Read gitonga Vagalatiya 2 Bible Online

Vagalatiya 2 - gitonga bible

Vagalatiya 2

¹ Na gu vbindride likhumi na mina myaga, nyi di bwelela gambe Jerusalema. Nyi hongode gumogo ni Bharinabha ni Tito.

²Nyi hongode iyoyo kholu Nungungulu a nga tulela giwoniso a nyi tivisa gukhuye gu vbwetega gu hongola. Na nyi vbohide, hi di bela tshangano nya gihundla ni vakhongolo vakone, nyi va tshamusela Mahungu nya Yadi nyi tivisago ga vale va si gu Vajudha. Nyi giride esi khu gufela gukheni thumo nyi giridego ni owu nyi ngu girago, wu si khali thumo nya mahala.

³Wonani gwadi: Nyi diri ni Tito a gu mugereki, aholu gima kha va mu gurumedza gu hana wugwera.

⁴Ambari va nga dugelela vambe vbakari gwathu, va nga hi pfhadza khavo vakhodwa; vathu vovo va bede tsawani gwathu khu gufela guta sola mavbanyelo nya gutshulege hi gu nawo khu ga Kristo, gasi va mane ndzila nya gu hi yise nyaluphye wugumbini.

⁵Aholu ethu kha ha dzumela ni vbadugwana gu pengiswa khu avo, khu gufela gukhethu enu mu khale na mu tiyide lisineni nya Mahungu nya Yadi.

⁶ Gambe vale va tidwago gupwani khavo vathangeli vakone, gima kha va nyi engedzela simbe sileletelo. (Avo gani khavo vamani, kha nyi vbweti ni gu siti, kholu Nungungulu kha khedzi giemo nya muthu).

⁷Va wonide gukhavo a nyi ningide thumo nya gutivise Mahungu nya Yadi ga va nya mayigo, kha nga Pedro nuye a ningidwego thumo nya gu ma tivise ga Vajudha.

⁸Kholu wule giride Pedro mupostoli wa Vajudha, a di nyi gira neni mupostoli wa va nya mayigo.

⁹Jakobe, Pedro ni Johane va tidwago kha nga vathangeli, na va wonide gukhavo khu lisine, hi ningidwe wuhigo nya thumo wowu; va di hi phara mandza eni ni Bharinabha, va gu yeyedza kharalo wuhengeli. Hi di pwanana gukhethu hi hongola hiya thuma vbakari ga va nya mayigo gasi avo vaya thuma vbakari nya Vajudha.

¹⁰Gileletelo va nga hi ningago gimwegyo basi khegi: Nya gukhavo hi si divaledwi khu sisiwana. Egi gileletelo eni nyi ngu gi landrisa khu mapimo yangu yatshavbo.

¹¹Gikhati Pedro a ngatago dhoropani ga Antiyokiya, nyi dzude nyita mu kawuka khovbe ni khovbe khu gu gira silo nya guyele gu kawukwa.

¹²Kholu na va si gu vbohi vathu nya tsawa wa Jakobe, Pedro a di hodza ni va nya mayigo. Aholu, gikhati va nga vbohago, uye a di dzi pambula a si hodzi gambe navo, khu gu thava tsawa nya vale nya guhane wugwera.

¹³Vambe vakhodwa nya Vajudha va di phela navo gu bwelelela hwane, va pfhadzedzela nga uye, kala ni Bharinabha nuye a sengwa khu gidinga a gu landra mithumo yoyo nyamba yela.

¹⁴Na nyi wone gukheni mithumo yawe yi ndreyide ndzilani nya Ivhangeli, nyi di embela Pedro vbakari nya vathu vatshavbo, kheni: “Uwe u gu Mujudha wa gu vbanya kha nga moyo a si gu Mujudha. Khu ginani u vbweta gu gurumedza ava va si gu Vajudha gu landrisa milayo nya tumbunugo wa Vajudha?”

¹⁵Ethu hi Vajudha nya mavelego, kha hiri sighohi kha nga va nya mayigo.

¹⁶ Aholu hi ngu dziti gukhethu muthu kha sayedwi gululama khu kota nya mithumo ya Nayo, aholu khu gukhodwa linani ga Kristo Jesu. Ethu ha gu khodwa ga Kristo Jesu hi fela gu lamudwa khu kota nya gukhodwe nasiri khu kota nya gulandrise guruma nya Nayo. Kholu muthu kha na sayedwa gululama khu kota nya gulandrise esi si rumwago khu Nayo.

¹⁷Olu ethu hi zamago gu khala vathu nya gululame khu gutshangana gwathu ni Kristo, hi ngarigu sighohi, gu yeyedza gupwani Uye Kristo khuye a hi girago sighohi, gani? Khandridzo, ni vbadugwana.

¹⁸Eni nya gu vbahedza nyaluphye esi nyi nga phela khu gu khungumula, gu yeyedza gupwani eni nyi mupfhungumuli.

¹⁹Eni nyi fude ga esi si lumbago Nayo. Nyi fude khu kota nya Nayo khu gufela gu vbanyela Nungungulu. Nyi khokhothedwe ni Kristo vbagihambanotunu.

²⁰Khu kharato, olu khandri eni gambe nyi vbanyago, khu Kristo a vbanyago avbo gwangu. Olu, khu guvbanya nyi gu nago milini gwangu, nya gu vbanya khu gukhodwa ga Mwamana wa Nungungulu a nyi haladzidego kala gu ningela guvbanya gwaye khu kota yangu.

²¹ Kha nyi vbweti gu nyenya wuhigo wa Nungungulu. Kholu ha gukhethu ha gu mana gulamudwa khu gu landrisa Nayo, gu yeyedza gu pwani gufa gwa Kristo kha gu phasi gilo.