Read gitonga Vaefeso 3 Bible Online

Vaefeso 3 - gitonga bible

Vaefeso 3

¹Khu kharato, eni Pawulo, gibotshwa gya Kristo khu kotani yanu enu mu si gu Vajudha, nyi ngu lombelela ga Nungungulu.

²Nyi ngu tumba khu lisine gukheni mu pwide na gu ganedwa khu mahungu nya thumo, Nungungulu a dzinidego gu nyi ninga khu wuhindzi waye, gukhuye nyi thuma vbakari gwanu.

³A dzinide gu nyi tulela guti sihalo nya gikungo gyaye. Nyi ngari gu mi lovela khu magana madugwana nyi ganela khu mahungu yaya.

⁴Mwa gu ma hevbula mu nati mawonelo yangu khu mahungu nya sihalo wa Kristo.

⁵Ga mimelana yi vbindridego mwalo ni moyo a tuledwego guti sihalo yoyu, aholu, ga matshigu ya muhuno, Nungungulu, khu Liphuvbo laye nya Guage, a wu tiviside ga vapostoli vaye nya guage ni ga vaprofeti.

⁶Sihalo nyi wu thulago khowu: Khu tshivba nya Mahungu nya Yadi, vale va si gu Vajudha va emisedwe navo guya hengela gumogo ni Vajudha gu hodza thomba Nungungulu a yi vegisedego vathu, kholu avo navo sivbango nya givili gya gimwegyo, gambe va na ni wulanga avba nya gisambanyo gya Nungungulu khu ga Jesu Kristo.

⁷Eni nyi khade muthumeli nya Mahungu nya Yadi nya guvbanyise, khu wuhigo wa Nungungulu a nyi ningidego khu wuhindzi ni tshivba yaye.

⁸Eni, mahegisela nya sihathwa satshavbo sa Nungungulu, nyi ningidwe wuhigo nya gutivise ga ava va si gu Vajudha gutala nya wufumu wa Kristo;

⁹ni gu tivisa ga vathu vatshavbo magimbilelo nya gikungo nya sihalo wu nga bani wu sihidwe khu gale ni gale guetani gwa Nungungulu, muvangi nya silo satshavbo.

¹⁰Gasi olu, vafumeli vatshavbo va mafuni ni vafumeli nya dzitshivba dza Ndzadzini, gu vbwetega va tiviswe gueta gwatshavbo nya guti gwa Nungungulu khu libandla la Kristo.

¹¹Owu khu sihalo wu dongisedwego khu Nungungulu gukhugela guhegulani, wu wonegisidwego olu khu ga Kristo Jesu, Pfhumu yathu.

¹²Khu gukhodwa ni gu hengela ni Kristo, ethu hi ngu mana gutshulega hi kodza gu hidzimela ga Nungungulu na hi tade khu gutumba.

¹³Khavbo avbo, nyi ngu mi khongotela gukheni mu nga garadzegi khu kotani nya sisaniso nyi si wonago khu kotani yanu; si na khale wuzundzo gwanu.

¹⁴Khigyo gi nyi girago nyi khidzima mbeli ga Nungungulu Babe,

¹⁵a gu gibuga nya guvbanye gwatshavbo ga Ndzadzini ni ga mafuni,

¹⁶nyi mu lomba gukheni, khu gutala nya wufumu waye, a mi tiyise myonyoni gwanu khu tshivba nya Liphuvbo nya Guage.

¹⁷Nyi ngu lomba gambe ga Nungungulu gukheni Kristo a na vbanye myonyoni gwanu khu gukhodwa, mu tiya gwadi, mu tsitsa mikhamba nya gutiye lihaladzoni.

¹⁸Gasi enu nenu, gumogo ni sihathwa satshavbo nya libandla la Nungungulu, mu kodze gupima wukhongolo ni gulapha ni gueta nya lihaladzo la Kristo,

¹⁹lihaladzo leli la Kristo, ambari ulo a gu mwalo muthu a dzi kodzago gu liti khu guvbelela, gasi enu mu mane gutala khu wufumu watshavbo wa Nungungulu.

²⁰Ga Uye a gu na ni tshivba nya gugire guvbindra satshavbo esi hi mu lombago, ambari ni esi hi alakanyago, khu tshivba Yaye yi thumago ndrani gwathu.

²¹A na dhumiswe ndrani nya libandla, linani ga Kristo Jesu, khu mimela yatshavbo kala gupindruga! Amen.