Read gitonga Vafilipi 1 Bible Online

Vafilipi 1 - gitonga bible

Vafilipi 1

¹ Eni Pawulo ni Thimoti, sithumi sa Kristo Jesu, hi ngu lovela vathu vatshavbo va Kristo Jesu va vbanyago dhoropani ga Filipi, gumogo ni vathangeli vawe ni vaphasedzeli vakone.

²Wuhigo ni gurula mu na ningwe khu Nungungulu Babe wathu ni Pfhumu Yathu Jesu Kristo.

³Nya gu bonga Nungungulu wangu gikhati gyatshavbo nyi mi dundrugago.

⁴Milombeloni yangu yatshavbo, nyi ngu mi lombelela mwatshavbo khu gunengela;

⁵khu kotani nya wuhengeli wanu ni eni thumoni momu nya gutshumayale Mahungu nya Yadi, gukhugela litshigu nya guhegule kala muhuno.

⁶Nyi ngu tumba gukheni uye Nungungulu a phedego gwanu thumo waye nya wadi, a na wu londrowodza kala li gu vboha litshigu la Kristo Jesu.

⁷Nyi na ni fanelo nya guhingigedze kharati khu enu mwatshavbo, khaguva nyi nanu monyoni gwangu, kholu mu nga hengela ni eni makategwa nyi ningidwego khu Nungungulu, gukhothedwani gwangu ni thumoni nya guvhikele ni gu huwelela Mahungu nya Yadi.

⁸Nungungulu i fakazi nya edzi nyi mi golago khidzo, khu lihaladzo la Jesu Kristo.

⁹Egi nyi lombago ga Nungungulu khu gukheni lihaladzo lanu li na andre khu guti ni mapimo.

¹⁰Gasi mu kodza gu hatha iso si gu sadi, ni gu vbanyani khu ndzila ni lisine mu khala na mu agide mu ta manwa muri mwalo gihoso, kala li gu vboha litshigu la Kristo;

¹¹na mu tade khu mithumo nya gululame yi girwago gwanu khu Jesu Kristo, gasi a rungudzwe ni gu dhumiswa Nungungulu.

¹²Vandriyangu, nya gu vbweta gukheni mu dzitini gukhenu satshavbo iso si nyi dugeledego, si phasedzede gudandra Ivhangeli.

¹³ Vanyakasane vatshavbo va mufumeli ni vatshavbo vambe, va ngu dziti gwadi gukhavo eni nyi hungidwe dzitshinga khu mahungu ya Kristo.

¹⁴Vandruye nya vangi khu gukhodwa va tiyide longo khu gu wona dzitshinga nyi hungidwego, va gu engedzela gitumbo gyawe ga Pfhumu, muhuno va ngu tivisa mahungu ya Nungungulu khu tshivba, nyamba thava gilo.

¹⁵Nyi ngu dziti gukheni vomo va tivisago Kristo khu mapimo nya mapalisana ni lidiwo gwangu, aholu vambe va gu mu tivisa khu monyo nya gululame.

¹⁶Vambe va gu mu tivisa khu lihaladzo na va gu dziti gukhavo eni kheni nyi hathidwego gu khala muvhikeli nya Mahungu nya Yadi;

¹⁷gasi ava vambe, va gu tivisa Kristo khu mapimo nya mapalisana, nasiri khu mapimo nya lisine. Khu magirelo yoyo, va gu zama gu engedzela gusaniseka gwangu olu nyi guromo pasoni.

¹⁸Ahati avo vamune! Gani va ngu tivisa Kristo khu malipha, gani va ngu mu tivisa khu lisine, igyo gi vbwetegago khu gutiviswa Kristo. Khigyo basi gi nyi nengedzisago, gambe gi na nyi tsakisa kala gupindruga.

¹⁹Nyi ngu dziti gukheni satshavbo sesi, sa gu patwa gumogo ni milombelo yanu ni giphaso nyi gi manago ga Jesu Kristo, si na nyi vbulugisa.

²⁰Egi nyi lilago wutshigu ni mihani, na nyi gu tumba khu monyo wangu watshavbo, khu gukheni nyi si khali dzitshoni. Gani olu, muhuno kha nga gikhati gyatshavbo, Kristo a na dhumiswa givilini gwangu, khu guvbanya ambari khu gufa gwangu.

²¹Kholu ga eni, guvbanya khu Kristo, ni gufa giphaso.

²²Aholu ga gu wonega gupwani guvbanya mafuni momu gu ngari ni giphaso thumoni gwangu, kha nyi na giti ni egi nya guhathe.

²³Nya gu dzipwa na nyi gu ndrindrwa khu silo sa sivili: Mumbe monyo wa gu suva gu hongola nyiya khala ni Kristo; a diri gwadi ngudzu guvbindra silo satshavbo;

²⁴aholu, khu gimbe gipandre, gu ngu vbwetega ngudzu nyi simame guvbanya khu kotani yanu.

²⁵Olu nyi khodwago khu esi, nyi ngu tumba gukheni nyi na khala nanu mwatshavbo nyi fela gu mi phasa gudandra khu gunengela nya gukhodwe.

²⁶Gasi, gikhati nyi natago nyaluphye nyita mi holela, mu napwa gutsaka, mu nengela ngudzu khu ga Jesu Kristo.

²⁷Zamani gu vbanya khu mavbanyelo ma yelanago ni Mahungu nya Yadi ya Kristo. Gani nyi ngu dzi kodza guta iyo gwanu nyita mi wona, gani nyi ngu tandrega, nya gu vbweta basi nyipwe mahungu nya gupwani enu mu ngu simama gu tsarama khu monyo moyo, mu dwanela gu vhikela gukhodwa nya Mahungu nya Yadi.

²⁸Mu nga khalini hwanga khu kotani ya valala vanu, kholu silo sesi ga avo, si na khala giyeyedzo nya gumbembe. Aholu, ga enu, si na khala giyeyedzo nya guvbanyiswe. Silo satshavbo sa guta khu ga Nungungulu.

²⁹Nungungulu a mi ningide wuhigo, nasiri basi owu nya gukhodweni ga Kristo, aholu, ni owu gambe nya gusaniseke khu kotani yaye.

³⁰ Olu enu mu ngu hengela ni eni gu dwana litunga la limwedo mu nyi wonego na nyi gu dwana, kala ni olu nyi nga gu simamago gu dwana, kha nga mu dzitigo.