Read gitonga Vakolosi 4 Bible Online

Vakolosi 4 - gitonga bible

Vakolosi 4

¹ Enu mu thumedwago, ningani sithumi sanu ogu gu fanedego ni gu ningana, na mu gu dziti gukhenu enu nenu mu na ni Pfhumu Ndzadzini.

²Pharisani gu gira nombelo khu hefemulo ni gu bonga khu monyo;

³lombelelani gambe khu ethu, gasi Nungungulu a hi tulela wulanga, hifela guganela khu sihalo wa Kristo, owu nyi hungidwego khuwo nga gibotshwa,

⁴gasi nyi kodze guganela khu edzi gu vbwetegago khidzo.

⁵ Vbanyani khu guti ni mapimo vbakari nya vale va si khodwigo, mu londrola gwadi gikhati mu gu nagyo.

⁶Mabhuloni gwanu ganelani mahungu nya gusalalegise, mu gu kodza gu ninga phindrulo nya guenele muthu ni muthu.

⁷ Tikiko, ndriyangu nya gigodwa, githumi nya gutumbege ni muphasedzeli wangu thumoni ga Pfhumu, a nata mi tivisa mahungu yatshavbo nya guvbanye gwangu.

⁸Eni nyi ngu mu rumela iyo gwanu gasi guta mi tivisa mavbanyelo yathu ni gu tangadzisa myonyo yanu.

⁹ Hi ngu mu rumela gumogo ni Onesimo, ndriyathu nya gigodwa nya gutumbege, a gu moyo wanu. Avo va nata mi embela satshavbo esi si dugelelago eno.

¹⁰ Arisitariko, a khothedwego gumogo ni eni, a ngu mi losedzela, a nuye Marko, ndruye wa Bharinabha. Gasi khu mahungu ya Marko, nyi mi ningideni sileletelo nya gukheni a guta mi holela, mu hakheni gwadi.

¹¹A nuye Jesu, a ranwago pwani khu Justo a ngu mi losedzela. Ga vakhodwa vatshavbo nya gudugele nayoni nya Vajudha khavo ava basi va hengelago ni eni gu thumela Mufumo wa Nungungulu, va ngu nyi phasedzela ngudzu.

¹² Hakhani gambe malosedzela ya Epafrasi a gu moyo nya libandla lanu a guromo thumoni wa Kristo Jesu. Uye milombeloni gwaye a ngu lombelela ngudzu ga Nungungulu gukhuye mu simame gutiya, mu landrisa khu guvbelela guhaladza gwa Nungungulu.

¹³Eni nyi fakazi nya edzi Epafrasi a garadzegago khidzo khu kotani yanu ni ya vandruye va guromo Lawodhikeya ni Hiyerapoli.

¹⁴ Luka, nyanga yathu nya gigodwa, ni Dhemasi va ngu mi losedzelani navo.

¹⁵Losedzelani vandruye va Lawodhikeya, mu losedzela nuye Ninfa ni libandla li tshanganago ndrangani gwaye.

¹⁶Hwane nya gu na mu hevbude lidangalila leli, li rumeleni ga libandla la Lawodhikeya, vafela guya li hevbula navo. Enu nenu hevbulani lidangalila mu na gu rumedwago khu Lawodhikeya.

¹⁷ Embelani Arikipo, khenu: “Thela kota khu thumo u ningidwego khu Pfhumu u wu sayisa.”

¹⁸Khu gyandza gyangu nyi ngu lova esi: Nyi ngu mi losedzela eni Pawulo. Mu nga divaledwi khu gukhenu nyi hungidwe dzitshinga. Wuhigo wu na khale ni enu!