Read gitonga 2 Vakorinto 8 Bible Online

2 Vakorinto 8 - gitonga bible

2 Vakorinto 8

¹Vandriyangu, nya gu vbweta gukheni muti wuhigo owu Nungungulu a nga girela Mabandla ya Makedhoniya.

²Ambari va nga bani vari vbakari nya silingo ni gusaniseka, va vbanya khu wusiwana nya wukhongolo. Aholu, va di yeyedza gutsaka gwawe ni wuwadi wawe, va ningela esi nya wusiwana wawe khu matsenya.

³Nyi ngu tiyisa gukheni, ava va ningede maningano ni gumanela gwawe ni guvbindra gambe gumanela gwawe. Avo vamune,

⁴ va dita hi lomba wuhindzi nya guhengele navo thumo wowu nya guphasedzele sihathwa.

⁵Va di gira silo guvbindra esi hi nga si lindrela. Va gu dzi ningela mandzani ga Nungungulu, ni gwathu nethu, nga edzi Nungungulu a nga ruma khidzo.

⁶Khu guralo, hi lombide Tito, gukhethu edzi a nga phela khidzo, a nate gambe ga enu a ta mi phasa ni gu vbedzisa thumo yoyo nya wuhindzi.

⁷Enu, ga silo satshavbo mu fumide khu gukhodwa, khu guganela, khu gupima lisine, khu gu dzi garadzani khu maphuvbo yatshavbo, ni omu nya lihaladzo hi gu nalo gwanu. Dzi yeyedzeni gambe gukhenu mu vafumi nya wuhindzi.

⁸Oyu khandri nayo nyi mi ningago. Nya gu vbweta gu wona gukheni lihaladzo lanu khya lisine gani, nyi li pimanisa khu la vambe.

⁹Mu ngu wuti wuhindzi wa Pfhumu yathu Jesu Kristo: Uye a nga bani fumide, a di dzi gira gisiwana khu kota yanu, mufela gu mana gufuma khu kota nya wusiwana waye.

¹⁰Khu guralo nyi ngu mi ningani mawonelo yangu: Thumo nya wuhindzi wu khade gwadi ga enu, kholu, mwaga wu vbedego mu giride ningelo wa moyo; khenu gambe va nya guhegula gu ninga mawonelo.

¹¹Olu mwa gu dzi kodza, girani guvbindra esi nya guhegule, khu avba a manago khavbo muthu ni muthu. Ligolo ni gu dzumela khu gu gira ni gu yeyedza esi si hungidwego.

¹²Kholu muthu a gu nigela khu ligolo, satshavbo esi a na ningelago si na hakhwa khu matsenya, na siri egi muthu a gu mwalo nagyo.

¹³Kha hi dwaneli gu mi lemedza gasi gu vbevbugisela vambe,

¹⁴nya gu dwanela gukheni gu manege guningana; ga gikhati gegi, esi si mi tshalelago sa gu phasedzela vandriyanu, gasi mindru ga litshigu, esi si na gu va tshalelago si gu phasedzela avba mu na gu keneledwago khavbo nenu. Khu magirelo yoyo gu na manega guningana.

¹⁵Kha nga gu lovidwego pwani: “Oyu a nga bani ari ni singi kha tshaledwa, ni oyu a nga bani ari ni sidugwana kha keneledwa.”

¹⁶A na bongwe Nungungulu, a ningidego ligolo monyoni ga Tito, nga eli nyi gu nalo neni khu enu.

¹⁷Kholu dzumede gu lomba gwathu, aholu khu guvbisega gwaye khu enu, Tito a di khuga khu gu dzina gwaye ata iyo gwanu, gasi guta wonana nanu.

¹⁸Hi rumede gumogo ni uye, mumbe ndriyathu a zundzwago khu mabandla yatshavbo khu gu tshumayela Ivhangeli,

¹⁹vbavbandze nya isoso a di hathwa khu mabandla, gasi hi bangaladzana ga thumo wowu hi ningidwego guta gira gwanu, wu yeyedzago wudhumo wa Pfhumu, ni gu yeyedza ligolo lathu.

²⁰Nya guvbweta nyi hunisela ni ga wevbini a na nyi solago khu hwengo yoyu nya wungi wu vbindrago khu mandzani gwathu.

²¹ Egi hi gi vbwetago khu wuwadi, hi si wu giri basi mbeli ga Pfhumu, aholu, hi wu gira gambe vbakari nya vathu.

²²Hi ngu va ruma gumogo ni mumbe ndruye, a yeyedzago gu khathala nya lisine, kha nga hi mu wonego gikhati nya gingi. Aholu, lihaladzo laye likhongolo ngudzu, ni gutumba a gu nago ni enu.

²³A gu bani ari Tito, i ndriyangu, githumi gikwathu, vbakari gwanu, gasi vambe vandruye va gu rumwa khu mabandla, vatshavbo va gu thumela wuzundzo ni wudhumo wa Kristo.

²⁴Khu guralo, yeyedzani ga mambe mabandla lihaladzo mu gu nalo khu avo, mu va sayisa gwadi. Ni gu dzi zundza gwathu khu enu, gu wonege nari gwa lisine.