Read gitonga 2 Vakorinto 4 Bible Online

2 Vakorinto 4 - gitonga bible

2 Vakorinto 4

¹Khu guralo, hi nga swihali thumoni momu hi nga ningwago khu wuhindzi wa Nungungulu.

²Aholu hi di nyenya mithumo yatshavbo nya gidema ni dzitshoni; kha ha thumisa wugengeli, gambe kha ha dzuwulugisela mahungu ya Nungungulu. Hi di ganela gikhati gyatshavbo silo nya lisine, khu gudwanela gutumbega ga vathu vatshavbo, mbeli ga Nungungulu.

³Aholu Ivhangeli yathu ya gu bani yi segegide, yi segegide ga vale va dzimelago, va nyamba khodwa,

⁴kholu vanungungulu nya mafu yaya va segide mavhalo yawe, gasi va si woni gu wonegela nya Ivhangeli nya gungangamele ya Kristo, a gu giemo gya Nungungulu.

⁵Kholu ethu, kha hi dzi tshumayeli wurumba wathu, aholu ha gu tivisa Jesu Kristo, a gu Pfhumu. Ethu kha hiri gilo, hi sithumi sanu, khu lihaladzo la Jesu.

⁶ Kholu Nungungulu ganede, khuye: Khu mugidemani gu na manega guwonegela, khuye gambe a nga gira guwonegela myonyoni gwathu, gasi hi tivise wudhumo wa Nungungulu wu ngangamelago khovbeni ga Jesu Kristo.

⁷Aholu ethu hi hakhidego thomba yeyi nya wuhigo hi sombo nya libumba, gasi gu wonegisa gupwani tshivba yeyi yatshavbo nya yikhongolo kha yi dugeli gwathu ya guta khu ga Nungungulu.

⁸Ethu hi ngu sokhovedzwa khu maphuvbo yatshavbo, aholu kha hi rereki, hi ngu kanganyisega, aholu kha hi bweleli hwane.

⁹Hi ngu saniswa, aholu kha hi digi muphelo, hi ngu bayiswa, aholu kha hifi.

¹⁰Gikhati gyatshavbo hi rwade gufa ga Jesu mugivilini gwathu, gasi gu vbanya ga Jesu gu wonege givilini gwathu.

¹¹Kholu na hi nga gu vbanya, gikhati gyatshavbo hi ningedwe gufani khu lihaladzo la Jesu, gasi guvbanya ga Jesu gu wonege givilini gwathu nya gufe.

¹²Khu guralo, gufa ga gu thuma ga ethu, aholu ga enu, gu thuma guvbanya.

¹³ Na hi tade khu Liphuvbo nya gukhodwe kha nga idzo yi ganelago Milowo nya Guage, khiyo: “Eni nyi khodwe, khu guralo nyi ganede.” Ethu nethu na hi tade khu Liphuvbo nya gukhodwe, hi ngu ganela kholu hi khodwe.

¹⁴Hi ngu dziti nya gukhethu Uye a nga wusa Jesu, a na hi wusa nethu gumogo ni Uye, a na hi emisa gumogo ni enu mbeli gwaye.

¹⁵Satshavbo sesi sa gu girega khu kotani gwanu, gasi wuhigo wu engedzelane ga vathu nya vangi, gasi gudandrisa wudhumo wa Nungungulu.

¹⁶Khu guralo, kha hi garali. Ambari saye gi hagalago givili gyathu, hefemulo wathu, wa guya na wu gu wusedzwa nyaluphye khu litshigu ni litshigu.

¹⁷Kholu gusaniseka gwathu nya guvbevbuge nya gikhatinyana gwa gu hi dongisela guya bela wudhumoni nya wukhongolo nyamba vbela, wudhumo wu vbindrago gusaniseka gwatshavbo.

¹⁸Ethu kha hi vegi mapimo yathu ga silo nya guwonege, aholu ga esi nyamba wonega, kholu esi nya guwonege si na vbindra, gasi esi nyamba wonega khya gupindruga.