Read gitonga 1 Vatesalonika 4 Bible Online

1 Vatesalonika 4 - gitonga bible

1 Vatesalonika 4

¹Vandruye, mu hakhide ga ethu sileletelo nya ndzila mu yelago gu yi landrani gasi gu tsakisani Nungungulu. Hi ngu mi lombani ngudzu khu lina la Pfhumu mu pharise gu gimbila khu ndzila yoyo, nga edzi mutago mu na gu gira, gasi mu andra ngudzu.

²Dundrugani sileletelo hi nga mi ningani na hi gu rumwa khu Pfhumu yathu Jesu Kristo.

³Nungungulu a gu vbweta mu vbanye khu ndruda, mu gimbilele hwindzo ni wubhayi,

⁴gasi moyo ni moyo a kodza gu thumisa khu githawo givili gi mu lumbago.

⁵Mu nga dzumeli gu ndrindrwa khu maalakanyo nya guvivbe nga edzi va girago vale va gu mwalo gukhodwa ga Nungungulu.

⁶Ga silo sesi, kha gu vbwetegi na moyo a girela guvivba ndriyaye gukhodwani, ambari gu mu supha. Nga olu hi mi embedego ni gu mi tivisani, Pfhumu a ngu tsayisa satshavbo sighoho isoso.

⁷Nungungulu kha hi ranela guvivba, a di hi ranela gu vbanya khu ndruda.

⁸Khu guralo, oyu a si yingeligo milayo yeyi, khandri a gu yeyisa muthu, aholu, a gu yeyisa Nungungulu, a mu ningago Liphuvbo nya Guage.

⁹Mahungu nya lihaladzo ga vandriyathu khu gukhodwa, kha gu vbwetegi gu ganela gambe khiso, kholu enu mu hevbudzidwe khu Nungungulu gu haladzanani.

¹⁰Lihaladzo lanu nya wundruye li ngu vboha ga vandriyathu va vbanyago tigoni gwatshavbo ga Makedhoniya. Vandruye, hi ngu mi lombani mu li andrisa ngudzu.

¹¹Dwanelani guvbanya khu gurula, vbedzani mwabune sigaradzo sanu, thumani gasi mu mane guvbanya, nga edzi hi nga mi hevbudzani khidzo.

¹²Khu guralo, mu na mana lisima ga vathu va vbavbandze, mu vbanya nyamba lemedzani muthu.

¹³Vandruye, kha hi vbweti mu khale gidemani khu mahungu ya vafudego, mu nga saniseki kha nga vale va gu mwalo gutumba hi gu nago ethu.

¹⁴Kholu, ethu hi ngu khodwa gukhethu Jesu fude a wuga; khu kharalo, vale va fudego, Nungungulu a na va wusa khu Jesu va wuya gumogo naye.

¹⁵Egi nyi vbwetago gu ganela khu lina la Pfhumu, nya ri kheni, ethu hi vbanyago, guwuyani ga Pfhumu, kha hi na va thangela vale va fudego.

¹⁶Iyo Pfhumu wurumba, gikhati gu na pwalago lito nya ngilozi nya yikhongolo ni pundru wa Nungungulu, yi na tshiga khu Ndzadzini, vale va fudego ga Kristo, va na guhegula khavo gu wuga.

¹⁷Khu hwane, ethu hi vbanyago, hi na ya hakhwa gumogo navo mapfhini, na hi gu khinga Pfhumu ndrengelengeni. Khu guralo, hi na khala ni Pfhumu kala gupindruga.

¹⁸ Khu kharato, tangadzisanani moyo ni moyo khu mahungu yaya.