Read gitonga Vakolosi 2 Bible Online

Vakolosi 2 - gitonga bible

Vakolosi 2

¹Kholu nya gu vbweta muti litunga nya likhongolo nyi li dwanago khu kotani yanu, khu kotani ya va Lawodhikeya, ni vambe va si nyitigo khovbe ni khovbe.

²Nya gu thumela gukheni va mane gutiya monyoni ni gukheni va dzipwe na va patane khu lihaladzo, na va fumide khu guti sihalo nya gikungo gya Nungungulu. Sihalo yoyu khu Kristo,

³wu sihidwego gwaye wufumu watshavbo nya dzithomba nya guti ni gupima.

⁴Nya gu mi embelani esi gasi mu si pembwi khu muthu khu magana nya gusengedzele.

⁵Kholu ambari saye nyi guromo hwindzo khu givili, nyi womo vbakari gwanu khu hefemulo. Nyi ngu nengela khu gupwa mavbanyelo yanu nya yadi, ni gutiya nya gukhodwe gwanu ga Kristo.

⁶Kha nga olu mu hakhidego Pfhumu Jesu Kristo, gu vbwetega mu vbanya khu gupwanana naye,

⁷mu tsitsa gwadi mikhamba, mu tiyiswa gukhodwani, kha nga edzi mu hevbudzidwego khidzo, mu gu bonga Nungungulu gikhati gyatshavbo.

⁸Dzi woneleni, mu nga dzi digi mu gu sengwa khu vale va vbwetago gu mi ndrindra khu sihevbulo nya wugengeli nya mahala, nya gutiyiswe khu mikhuwo nya vathu, ni guti ga mafuni momu, aholu nyamba tiyiswa khu guti gwa Kristo.

⁹Kholu talo watshavbo nya wudhumo wa Nungungulu wu manide givili khu guvbelela ga Kristo a dzi giridego muthu.

¹⁰Enu mu hakhide talo watshavbo wowu khu gutshanganiswa ni Kristo, a gu uye hungo nya vafumeli vatshavbo nya maphuvbo ni dzitshivba.

¹¹Khu gu tshanganiswa naye, enu mu hanide wugwera, nasiri wugwera wu hanwago milini, aholu wugwera wu tago khu ga Kristo, a gu gutshudwa givili nya gighoho.

¹² Gikhati mu nga bhapatiswa, mu dzingidwe gumogo ni Kristo, mu gu wuga gambe naye kholu mu ngu khodwa ga tshivba ya Nungungulu a mu wusidego.

¹³Enu mu di fude khu kotani nya sighoho sanu ni kotani nya tumbunugo nya mikhuwo yanu nya giwuthu, aholu, Nungungulu a mi ningide nyaluphye guvbanya ni Kristo, a gu hi divalela sighoho sathu satshavbo.

¹⁴Uye fuviside lidangalila nya nandru li nga bani li gu hi thuledza, a li futa khu gu li khokhothela vbagihambanotunu.

¹⁵Pade vafumeli ni dzitshivba nya maphuvbo, a va thela dzitshoni vbakari nya vathu, a gu va hunga nga sibotshwa a gu yeyedza wungwazi waye.

¹⁶A nga manegi wa gu mi kawuka khu kotani nya esi mu hodzago ni esi mu selago, mwendro khu kotani nya matshigu nya buzo, nya guwonege nya ngima mwendro nya dzisabhadho.

¹⁷Satshavbo sesi mwedzi basi nya silo si nga gutago; aholu givili gyakone khu Kristo.

¹⁸Mu nga dzumeli gusengwa khu vathu va pfhadzedzelago gu landrisa ni gukhozela dzingilozi dza Nungungulu; vathu nya nga avo va gu ganela khu silo nya gu gima va si gu si woni, va gu dzi gira matshandza va dzi gugumugisa khu mapimo yawe nyamba phasa gilo.

¹⁹ Vathu vava va mwalo wuhengeli ni Kristo a gu uye hungo nya givili gyatshavbo, a tshanganisago sivbango saye nya guhambanelane, a si dandrisa khu edzi a golago khidzo Nungungulu.

²⁰Mwa gu bani mu fude gumogo ni Kristo, mu gu tshulega wugumbini nya tshivba nya tumbunugo nya mafu, khu ginani mu nga gu dzi hungelelago khu mikhuwo nga khwatshi mu nga gu vbanyela mafu, gani? A gupwani:

²¹“Esi u nga si khuhi, esi u nga lingi; esi u nga phari.”

²²Sileletelo si tshipago khu nango yakone kha nga milayo ni sihevbudzo satshavbo nya vathu.

²³Silo sesi sa gu wonega kha nga guti, kholu va si fumbelago khu wukhodwa, va gu sanisa sivili sawe, aholu satshavbo sesi kha si phasi gilo, sa gu thuma gu tsakisa matshandza nya wuthu basi.