Read gitonga Vagalatiya 4 Bible Online

Vagalatiya 4 - gitonga bible

Vagalatiya 4

¹Nyari, kheni: Gyanana gi na gu tshalago ni thomba ya babe waye, gi si gu dandri, kha gi hambani ni githumi, ambari a gu igyo mune nya thomba yatshavbo.

²Na gi ngari gidugwana, vomo vathu va vegwago gasi va gi wundza, khavo gambe va pharago silo saye satshavbo kala gi gu tshanganisa tanga yi vegisidwego khu babe waye.

³Ethu nethu kharato, na hi ngari sanana gukhodwani, hi di gu fumedwa khu milayo nya litigo.

⁴Aholu, gutadzisegani nya matshigu, Nungungulu a di hi rumela Mwamana Waye a nga velegwa khu nyamayi, a velegedwa vbavbatshi nya Nayo nya Vajudha;

⁵afela gu tshula ava va nga bani va gu vbanya vbavbatshi nya Nayo, gasi hi mana gu khala sanana sa Nungungulu.

⁶Khu gufela gu yeyedza gukhuye enu nenu mu sanana Saye, Nungungulu rumede Liphuvbo la Mwamana waye myonyoni gwathu, khilo li ranago ndrani gwathu, khilo: “Abba: Gutshamuselago gupwani Baba!”

⁷ Khavbo avbo, olu khuri githumi gambe, u gyanana. Nuri gyanana gyaye, Nungungulu a na gu ninga thomba a yi vegisedego gu ninga sanana saye.

⁸Gale, na mu si gu muti Nungungulu, mu diri dzikhumbi nya gukhozele vanungungulu nya liphanga.

⁹Gasi olu mu mutigo Nungungulu, ni olu muhuno mu tidwago khu Nungungulu, khu ginani mu bwelelela hwane muya dzi gira gambe dzikhumbi nya silo si gu mwalo giphaso?

¹⁰Mu nga gu kho sanu mu sayisa matshigu ni migima, dzinango ni myaga nya nayo wa gale.

¹¹Mu ngu nyi thela hwanga: Gukhwatshi thumo watshavbo nyi wu thumidego vbakari gwanu wu mwalo giphaso.

¹²Vandriyangu, nyi ngu mi lombani mu khale nga eni, kha nga eni neni nyi dzi giridego idzosaye ni enu. Enu kha mwa nyi ghohela gilo.

¹³Enu mu ngu alakanya gukhenu gikhati nya guphele nyi ngata mi tivisa Ivhangeli nyi di si vbanyi gwadi.

¹⁴Nyi diri gilemedzo nya gikhongolo gwanu khu kotani nya madwali yangu. Ambari ulo enu gima kha mwa nyi kanyisa mwendro gu nyi nyenya. Aholu mu di nyi hakha kha nga ngilozi ya Nungungulu, ni gukhwatshi khu Jesu Kristo wurumba waye.

¹⁵Olu gomo hayini gunengela nya gukhongolo mu nga bani muri nago guhegulani? Nyi ngu tumba gukheni gikhati gile nari gupwani si di kodzega, ambari ni maho yanu mu di hadza gu ma dusa mu nyi ninga.

¹⁶Ina olu nyi khade nala gwanu khu kota nyi nga mi embelani lisine, gani?

¹⁷Vathu vovo, olu va gu yeyedza khovbe nya gu mi khathalele, aholu gikungo gyawe khandri gyadi. Kholu va gu dwanela basi gu mi hambanisa ni eni, mufela gu namarela ga avo.

¹⁸Gwadi gu mi wona na mu gu khathalela silo nya sadi gikhati gyatshavbo, nasiri basi gikhati mu nyi wonago na nyiri vbakari gwanu.

¹⁹Vanavangu, nyi ngu simama gupwa wuvi kha nga nyamayi a lumwago khu enu, kala litshigu Kristo a na gu vbelelago guwumbwa myonyoni gwanu;

²⁰nyi di gu gola olu, na nyiri vbakari gwanu, nyi gu ganela nanu khu mambe maganelelo, kholu nyi ngu kanakana ngudzu khu kotani gwanu.

²¹Nyi embeleni enu mu golago gu khala vbavbatshi nya Nayo: Ina kha mupwi esi wu ganelago Nayo, gani?

²² Gu lovidwe gupwani Abrahama a diri ni sanana sivili, gimwegyo a nga velega ni nyamayi nya khumbi, ni gimbe a nga velega ni nyamayi waye nya gutshulege.

²³Aholu Gyanana gya nyamayi nya khumbi gi velegidwe khu tshivba nya tumbunugo nya wuthu; gasi egi gya nyamayi nya gutshulege gi velegidwe khu tshivba nya gitumbiso.

²⁴Mahungu yaya gipimaniso kholu vanyamayi va vavili giyeyedzo nya sidzumeledzwano sa sivili: Gidzumeledzwano gya Sinayi gi velegago sanana wugumbini, khu Agari.

²⁵Wonani, Agari yoyu khu gigomo gya Sinayi gi guromo tigoni ga Arabhiya, a gu giwonelo gya Jerusalema ga muhuno a gu khumbi gumogo ni vathu vaye.

²⁶Gasi Jerusalema ga Ndzadzini gu tshulegide, khuye mayi wathu.

²⁷ Khu lisine gu lovidwe gupwani: “Nengela uwe nyamayi nya gyumba, u si velegigo, womba mikulungwane nya gunengele, uwe u nga mbapwa mavbiselo nya guvelege. Kholu sanana sa nyamayi nya guhudwe singi ngudzu, guvbindra sa oyu a gu ni mwama waye.”

²⁸Gasi enu, vandruye, mu idzosaye ni Isaki, mu sanana nya gitumbiso.

²⁹ Ga matshigu yale, gyanana nya guvelegwe khu tumbunugo nya wuthu gi di sanisa egi nya guvelegwe khu tshivba nya Liphuvbo la Nungungulu; kala ni muhuno gambe khiso si dugelelago.

³⁰ Gasi Milowo nya Guage yari khiyo ginani? Yari, khiyo: Tutumisa nyamayi nya khumbi ni gyanana gyaye, kholu gyanana nya khumbi kha gi na hodza thomba gumogo ni gyanana gya mwangadzi nya lisine.

³¹Khavbo avbo, vandruye, ethu kha hiri sanana sa nyamayi nya khumbi, aholu sa mwangadzi nya lisine.