Read gitonga Vagalatiya 6 Bible Online

Vagalatiya 6 - gitonga bible

Vagalatiya 6

¹Vandriyangu, mwa gu wonani gukhenu moyo wanu ghohide, enu mu vbanyago khu Liphuvbo la Nungungulu mu kawukeni khu gwadi, mu gu mu khongotela kala a wuya ndzilani nya lisine. Mu dzi wonela gasi mu si lingwi nenu.

²Phasedzanani khu gyanu, mu na tadzisa kharato nayo wa Kristo.

³Kholu muthu a gu dzi alakanya gukhuye gilo, nasiri gilo, a ngu dzi pfhadza abune.

⁴Muthu ni muthu a na phele khu gu wona mithumo yaye. Ya gu manega yiri yadi a na ni fanelo nya gu dzi zundze khu mithumo yaye nya yadi, aholu a nga dzi pimanisi khu mithumo ya vakwawe,

⁵kholu, muthu ni muthu guvbweta a rwale abune rwalo waye.

⁶Oyu a hevbulago guti Ivhangeli ya Kristo, a na kabane siningwa saye nya sadi ni oyu a hevbudzwago khuye.

⁷Mu nga dzi pfhadzini sanu; kholu Nungungulu khandri wa gu hagana khuye. Muthu ni muthu a na vbwera esi a nga yalago.

⁸Kholu oyu a yalago gudogorela nya tumbunugo nya wuthu, khu nayo nya tumbunugo a na vbwera guhina. Gasi oyu a yalago mithumo ya Liphuvbo la Nungungulu, a na vbwera guvbanya nya gupindruge.

⁹Hi nga garali khu gu gira esi nya sadi. Kholu, ha gumba rereka, hi na vbwera khu gikhati gyakone.

¹⁰Khu kharato, olu hi ngarigu ni gikhati, hongoleni hi girela esi nya sadi vathu vatshavbo, ngudzungudzu vandriyathu gukhodwani.

¹¹Wonani gugula nya dziletira nyi mi lovelago khu gyandza gyangu.

¹²Ava va vbwetago gu dzi khusedza khu tumbunugo nya wuthu, khavo va mi gurumedzago gu hana wugwera. Va gu gira isoso khu gu thava gu saniswa khu kotani nya gihambano gya Kristo.

¹³Kholu ambari ava va nya gu hana wugwera, kha va wu landri nayo. Aholu, va guvbweta khavo mu hane wugwera vafela basi gu dzi gugumugisa khu gu vega gifungo milini gwanu.

¹⁴Gasi eni, kha nyi vbweti gu dzi zundza khu gimbe gilo; wangu wuzundzo nya gu wu mana basi vbagihambanotunu gya Pfhumu yathu Jesu Kristo. Khu kotani nya gihambano, litigo li fude ga eni, kha nga aneni nyi fudego ga litigo.

¹⁵Kholu gu hana ni gumba hana wugwera, kha si phasi gilo; aholu, egi gi phasago basi khu gu vbindrugedza mavbanyelo, hi khala vathu vaphya.

¹⁶Gurula ni wuhindzi gu na khale ga enu mwatshavbo mu landrisago mavbanyelo yaya, gumogo ni libandla latshavbo la Nungungulu.

¹⁷Gukhugela olu, kha nyi vbweti gu garadzwa khu muthu, kholu, givilini gwangu nyi na ni sivanga si yeyedzago gupwani nyi githumi gya Jesu.

¹⁸Vandriyangu, wuhigo wa Pfhumu Yathu Jesu Kristo wu na khale ga enu mwatshavbo. Amen.