Read gitonga 2 Vakorinto 3 Bible Online

2 Vakorinto 3 - gitonga bible

2 Vakorinto 3

¹Ina hi na pheledza gambe gu dzi zundza ethu vamune, gani? Ina gu ngu vbwetega eni nyi fakazedwa khu malangalila nya sileletelo ga enu, nga edzi gu vbwetegago khidzo ga vambe vathu, gani? Mwendro enu gu fakazedwani ga eni, gani?

²Enu khenu lidangalila lathu li lovidwego myonyoni gwathu, li tidwago ni gu hevbudwa khu vathu vatshavbo.

³ Kholu gu wonegisidwe nya gupwani enu mu lidangalila li nga lowa khu Kristo, kha la lowa khu tita, aholu khu Liphuvbo la Nungungulu a vbanyago; khandri li di lowa vbagiwindritunu aholu li lovidwe myonyoni nya vathu.

⁴Hi na ni gutumba gogu ga Nungungulu, khu Kristo.

⁵Kha hi dzi kodzi gu ganela khethu ha gu gira esi khu mapimo yathu, ahihi; kholu mapimo yathu ma guta khu ga Nungungulu.

⁶ Uye khuye a nga nyi gira nyi khala githumi nya gidzumeledzwano nya giphya, nasiri gidzumeledzwano nya gulowe, aholu nya Liphuvbo la Nungungulu; kholu nayo nya gulowe wu ngu songa, gasi Liphuvbo la Nungungulu la gu vbanyisa.

⁷ Nayo wu lovidwego vbagiwindritunu wu vbindrugedzide wu khala gilo nya gusonge. Ambari ulo, gungangamela nya khovbe ya Mosi gudiri gukhongolo, avbo nya gu sanana sa na Israyeli si ngamba kodza ni gu khusa maho si gu khedza khovbe yaye. Gasi a diri gungangamela gu vbindrago. Olu Nayo yoyu wu nga wonega khu wudhumo nya nga owu,

⁸ahati thumo nya Liphuvbo la Nungungulu, kha wu na dhumiswa ngudzu guvbindrisa, gani?

⁹Olu Nayo nya nandru wathu wu nga dhumiswa, kharati, gu na dhumiswa ngudzungudzu Nayo nya guvbanyiswe gwathu.

¹⁰Kholu wudhumo wule wa gale wu nga ngangamela kha wu ningani ni wudhumo wa olu, kholu wu khongolo, guvbindra wule nya guhegule.

¹¹Olu ambari owu nya guvbindre wu nga dhumiswa, owu nyamba vbindra wu na dhumiswa ngudzu!

¹²Na nyiri ni gutumba gogu, nyi ngu vbanya khu gu tiya.

¹³ Gambe kha hi giri nga edzi a nga girago Mosi, a nga bani a gu fenengedza khovbe yaye khu tshalu, gasi va na Israyeli va si dzi kodzi gu wona guvbindra nya gungangamele gwaye.

¹⁴Aholu mapimo yawe ma di segegide mugidemani. Kala ni olu, va gu hevbula Milowo nya Testamenta ya gale, iyo tshalu yoyo yi nga gu va segela, kholu ya gu funungudwa basi khu ga Kristo.

¹⁵Kala na muhuno, tshalu yoyo yi nga romo myonyoni gwawe, yi va segela gikhati gyatshavbo va hevbulago Nayo wa Mosi.

¹⁶Aholu va gu vbindrugedza va khodwa ga Pfhumu, khavbo tshalu yi na gu funungudwago.

¹⁷Pfhumu Liphuvbo, avbo li guromo Liphuvbo la Pfhumu, gomo gutshulega.

¹⁸Ethu hatshavbo na hi funungude khovbe, hi khedza libona nya wudhumo wa Pfhumu hi ngu vbindrugedza khu wuzundzo ni wudhumo, hi fanana Naye, hi khedziga gikhati gyatshavbo khu tshivba nya Liphuvbo la Pfhumu.