Read gitonga 1 Vatesalonika 3 Bible Online

1 Vatesalonika 3 - gitonga bible

1 Vatesalonika 3

¹ Khu kharato, na hi thindregide, nyi di wona gu khala dhoropani ga Atena eni nyenga,

²nyi mi rumelani Thimoti, ndriyathu a guromo thumoni wa Nungungulu, a tshumayela Mahungu nya Yadi ya Kristo. Nyi mu rumide guta mi tivisani ni gu mi phasani gukhodwa gwanu,

³gasi mu si thurugi khu sisaniso sesi. Enu mu ngu dziti gwadi gukhenu khiso esi hi si lindrelago.

⁴Na nyiri iyoyo gwanu nyi di mi embedeni khu libango li nga hadza hi dugelelago. Khu guralo, li giregide nga olu mu dzitigo.

⁵Khidzo kharato, gu kala nyi ruma Thimoti khu guvbiredza, guta wona gukhodwa gwanu gwa gu gimbila kharini, mwendro saye mukanganyisi a mi lingideni, a ghohetela mihandro nya thumo wathu.

⁶ Olu, Thimoti wide khiyo gwanu, a hi wuyede ni mahungu nya gutshambe khu gukhodwa gwanu ni lihaladzo mu gu nalo ga vambe. A hi embede gambe khuye mu ngu hi dundruga ngudzu, mu ngu hi suva gu hi wona, nga ethu nethu hi mi suvago gu mi wona.

⁷Mahungu yoyo nya gukhodwe gwanu ma hi tangadziside ngudzu mu sigaradzoni ni gusanisekani gwathu.

⁸Olu ha gu dzipwa na hi gu vbanya nya dzadi, khu gupwa gu simama gutiya gukhodwani ga Pfhumu.

⁹Hi ngu yela gubonga Nungungulu, khu gutsaka gogo mu hi girelago mbeli gwaye.

¹⁰Wutshigu ni mihani, ha gu lomba ngudzu ga Nungungulu a hi ninge gutsaka khu guta wonana gambe nanu, gasi hi kodza gu vbedzisa ogu gu tshadego vbagukhodwatunu gwanu.

¹¹Gasi Nungungulu Babe wathu ni Jesu Kristo Pfhumu yathu va na hi endredze ndzilani nya gute iyo gwanu.

¹²Pfhumu a na engedzele ngudzu gu dandrisa lihaladzo lanu, li andra, mu haladzana moyo ni moyo, ni vathu vatshavbo. Lihaladzo lanu li na khale idzosaye ni eli hi gu nalo ethu khu enu.

¹³Khu guralo, myonyo yanu yi na bani yiri gululamani nya gwadi, khavbo mu na gu kodzago guya emani mbeli ga Nungungulu, Babe wathu, na mu agide, muri mwalo nandru, gikhati Pfhumu yathu Jesu Kristo a na gu wuyago ni sihathwa saye satshavbo.