Read gitonga Vaefeso 4 Bible Online

Vaefeso 4 - gitonga bible

Vaefeso 4

¹Eni nyi gu gibotshwa nya guthumele Pfhumu, nyi ngu mi lomba gukheni gimbilani khu ndzila yi yelanago ni mavbanyelo mu ranedwego ayo khu Nungungulu.

²Vbanyani gikhati gyatshavbo khu gu dzi sodzisa ni gurula, ni gutimisela. Mu yeyedzana, kharato, lihaladzo vbakari gwanu.

³Dzi garadzeni khu gu sayisa wuhengeli mu ningwago khu Liphuvbo nya Guage, mu vbanye khu gurula vbakari gwanu.

⁴Gyomo givili gimwegyo basi, ni Liphuvbo limwedo basi, kha nga gambe a gu gimwegyo basi gitumbo mu ranedwego igyo khu Nungungulu.

⁵Yomo Pfhumu mweyo basi, ni gukhodwa gumogo basi, ni gubhapatiswa gumogo basi:

⁶Womo Nungungulu moyo basi, Babe wa vatshavbo, a fumago ga vatshavbo, a thumago khu vatshavbo, a vbanyago ga vatshavbo.

⁷Moyo ni moyo nya ethu hakhide giningwa gyaye gupima khu edzi Kristo a dzinidego khidzo gu mu ninga.

⁸ Khidzo yi ganelago Milowo, khiyo: “Gikhati a nga khusedzedwa Ndzadzini a di dzega va nya gukhothedwa pasoni a gu kabanisela vathu siningwa.”

⁹Gu thudwa ginani gupwani “litide Ndzadzini?” Ina kha guyeyedzi gupwani phede khu gu relela kala malangani ya vbavbatshi nya mafu, gani?

¹⁰Uye wule a nga relelago, khuye wa moyo a nga lita vbatshani ngudzu, Ndzadzini, afela gu enedza sivangwa satshavbo.

¹¹Khuye a kavedzedego vathu siningwa: Vambe a va ninga wuhigo nya gukhale vapostoli, vambe vaprofeti, vambe vavhangeli, vahavisi, ni vahevbudzi.

¹²Khu magirelo yaya, a guya na gu dongisela sihathwa gasi si thuma gwadi thumo wawe nya guvbahe ni gu dandrisa givili gya Kristo khu gukhodwa,

¹³kala hatshavbothu hi gu tshanganiswa khu gukhodwa ni guti Mwamana wa Nungungulu. Hi fanede gu dandra hi khala vathu vakhongolo, kala hi gu manela tanga ni giemo gya Kristo.

¹⁴Kharati, kha hi na khala gambe sanana nya gulegalegiswe khu mavimbi ni gu pengiswa khu sihevbudzo satshavbo nya guhambane, sanana si sengwago khu vathu nya guvivbedwe khu monyo, va dwanelago gu si dzimedza.

¹⁵Aholu ha gu tivisa lisine khu lihaladzo, hi na dandra siloni gwatshavbo, kala hi gu manela Kristo a gu uye hungo.

¹⁶ Sivbango satshavbo nya guhambanelane sa gu mana gu yingana khu tshivba yaye. Givbango ni givbango gya gu thuma thumo gi fanedego, guphasega givili gyatshavbo, gi dandra khu maningano lihaladzoni.

¹⁷Esi nyi mi tivisago ni gu mi laya khu lina la Pfhumu, khesi: Mu nga vbanyi gambe kha nga va nya mayigo va landrisago maalakanyo yawe nyamba phasa gilo,

¹⁸kholu mapimo yawe ma segegide. Va hambane ni guvbanya gwa Nungungulu khu kotani nya wuhangi ni gusegega nya myonyo yawe.

¹⁹Khu gumba yingela mavhalo yawe, kha va nga gu khathala gambe khu wuthu wawe. Va gu dzi ningedzela gunyenyezani nya mithumo yatshavbo nyamba yela.

²⁰Gasi enu, khandriso esi mu si hevbudego ga Kristo.

²¹Nyi ngu tumba khu lisine gukheni mu pwide na gu ganedwa khu Jesu, gambe mu hevbudzidwe guti lisine khu mahungu yaye.

²²Khu kharato, digani tumbunugo nya mavbanyelo yanu ya gale nya gutale khu gudogolela nya gunyenyeze, gu yisago gumbembani.

²³Dzi garadzeni khu gu vbindrugedza mavbanyelo mu khala vathu vaphya myonyoni ni mapimoni gwanu.

²⁴ Ambalani mavbanyelo nya muthu muphya a giridwego a fanana ni Nungungulu khu gululama ni ndruda lisineni.

²⁵ Khu kharato, nyenyani malipha; muthu ni muthu a na ganele lisine ga muthu kwawe, kholu ethu hatshavbo hi sivbango nya givili gimwegyo.

²⁶ Mwa gu mana gigaradzo monyoni, dzi woneleni, mu nga digi gugaradzega gwanu gu khala gighoho. Likhulo lanu li nga hweli kala mu gu pfoledwa khu lidambo mu ngari nalo.

²⁷Mu nga ningi wulanga Sathane a fuma myonyoni gwanu.

²⁸Oyu a nga bani a guba, a ngabi gambe, a na thume afela guvbanya khu mihandro nya lithonga laye, ni gu mana esi nya guphasedzele khiso sisiwana.

²⁹Mu nga ganeli magana nya guvivbe, ganelani basi magana nya yadi, nya guphasedzele ava va mapwago.

³⁰Mu nga theli wusiwana Liphuvbo nya Guage la Nungungulu, kholu Liphuvbo khigyo gifungo mu lovidwego khu Nungungulu. Khigyo mu nata tidwago khigyo litshigu Nungungulu a natago a ta mi tshula wugumbini nya guvivbe gwatshavbo.

³¹Fuvisani vbakari gwanu dzitshikwi, likhulo, gigaha, ligwaha ni milembo, gumogo ni guvivba gwatshavbo.

³² Khalani vathu nya ndruda, mu pwelana wusiwana, mu tsetselelana khu gyanu, kha nga Nungungulu a mi tsetseledego khu ga Kristo.