Read gitonga Vaefeso 5 Bible Online

Vaefeso 5 - gitonga bible

Vaefeso 5

¹Landrani giyeyedzo gya Nungungulu kha nga sanana nya sigodwa.

² Vbanyani khu lihaladzo, kha nga Kristo a nga hi haladzago a dzi ningela khu kotani yathu “a khala mhamba nya phaso nya mahema nya gunungele gwadi ga Nungungulu.”

³Aholu Wubhayi ni mithumo yatshavbo nya gunyenyeze, ni gu gundrela ni gu khumbugwa si nga khumbugwi vbakari gwanu, kholu enu mu sihathwa sa Nungungulu.

⁴Khidzosaye gambe ni magana nya guvivbe, nya guhandruge ni gunyenyeza kholu kha si yeli. Wulanga nya isoso, thumisani magana nya gubonge Nungungulu.

⁵Dzitini gwadi gukhenu muthu nya wubhayi, nya liphuphulu ni ligungo, ni va nya gukhozela vanungungulu nya malipha, gima kha va na hodza thomba mufumoni wa Kristo ni wa Nungungulu.

⁶Mu nga dzumelini gu sengwa khu muthu khu magana nyamba phasa gilo, kholu sighoho nya nga esi khiso si ranago likhulo la Nungungulu ga ava nyamba yingisa.

⁷Khu kharato, mu nga hengelini navo.

⁸Enu, gale mu di gu vbanya gidemani. Gasi olu, mu nga tshanganiswa ni Pfhumu, mu womo guwonegelani. Khavbo avbo, dzi phareni kha nga vathu va vbanyago safani nya mihani.

⁹Guwonegela khugo gu vangago mihandro nya wuwadi watshavbo, ni gululama, ni lisine.

¹⁰Dzi garadzeni khu guti esi si tsakisago Pfhumu.

¹¹Mu nga hengeli gumogo ni vale va vbanyelago gidemani, mithumoni yawe nyamba phasa gilo; aholu yi ganedzeni nyamba yi vegedzela.

¹²Kholu, gu khala ni dzitshoni gu ganela khu esi va girago mu gusihalani.

¹³Thumo watshavbo, wa gu vegwa guwonegelani khavbo li tisegago gwadi lisine nya tumbunugo waye;

¹⁴kholu silo satshavbo sa gu khala guwonegelani, sa gu wenengedzwa. Khidzo gu ganedwago pwani: “Khendzuga uwe u ladego, wuga khu ga vafudego, Kristo a na gu wenengedza.”

¹⁵Khu kharato, vandriyangu, dzi woneleni guvbanyani gwanu. Mu nga vbanyi kha nga sipumbu, aholu kha nga vathu nya guti.

¹⁶ Sayisani gwadi gikhati mu gu nagyo. Kholu matshigu ya muhuno ma vivbide.

¹⁷Khavbo avbo, mu nga khali sipumbu, aholu dzi garadzeni khu gu tugula egi Pfhumu a golago gukhuye mu gire.

¹⁸Mu nga levi khu wadwa mu nga dwanisana, aholu khalani na mu tade khu Liphuvbo nya Guage.

¹⁹Tiyiselanani khu dzindzimo, ni sizimba, mu gu embelela ni gurungudza Pfhumu khu monyo wanu watshavbo.

²⁰ Bongani Nungungulu Babe, gikhati gyatshavbo ni siloni satshavbo, khu lina la Pfhumu yathu Jesu Kristo.

²¹Ninganani githawo khu gyanu khu kotani nya githawo mu gu nagyo ga Kristo.

²²Enu vagadzi yingelani vama vanu, gukhwatshi khu Pfhumu mu mu yingelago,

²³kholu mwama khuye hungo wa mwangadzi waye, kha nga Kristo a gu hungo nya libandla. Kristo wurumba waye, khuye Muvbanyisi nya libandla a gu givili gyaye.

²⁴Khu kharato, vagadzi va na yingise vama vawe kha nga ilo libandla li yingisago Kristo.

²⁵Enu vama haladzani vagadzi vanu kha nga idzo Kristo a haladzago khidzo libandla laye, kala a gu ningela womi waye khu gufela ilo.

²⁶Uye giride esi khu gufela gu li handza a li agisela khu mati ni magana yaye, a li ningela ga Nungungulu.

²⁷Khu magirelo yaya, a dzi dongisede abune libandla nya gungangamele nyambana livala, nyambana dzikonye mwendro gimbe gilo nya nga isoso; libandla nya guage nyambana gusolega.

²⁸Khu kharato, vama guvbweta va haladza vagadzi vawe gukhwatshi khu edzi va haladzago khidzo givili gyawe. Kholu, oyu a haladzago mwangadzi waye a ngu dzi haladza uye mune.

²⁹Mwalo muthu a vengago givili gyaye. Aholu a gu gi hodzisa ni gu gi sayisa gwadi. Khidzo kharato a girago Kristo ga libandla,

³⁰a gu givili gyaye, ethu hi sivbango nya guvbanye nya givili gyaye.

³¹ “Khu kharato, mwama a na diga babe ni mayi, waye aya patana ni mwangadzi waye. Va vavili va na khala muthu moyo basi.”

³²Oyu sihalo khongolo ngudzu, nya gu ganela khu mahungu ya Kristo ni libandla laye.

³³Moyo ni moyo nya enu a na haladze mwangadzi waye nga edzi a dzi haladzago khidzo wurumba waye. Nyamayi a na ninge githawo mwama waye.