Read gitonga Vagalatiya 3 Bible Online

Vagalatiya 3 - gitonga bible

Vagalatiya 3

¹Ama enu Vagalatiya, sipumbunu! Khu mani a mi sengidego? Eni nyi mi yeyedzide gwadi Jesu Kristo a khokhothedwego vbagihambanotunu.

²Nya guvbweta basi mu nyi hakhe gilo gimwegyo: Enu mu hakhideni Liphuvbo nya Guage khu kota mu nga landrisa Nayo, mwendro khu kota mu nga hakha gukhodwa, gani?

³Ina kamwe mu sipumbu ngudzu kharati, gani? Mu phedeni khu tshivba nya Liphuvbo la Nungungulu, olu mwa guvbweta guhegisa khu tshivba nya wuthu, gani?

⁴Ina kha si mi phasi gilo sisaniso satshavbo mu si manago, gani? Eni nyi ngu tumba gukheni mu manide giphaso.

⁵Ina wule a mi ningago Liphuvbo nya Guage, ni gu gira siliwugiso vbakari gwanu, a gu gira esi khu kota nya gulandriseni guruma nya Nayo, mwendro kholu mu hakhidego gukhodwa, gani?

⁶ Khidzo kharati Abrahama, “uye a di khodwa ga Nungungulu, a gu sayedwa tengoni nya va nya gululama khu kota nya gukhodwe gwaye.”

⁷Khavbo avbo, dzitini gukhenu, vale va vbanyago khu gukhodwa, khavo va gu sanana sa Abrahama.

⁸ Milowo nya Guage yi tugude gale gukhiyo Nungungulu a na ninga gululama vale va si gu Vajudha, khu kota nya gukhodwe. Gu di tiviswa ga Abrahama Mahungu Yadi yaya nya gupwani: “Ma na kategiswa khavbo gwago mayigo yatshavbo ya mafuni.”

⁹Khu kharato, vatshavbo va khodwago, va na kategiswa nga uye.

¹⁰ Vatshavbo vathu va tumbago mithumo ya Nayo va ngu manwa khu givalo nya Nayo, kholu, Milowo nya Guage yari, khiyo: “A na vadwe oyu si landrisigo satshavbo esi si lovidwego libhukuni nya Nayo.”

¹¹ Gu wonegide gwadi gupwani mwalo muthu a manegago na lulamide mbeli ga Nungungulu khu kota nya Nayo, kholu gu lovidwe omu nya Milowo nya Guage pwani: “Oyu a lulamidego, a na vbanya khu gukhodwa.”

¹² Aholu Nayo kha wu digi gukhodwa, aholu, gu lovidwe omu nya Milowo nya Guage pwani: “Oyu a na vegisago sileletelo nya Nayo a na vbanya khiso.”

¹³ Kristo a hi vbulugiside ga givalo nya Nayo khu gu dzi ningela a vadwa wulangani gwathu. Kholu Milowo nya Guage yari, khiyo: “Vadwe muthu watshavbo a vbayegwago vbagihambanotunu.”

¹⁴Esi si giregide gasi gikategiso, gi tumbisidwego Abrahama, gi vbohe, khu Kristo, ga vale va si gu Vajudha ni gu ethu hatshavbo, khu gukhodwa, hi hakhe Liphuvbo nya gitumbiso.

¹⁵Vandriyangu, nyi na ganela khu maganelelo nya wuthu: Muthu a gu hunga gidzumeledzwano a gi tiyisa, mwalo mumbe muthu a fanedego gu gi tshula, mwendro gu engedzela gimbe gilo.

¹⁶ Wonani, gitumbiso gi giridwe ga Abrahama ni ga livelego laye. Milowo nya Guage kha yi ganeli khiyo ni ga sanana saye, gukhwatshi vathu nya vangi va thudwago. Aholu yari, khiyo: “Ni ga livelego lago, gu thudwa muthu moyo basi a gu uye Kristo.”

¹⁷ Esi eni nyi vbwetago gu ganela khu esi: Nungungulu hungide gidzumeledzwano a wuya a tiyisa gu gi sayisa. Nayo wu vegidwego na gu vbindride mazana mana ni magumararu (430) myaga, kha wu dzi kodzi gu tshula gidzumeledzwano gi hungidwego khu gale, mwendro gu fuvisa gitumbiso.

¹⁸ Kholu ha gukhethu ha gu ningwa thomba khu Nayo, gu yeyedza gu pwani kha hi nga gu ningwa gambe khu gitumbiso. Aholu, Nungungulu ningede thomba mahala ga Abrahama khu gitumbiso.

¹⁹ Gasi khu ginani wu vegidwego Nayo? Nayo wu vegidwe khu kota nyamba landrisa mithumo: Gu di vbwetega wu thuma kala gi gu vboha gyanana nya gitumbiso. Nayo wu ningedwe khu dzingilozi mandzani ga mwama moyo a nga vegwa kha nga mutshanganisi.

²⁰Gambe mutshanganisi khandri wa muthu moyo basi, aholu, Nungungulu moyo basi.

²¹Ina gu yeyedza gupwani Nayo wa gu dwana ni situmbiso, gani? Khandridzo ni vbadugwana! Nari gukhwatshi wu vegidwe Nayo wu dzi kodzago guvbanyisa vathu, vathu va di hadza gu sayedwa gululama khu kota nya Nayo.

²²Aholu, Milowo nya Guage yari khiyo vathu vatshavbo va gu fumedwa khu tshivba nya gighoho, gasi vathu vatshavbo, khu gukhodwa ga Kristo, va hakhe thomba yi tumbisidwego ga ava va khodwago.

²³Aholu na gi si gu vbohi gikhati nya gukhodwe, hi di hungwa khu Nayo kha nga sibotshwa, na hi gu virela gutuledwa gukhodwa.

²⁴Khu kharato, hi ningidwe Nayo, muyeyedzi nya ndzila, nya gu hi yise ga Kristo, hifela gu sayedwa gululama.

²⁵Olu, gi vbohide gikhati nya gukhodwe, kha hi ngari gambe vbavbatshi nya Nayo.

²⁶Khu gukhodwa enu mwatshavbo mu khade sanana sa Nungungulu, khu Kristo Jesu.

²⁷Kholu enu mwatshavbo mu bhapatisidwego, mu tshanganisidwe ni Kristo, mu ambade Kristo.

²⁸Khavbo avbo, olu gumwalo gambe guhambana Vajudha ni va nya mayigo, dzikhumbi ni va nya gutshulega; vama ni vanyamayi. Enu mwatshavbo mu moyo basi khu gu hengela gumogo ni Kristo.

²⁹ Na mu gu lumba Kristo, mu sanana sa Abrahama, mu na hakhani thomba yi tumbisidwego.