Read gitonga Vafilipi 2 Bible Online

Vafilipi 2 - gitonga bible

Vafilipi 2

¹Khavbo avbo, mwa gu bani mu mane gutiya khu ga Kristo, ni gutangadziswa khu lihaladzo laye, ni gutshanganiswa khu Liphuvbo laye, mwa gu bani mu li pima lihaladzo li guromo vbakari gwanu,

²nyi ngu mi lomba gukheni mu tadzise gutsaka gwangu khu gukheni, mwatshavbo mu hengele mapimo mamowo, lihaladzo limwedo, hefemulo moyo ni gudogorela gumogo basi.

³Mu nga girini gilo khu monyo nya gudwanele gu dzi khusedza mwendro khu matshandza nya mahala, aholu, girani khu gu dzi sodzisa, mu dzi gira va nyalidede ga vathu vatshavbo.

⁴Muthu ni muthu a nga dwaneli basi gu sayisa esi si gu saye, aholu, a na dzi garadze gambe khu sile si gu sa vangana.

⁵Gu vbwetega mavbanyelo yanu ma fanana ni mavbanyelo ya Kristo Jesu.

⁶Uye a gu Nungungulu khu tumbunugo waye gima kha dzina gu hengula wurendra waye nya gukhale idzosaye ni Nungungulu.

⁷Aholu a di diga wufumu waye a gu dzi gira khumbi, a dzi gira idzosaye ni vathu. Na gu vbanya khu makhalelo nya wuthu,

⁸a di dzi vbwasamisa abune, a yingisa kala gufa khu gu songwa vbagihambanotunu.

⁹Khavbo avbo, Nungungulu khusedzide Jesu a mu ninga lina nya wudhumo guvbindra malina yatshavbo;

¹⁰gasi, khu kotani nya wudhumo nya lina la Jesu, sivangwa satshavbo sa Ndzadzini, ni mafuni ni vbavbatshi nya mafu, si na khidzima si mu khozela;

¹¹ni gu vathu vatshavbo va huwelela, khavo: “Jesu Kristo Pfhumu,” gasi gu dhumiswa Nungungulu Babe.

¹²Khu kharato, vandriyangu, sigodwa sangu, kha nga mu nyi yingisidego gikhati gyatshavbo nyi khadego vbakari gwanu, nyi yingiseni gambe ni olu nyi guromo hwindzo. Thumelani guvbanyiswa gwanu khu githawo ni gu dzi nogisa,

¹³kholu Nungungulu a ngu mi phasedzela gikhati gyatshavbo khu gu mi ninga gusuva ni guthuma guhaladza gwaye.

¹⁴Girani silo satshavbo nyamba ngurangura mwendro gu ganedzisana,

¹⁵ mu yeyedza kharati gukhenu mu vathu nya gululame, nya dzifanelo, gukhenu mu sanana sa Nungungulu, mu khala na mu agide nyambana gihoso vbakari nya vathu nya guwegele nya guvivbedwe khu monyo. Guvbwetega mu ngangamela vbakari nya vathu vovo kha nga myenge ya mafuni,

¹⁶mu va tivisa mahungu nya guvbanyise. Khu kharato, litshigu nya gute ga Kristo, nyi napwa gunengela nya gukhongolo ngudzu, kholu nyi na dziti gukheni kha nya garala khu guthuma mahala.

¹⁷Ambari gu lomba gu ningela womi wangu nyi gira mhamba nya phaso gasi gu pata ni miningelo yanu nya gukhodwe ga Nungungulu. Eni si ngu nyi tsakisa, gambe nyi ngu hengela gutsaka gogu ni enu mwatshavbo.

¹⁸Enu nenu tsakani gumogo ni eni.

¹⁹Nyi ngu tumba ga Pfhumu gukheni nyi na mi rumela nyamba hwela Thimoti, gasi eni neni nyita tangadziswa khu gu mana mahungu nya esi si dugelelago vbakari gwanu.

²⁰Mwalo mumbe muthu a hengelago gwadi ni eni sigaradzoni, a wuya a gu dzi garadza khu gu khathalela enu, kha nga uye.

²¹Vatshavbo vambe va gudwanela basi gu gira guhaladza gwawe, nasiri ogu ga Kristo.

²²Gasi Thimoti, enu mu ngu pima gutumbega gwaye: A dzi garadzide gumogo ni eni thumoni nya gutivise Mahungu nya Yadi, kha nga gyanana gi phasedzelago babe waye.

²³Nyi ngu virela gu mu rumela nyamba hwela, me ni gu dziti gukheni ma na lamudwa kharini mahungu yangu.

²⁴Nyi ngu tumba ga Pfhumu gukheni eni neni nyi nata mi wona nugunugu.

²⁵Nya gu wona gukheni gwadi nyi mi rumelani Epafrodito, ndriyangu eno mungana wangu nyi thumago ni gu dwana gumogo naye, a gu uye mu mu rumedego guta nyi phasedzela mu sigaradzoni gwangu.

²⁶Uye a gu khala khu gu mi suva enu mwatshavbo, gambe a ngu garadzega ngudzu kholu enu mu pwidego mahungu nya madwali yaye.

²⁷Gunene, khu lisine a di gu dwala nya guhadze gufa, aholu Nungungulu a mu girede wuhindzi, nasiri uye basi, aholu ni eni neni, afela gumba nyi engedzela sigaradzo vbatshani nya sigaradzo nyi gu naso.

²⁸Khu kharato, nyi ngu mu rumela khu guvbiredza gasi, khu gu mu wonani nyaluphye, mu nengele, nyi vbevbugisedwa sigaradzo sangu.

²⁹Khu kharato, mu hakheni khu litsako likhongolo kha nga ndriyanu khu ga Pfhumu. Guvbwetega mu yeyedza githawo ga vathu nya nga uye,

³⁰khaguva a di hadza gufa khu kotani nya thumo wa Kristo, a ningela womi waye khu gufela gu nyi phasedzela khu esi enu mu si dzi kodzigo gu nyi ningani.