khu wevbini muthu a yedwago khu thumo wowu?

¹⁷Khu guralo ethu kha hi giri nga vambe va nya gutala va girago wugwewo khu mahungu ya Nungungulu. Aholu, nga sithumi sa Nungungulu, ha gu tshumayela khu Kristo, myonyo yathu na yi agide mahoni gwa Nungungulu.