Read gitonga Vaefeso 6 Bible Online

Vaefeso 6 - gitonga bible

Vaefeso 6

¹Enu sanana, khu lina la Kristo, yingelani vavelegi vanu, kholu khidzo gu vbwetegago khidzo.

²Nayo nya guhegule a gu ni gitumbiso khoyu a gukhuye: “Ninga githawo babe ni mayi wago.” Gitumbiso gyakone khegi:

³ “U na mana gukatega ni gu engedzedwa matshigu yago nya guvbanye mafuni.”

⁴A nenu vavelegi, mu nga goroseli sanana, aholu si dandriseni khu gu si hevbudza mavbanyelo nya ndruda ni githawo, kha nga guruma ga Pfhumu.

⁵Enu sithumi, yingelani khu monyo wanu watshavbo ava mu va thumelago mafuni momu, khu githawo ni gu dzi sodzisa nga khwatshi mwa gu thumelani Kristo.

⁶Mu nga va thumelini basi khu gu va thava, nga khwatshi mwa gudwanela gu tsakisa vathu, aholu thumani nga sithumi sa Kristo, mu gira guhaladza gwa Nungungulu khu monyo wanu watshavbo.

⁷Va thumeleni khu matsenya, nasiri khu mapimo nya guthumele vathu, aholu khu mapimo nya guthumele Pfhumu.

⁸Alakanyani gukhenu Pfhumu a na tshatshazela muthu ni muthu gupima khu mithumo ya ndruda a giridego, nyamba hambanisa oyu nya gutshulege ni oyu nya khumbi.

⁹ Enu nenu mu thumedwago, vbanyani nenu kharato ni sithumi sanu. Digani gu si thusedzela, dzitini gukhenu enu ni avo, mwatshavbo mu na ni Pfhumu mweyo basi, yi guromo Ndzadzini, yi si hatheligo vathu.

¹⁰Khu guhegisa nyi ngu mi lomba gukheni tiyani linani ga Pfhumu, mu tumba tshivba yaye nya yikhongolo.

¹¹Dzi vhikeleni khu matshari yatshavbo mu ningwago khu Nungungulu, gasi mu kodze gu tiya, mu pale silingo sa Sathane.

¹²Kholu khandri ha gu dwana ni vathu nya marambo ni nyama, aholu ha gu dwana ni dzitshivba nyamba wonega dzi fumago tigoni momu nya gidema, ha gu dwana ni dzitshivba nya maphuvbo nya guvivbe ya Ndzadzini.

¹³Khavbo avbo, dzi vhikeleni khu matshari mu ningwago khu Nungungulu, gasi mu pharise gutiya gikhati nya gulingwe, mu kodze gupala sigaradzoni gwatshavbo.

¹⁴ Khalani na mu dongide, mu phara lisine mandzani, mu li gira libhandri nya guhunge giwununi gwanu; gululama mu gu gira givhikelo nya khana yanu;

¹⁵ gukhathala gwanu khu gu gimbila mu gu tivisa Mahungu nya Yadi nya gurule gu na khale silato nya migondro yanu.

¹⁶Pharani ngudzungudzu gukhodwa mu gu gira gitshangu nya guvhike matshari yatshavbo nya nilo wa Sathane.

¹⁷ Ambalani gihugu nya guvbanyiswe, gasi magana ya Nungungulu ma phareni kha nga litshari mu ningwago khu Liphuvbo nya Guage.

¹⁸Lombelelani gikhati gyatshavbo nyamba garala khu tshivba nya Liphuvbo nya Guage; mu lindrela khu gutimisela ni gutumbega. Lombelelani vakhodwa vatshavbo nya libandla la Nungungulu.

¹⁹Nyi lombeleleni neni, gasi Nungungulu a nyi ninge magana nya guenele gikhati nyi tivisago Mahungu nya Yadi.

²⁰Eni kheni mutivisi nya Mahungu yaya, ambari olu nyi guromo pasoni. Khavbo avbo, lombelelani gasi nyi ganele na nyi tiyide kha nga edzi gu vbwetegago khidzo.

²¹Tikiko, ndriyangu nya gigodwa, a gu githumi nya gutumbege ga Pfhumu, a na mi tivisani mahungu yatshavbo nya guvbanye gwangu ni mithumo nyi girago.

²² Nyi ngu mu rumela iyo gwanu afela guta mi tivisa esi si hi dugelelago, gumogo ni gu tangadzisa myonyo yanu.

²³Gurula ni lihaladzo ni gukhodwa si na tshige ga vandruye vatshavbo, khu ga Nungungulu Babe ni ga Pfhumu Jesu Kristo.

²⁴Wuhigo wa Nungungulu wu na khale ni vatshavbo vale va golago Pfhumu yathu Jesu Kristo khu lihaladzo nya guvbelele.