Read gitonga Vaefeso 2 Bible Online

Vaefeso 2 - gitonga bible

Vaefeso 2

¹Gale mu di fude hefemuloni khu kotani nya sihoso ni sighoho sanu. Uye a mi ningide guvbanya.

²Gikhati mu nga bani mu fumedwa khu mavbanyelo nya litigo leli, mu di landrisa milayo ya muthangeli nya dzitshivba nya guvivbe dzi si wonegigo, liphuvbo lolo li fumago olu ga vathu va wugelago Nungungulu.

³Ethu hatshavbo hi diri nethu kha nga avo, hi di gu vbanya khu nayo nya tumbunugo ni gu landrisa gunavela nya givili ni monyo. Khu tumbunugo nya makhalelo yathu, hi di gu fanela guya thethiswa khu Nungungulu gumogo ni vambe vathu.

⁴Aholu, Nungungulu tade khu wuwadi nya wukhongolo, khu lihaladzo laye nya likhongolo a hi godego khilo.

⁵Ethu hi nga bani hi fude khu kotani nya sighoho sathu, a hi wuside khu ga Kristo. Enu mu vbanyisidwe khu wuhigo.

⁶Nungungulu, na hi wuside gumogo naye, a hi ninga gambe wulanga nya guya fume naye Ndzadzini khu ga kristo Jesu.

⁷Gasi khu gufela gu yeyedza talo nya wuhigo waye ga mimelana yatshavbo yi nga gutago, khu wuhindzi a hi giredego khu Kristo Jesu.

⁸Kholu mu vbanyisidwe khu wuhindzi khu kotani nya gukhodwe gwanu. Guvbanyiswa khandri mwa gu gu mana khu tshivba yanu, kholu giningwa gya Nungungulu.

⁹Khandri handro nya mithumo yanu, mu yelago gu dzi gugumugisa khiyo.

¹⁰ Kholu khuye a nga hi wumbago; a hi vangide, a hi tshanganisa ni Kristo Jesu gasi hi mane guvbanya nya gutale khu mithumo ya yadi, mithumo Nungungulu a yi dongisedego khu gale gukhuye hi vbanya khiyo ethu.

¹¹Enu mu si gu Vajudha nya mavelego; enu mu ranwago makhuna khu vale va dzi ranago va nya wugwera, va dzi zundza khu gifungo va vegidwego milini gwawe khu mandza nya vathu, dundrugani edzi mu nga bani mu vbanya khidzo gale.

¹²Mu di gu vbanya hwindzo ni Kristo; mu diri valombo; mu diri mwalo wulanga ndrani nya libandla nya sihathwa sa Nungungulu; mu diri vbavbandze nya gidzumeledzwano gi hungidwego khu gisambanyo a nga gira Nungungulu ga vathu vaye; mu di gu vbanya tigoni nyambana gutumba, nyambana Nungungulu.

¹³Gasi olu, enu gale mu nga bani muri hwindzo ni Kristo, mu hidzimisidwe vbafuvbi khu mhamba nya Novba wa Kristo.

¹⁴Kholu uye Kristo, wurumba waye, khuye gurula gwathu. Khuye a tshanganisidego mahundzu ya mavili: A ma gira lihundzu limwedo basi, a gu fuvisa vbingano nya livengo wu nga bani wu gu hi hambanisa.

¹⁵Fuviside khu givili Gyaye givangelo nya livengo, a gu Nayo wa Mosi ni sileletelo nya mikhuwo yaye, afela gutshanganisa avbo gwaye mahundzu ya mavili, a gira libandla limwedo basi, libandla nya vathu vaphya; a gu vbaha kharati gurula.

¹⁶Kristo tshanganiside mahundzu ya mavili ni Nungungulu khu tshivba nya gihambano gyaye; a di ma pata ma khala givili gimwegyo basi, a gu songa kharati wulala khu gihambano gyaye.

¹⁷ Guta gwaye gu hi resede mahungu yadi nya gutsakise, nya gurule; gurula ga enu mu nga bani muri hwindzo, ni ga avo va nga bani na vari vbafuvbi.

¹⁸Khu ga Kristo, ethu hatshavbo hi tshanganisidwe khu Liphuvbo la limwedo, hi gu tuledwa kharati ndzila nya guvbohe ga Babe.

¹⁹Olu kha mu ngari valombo ni vapfhumba gambe, mu melego moyo ni va nya Guaga, mu sanana nya ngamu ya Nungungulu.

²⁰Enu mu siwindri nya nyumba yi vbahidwego vbatshani nya giseketelo nya vapostoli ni vaprofeti. Kristo wurumba waye khuye giwindri nya hungo nya gikoli gi hungago nyumba yatshavbo.

²¹Khuye Kristo a tshanganisago nyumba yatshavbo a yi tiyisa ni gu yi dandrisa gasi yi khala nyumba nya guage ya Pfhumu.

²² Khu tshivba yaye mu ngu tshanganiswa nenu ga nyumba yeyi yi vbahwago kala mu gu khala nyumba a vbanyago umo Nungungulu khu Liphuvbo nya Guage.