Read gitonga Vakolosi 1 Bible Online

Vakolosi 1 - gitonga bible

Vakolosi 1

¹Eni Pawulo, mupostoli wa Kristo Jesu khu guhaladza ga Nungungulu, gumogo ni ndriyangu Thimoti,

²hi ngu losa va nya guaga, vandriyathu va tumbegidego ga Kristo va vbanyago dhoropani ga Kolosi. Wuhigo ni gurula ga Nungungulu Babe wathu gu na khale ni enu.

³Ethu hi ngu mu bonga Nungungulu, Babe wa Pfhumu yathu Jesu Kristo, na hi gu mi lombelela gikhati gyatshavbo.

⁴Kholu hi pwide mahungu nya gukhodwe gwanu linani ga Kristo Jesu ni lihaladzo mu yeyedzago ga vatshavbo va nya guaga va khodwago.

⁵Gikhati nya guhegule mu hakhidego Mahungu Yadi nya lisine, mu pwide na gu ganedwa khu gutumba hi ningwago khayo. Khu kharato, gutumba ni lihaladzo lanu sa gu seketedwa khu gutumba mu vegedwego Ndzadzini.

⁶Mahungu nya Yadi mu ma hakhidego, ma ngu simama gu ninga mihandro nya yadi ni gu andra tigoni gwatshavbo kha nga edzi ma nga girago vbakari gwanu, gukhugela litshigu mu hakhidego mahungu nya wuwadi wa Nungungulu mu gu wuti khu lisine.

⁷ Mu hevbudzidwe satshavbo khu Epafrasi, githumi gikhwathu nya gigodwa, muphasedzeli wangu nya gutumbege thumoni wa Kristo, a gu uye a tshikedzago wulanga wangu vbakari gwanu.

⁸Khuye a nga hi embelago mahungu nya lihaladzo mu gu nalo khu Liphuvbo nya Guage la Nungungulu.

⁹Khu Kharato, gukhugela litshigu hi pwidego mahungu yaya nya gutsakise, kha hi garali khu gu lombelela khu enu. Ha gu lomba gukhethu Nungungulu a mi tadzisele khu gu mi tulela guti guhaladza gwaye, a mi ninga gugengela ni gupima khu Liphuvbo Laye.

¹⁰Kharati, mu na kodza gu landrisa guhaladza gwa Pfhumu, mu gu mu tsakisa mithumoni yatshavbo; mu na ninga mihandro nya mithumo ya yadi, mu dandra khu guti Nungungulu.

¹¹Ha gu lomba ga Nungungulu a mi tiyisa khu tshivba yaye nya yikhongolo, mu kodze gutsarama siloni satshavbo khu gutimisela ni gutsaka.

¹²Bongani Nungungulu Babe a dzinidego gukhuye mu mane nenu fanelo nya guya hengela guhodza thomba a yi vegisedego libandla laye mufumoni nya wenengedzo.

¹³A hi vbulugiside tshivbani nya gidema a gu hi bedza mufumoni wa Mwanaye nya gigodwa.

¹⁴ Uye a ngu hi vbulugisa ni gu hi handza sighoho khu novba waye.

¹⁵Khuye giwonelo nya Nungungulu a si wonegigo; velegidwe khu Babe na li si gu vangwi litigo.

¹⁶Nungungulu vangide khu uye silo satshavbo sa Ndzadzini ni mafuni, esi si wonegago ni esi si si wonegigo, dzitshivba nya maphuvbo, sikhalo nya wufumu, mufumo, vafumeli ni dzitshivba. Nungungulu vangide silo satshavbo khu Kristo, a gu si vangela Kristo.

¹⁷Uye a di romo na gu si gu vangwi gilo, khuye a tiyisago silo satshavbo.

¹⁸Khuye hungo nya Libandla, a gu givili gyaye; khuye guphela, khuye matiwula nya guwuge ga vafudego. Khuye a thangidego mbeli nya silo satshavbo.

¹⁹Nungungulu dzinide gu mu ninga gutadzisega gwatshavbo.

²⁰Khu tshivba yaye tshanganiside ni Nungungulu silo satshavbo: Esi si guromo Ndzadzini ni esi si guromo mafuni a guvbaha gurula ga vatshavbo khu novba wa Mwanaye wu vbaladzidwego vbagihambanotunu.

²¹Enu nenu mu di gu vbanya hwindzo ni Nungungulu, gambe mu diri valala vaye khu myonyo ni mithumo yanu nya guvivbe,

²²gasi olu, khu gufa Gwaye, Nungungulu a mi giride dzipari dzaye, afela gu mi emisa mbeli gwaye na mu vbelede gululama, na mu agide nyambana livala ni gusolega.

²³ Aholu, gu vbwetega mu simame gu khala na mu tiyide gwadi gukhodwani, mu nga hambani ni gitumbo mu hakhidego gikhati mu tivisidwego Mahungu nya Yadi, ma tiviswago ga vathu vatshavbo va tigoni momu, eni Pawulo nyi vegidwego gu khala mutivisi wakone.

²⁴Olu nyi ngu nengela khu gusaniseka gwangu, nyi sanisekago khu kotani gwanu; nya gu tadzisa milini gwangu, avba gu nga bani gu tshade gusanisekani ga Kristo khu kotani nya Libandla a gu givili gyaye.

²⁵Nungungulu a nyi ranide guta thumela Libandla. A nyi ningide thumo wowu vbakari gwanu, gasi enu mu phasege gikhati Mahungu ya Nungungulu ma giregago vbakari gwanu.

²⁶Mahungu yaya khu sihalo nya gikungo gya Nungungulu a gi sihidego nyamba gi tivisa ga vathu, gukhugela gale nya matshigu, aholu muhuno a dzinidego gu ma tivisa ga vale va khodwago.

²⁷A va tulede gambe guti talo nya thomba nya sihalo yoyo a dongisedego vathu vatshavbo. Gikungo gya Nungungulu nyi gi thulago khu Kristo a vbanyago ndrani gwanu a gu uye gitumbo nya wudhumo wa Nungungulu.

²⁸Hi ngu tivisa Kristo ga vathu vatshavbo. Hi ngu laya ni gu hevbudza vathu vatshavbo gasi va mane wuhengeli nya guvbelele ni Kristo.

²⁹ Khiso nyi si thumelago ni gu si dwanela khu tshivba yatshavbo nyi yi manago tshivbani ga Kristo.