Read gitonga Vafilipi 4 Bible Online

Vafilipi 4 - gitonga bible

Vafilipi 4

¹Khu kharato, vandriyangu, sigodwa sangu, nyi mi suvago ngudzu, enu khenu gunengela ni tshatshazelo wangu, simamani gu khala khu gu tiya linani ga Pfhumu.

²Nyi ngu lomba Evhodhiya ni Sintiki gukheni va vbanye khu gupwanana kha nga edzi a golago khidzo Pfhumu.

³Nyi ngu gu lomba uwe pari yangu nya gutumbege, u va phasedzele. Kholu avo va dwanide gumogo ni eni thumoni nya gutivise Mahungu nya Yadi gumogo ni Klementi, ni vatshavbo nyi nga hengelago navo thumoni, malina yawe ma lovidwego libhukuni nya womi.

⁴Nengelani ga Pfhumu; nyi ngu engedza gu mi embela, nengelani.

⁵Wuwadi wanu wu na wonege ga vathu vatshavbo. Pfhumu a nata nyamba hwela.

⁶Mu nga garadzegi khu gilo. Omu nya milombelo yanu lombani esi mu si vbwetago ga Nungungulu, khu monyo nya gubonge.

⁷Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo ni mapimo khu ga Kristo Jesu.

⁸Khu guhegisa, vandruye, nyari kheni thelani kota khu esi nya lisine, nya gululame, nya guyele, nya guagiswe, nya gugolege, esi nya wuzundzo, nya ndruda, si yelago gu dhumiswa.

⁹Guvbanyani gwanu thumisani esi mu hevbudego gwangu, esi mu nyi pwidego na nyi gu ganela ni esi mu nyi wonego na nyi gu gira, kharati, gurula ga Nungungulu gu na khala ni enu.

¹⁰Nyi nengede ngudzu ga Nungungulu kholu enu mu nyi giredego gambe silo nya gusalalegise monyo. Kha nyi ganeli gukheni nyi di gualakanya gukheni mu nyi divade. Mu di gu nyi dundruga, aholu mu di si gu mani gikhati nya gu nyi girele gilo.

¹¹Kha nyi ganeli esi khu gu dilela gilo, kholu nyi hevbulede gu eneledwa basi khu esi nyi gu naso.

¹²Eni nyi ngu kodza gu vbanya wusiwanani ni gumanelani. Nyi hevbulede guvbanya monyo wangu wu na salalegide gikhati gyatshavbo: Gani nya gukhura, gani nya gupwa ndzala, gani nyi ngu si mana, gani si ngu nyi kenelela.

¹³Nyi ngu kodza gupala satshavbo tshivbani ya wule a nyi tiyisago.

¹⁴Ambari ulo, enu mu giride gwadi mu hengedego ni eni sigaradzoni gwangu.

¹⁵Enu Vafilipi, mu ngu dzitini gwadi gukhenu, guhegulani, gikhati nyi phedego thumo nya gutivise Mahungu nya Yadi, gikhati nyi hongodego Makedhoniya Libandla lanu khilo basi li nga nyi phasa. Mu hengede ni eni khu gu ninga ni gu hakha.

¹⁶ Na nyi ngari dhoropani ga Tesalonika, dzinyondro dzingi mu nyi rumedego silo nya gu nyi phasedzele wusiwanani gwangu.

¹⁷Khandri gu khwatshi nya gudwanela miningelo, aholu nyi ngu gola mu engedzedwa wuhindzi wanu.

¹⁸ Eni nyi naso satshavbo khu gutala nya iso. Olu nyi hakhidego satshavbo esi mu nga nyi rumela khu mandzani ya Epafrodito, nyi si mane khu gutala guvbindra esi nyi si vbwetago. Ningelo yoyu kha nga mahema nya yadi nya mhamba yi hakhwago khu Nungungulu yi mu salalegisa.

¹⁹Nungungulu wangu a na mi phase khu satshavbo mu si vbwetago, khu gutala nya wufumu ni wudhumo waye ga Kristo Jesu.

²⁰Wudhumo wu na vegwe ga Nungungulu Babe wathu kala gupindruga. Amen.

²¹Losedzelani vatshavbo va khodwago ga Jesu Kristo. Vathu va Nungungulu nyi vbanyago navo va ngu mi losedzelani navo.

²²Vatshavbo, ngudzungudzu ava va dugelago nyumbani ga Mwamangulu va ngu mi losedzela.

²³Makategwa ya Pfhumu Jesu Kristo ma na khale ni enu mwatshavbo.