Read gitonga 1 Vatesalonika 2 Bible Online

1 Vatesalonika 2 - gitonga bible

1 Vatesalonika 2

¹Vandruye, mu ngu dzitini gwadi nya gukhenu lipfhumba hi nga li gira hita iyo gwanu, khandri la mahala.

² Ambari hi nga hegula khu gu saniseka, hi vadwa tigoni ga Filipi, kha nga mu dzitigo, Nungungulu wathu a di hi ninga gutiya ni tshivba nya guhongole hiya ganela Mahungu nya Yadi tigoni gwanu, vbakari nya sigaradzo nya singi.

³Tshumayelo yathu khandri nya gukanganyise, ni gu nyenyezisa ni malipha.

⁴Aholu, ha gu ganela edzi Nungungulu a dzinago khidzo khu Mahungu nya Yadi, aya a nga hi dongisela. Kha hi gireli gu tsakisa vathu, aholu, gu tsakisa Nungungulu, atigo esi si guromo monyoni ga moyo ni moyo nya ethu.

⁵Gambe mu ngu dziti nya gukhenu kha ha thumisa magana nya gutshambisele, ni gudwanela gu mana gilogyo. Nungungulu i fakazi nya isoso.

⁶Gima kha ha vbweta gu zundzwa khu muthu, ambari khu enu ni vambe.

⁷Ambari nari guralo, kha nga vapostoli va Jesu Kristo, hi diri ni fanelo nya guhengule gilogyo. Aholu, hi di dzi rudzisa vbakari gwanu hi mi sayisa nga edzi mayi a sayisago khidzo sanana saye.

⁸Khu gu mi haladzani ngudzu, hi di dzi emisede gumba mi ningani Mahungu nya Yadi basi, aholu, ni gu ningela gambe guvbanya gwathu khu enu, kholu enu mu khade nga sanana sathu nya sigodwa.

⁹Vandruye, dundrugani khu lisine gugaradzega ni gugarala gwathu. Hi di thuma wutshigu ni mihani gasi hi si mi lemedzi, khu kharalo, hi di mi tivisani Mahungu nya Yadi ya Nungungulu.

¹⁰Enu mu dzifakazi, Nungungulu nuye, nya edzi hi khadego khidzo vbakari gwanu, enu vakhodwa. Hi khade khu gululama, ni wuwadi nyamba solega.

¹¹Enu mu ngu dzitini nya gukhenu hi mi layide moyo ni moyo nga babe a layago gyanana gyaye.

¹²Hi mi embede, hi mi tiyisa ni gu mi yeyedzani, edzi mu vbwetago gu landra khidzo gudzina gwa Nungungulu, a mi ranidego guya belani wudhumoni nya Wufumu waye.

¹³Khu guralo, hi ngu mu bonga Nungungulu gikhati gyatshavbo. Olu mu nga hakha Mahungu gwathu, Mahungu ya Nungungulu mu ma hakhidego. Kholu, khandri mahungu nya vathu, aholu, mahungu nya lisine la Nungungulu. Mwa gu khodwa mu na engedzela ngudzu tshivba nya guvbanye.

¹⁴ Vandruye, enu nenu khidzosaye ni mabandla nya vakhodwa va Jesu Kristo va guromo tigoni ga Judheya. Mu ngu saniswa khu va na gyanu nga edzi va nga saniswago khidzo avo khu Vajudha.

¹⁵Avo va di songa Pfhumu Jesu, ni vaprofeti, va tutumisa ethu nethu. Avo kha va tsakisi Nungungulu, kha va vbweti nya sadi ga vathu.

¹⁶ Va gu vbweta gu himbedzela gu tshumayela ni gu vbanyiswa va nya mayigo. Khu guralo, va tadzide pimo nya sighoho sawe. Aholu, likhulo la Nungungulu li va fenengedzide.

¹⁷Vandruye, olu hi nga hambana nanu gikhatinyana hi womo hwindzo khu maho nya nyama, aholu, hi womo vbafuvbi khu myonyo, gikhati gyatshavbo ha gu mi suvani hi dogorela gu mi wonani khovbe ni khovbe.

¹⁸Khu guralo, hi di gode guta iyoyo, hita mi holelani. Eni Pawulo nyi di lingide gu gira nyondro mbili, aholu, Sathane khuye a nga hi thindregisa guta iyo gwanu.

¹⁹Gikhati Pfhumu yathu Jesu Kristo a na gutago, khu mani a na khalago gutumba gwathu, ni gutsaka gwathu, ni ndronga yathu nya wudhumo mbeli gwaye, vbavbandze ga enu?

²⁰Ina, enu khenu kamwe wudhumo wathu ni gutsaka gwathu.