Read gitonga Josuwa 14 Bible Online

Josuwa 14 - gitonga bible

Josuwa 14

¹Edzi khu dzithomba dzi nga kavedwago va na Israyeli tigoni ga Khanani, va kabanisedwego khu muphasi nya mhamba Eliyazari, ni Josuwa, mwamana wa Nuni ni vathangeli nya mapango nya mahundzu ya na Israyeli.

² Gukavedzedwa nya thomba, gu giridwe khu gulola dzisolo kha nga idzo PFHUMU Nungungulu a nga leletelago khidzo Mosi, gasi gu kavedzedwa livbandre na mana mahundzu ni gipandre;

³ Kholu Mosi a di kabaniside khu gale ga mahundzu mavili ni gipandre thomba yawe, khu khisikheyi nya tsongo wa Joridhani; aholu va na Levhi, kha va mana giavelo vbakari ga vandriyawe.

⁴Sanana sa Josefe, si di gu wumba mahundzu mavili: Va na Manasi ni va na Efrayimi. Va na Levhi kha va ningwa giavelo tigoni momo, vbavbandze nya madhoropa nya gukhale umo ni mayigwana nya guvege umo mitshambi ni gu havisa sifuyo sawe.

⁵Sanana sa Israyeli si di kabana litigo, va landrisa esi PFHUMU Nungungulu a leletedego Mosi.

⁶ Va na Judha va di hidzimela ga Josuwa nari tigoni ga Ghiligali; khavbo avbo, Kalebi, mukenezi, mwamana wa Jefoni, ata mu embela, khuye: Uwe u ngu siti iso PFHUMU Nungungulu a ganedego ga Mosi, muthu wa Nungungulu, tigoni ga Kadhesi-Bharineya, khu kotani gwangu ni uwe.

⁷ Eni nyi diri ni magumana myaga, gikhati Mosi, githumi gya PFHUMU Nungungulu a nyi rumedego Kadhesi-Bharineya, guya holelela litigo, eni nyi di mu resela iso si nga bani si nyi vbisa monyoni.

⁸Khu guralo, vandriyangu nyi nga hongolago navo, va di pila hwambo vathu; gasi eni nyi di simama gulandrela PFHUMU Nungungulu wangu.

⁹ Khu litshigu lolo, Mosi a di nyi sambanyela, khuye: “Litigo u li gandridego khu ngondro wago, li na khala thomba yago gumogo ni sanana sago kala gupindruga, kholu u simamide gu landra khu gutumbega PFHUMU Nungungulu wangu.”

¹⁰Gasi olu wona nya gukhuwe PFHUMU Nungungulu sayiside womi wangu, kha nga a nyi tumbisidego. Gu vbindride magumana na livbandre myaga PFHUMU Nungungulu na ganede magana yaya ga Mosi, va na Israyeli na va gu legalega giwulani; muhuno nyi na ni livbandre na mararu magumi ni livbandre myaga.

¹¹Ni olu nyi nga gu dzipwa na nyi tiyide, gukhwatshi khu litshigu lile nyi nga rumwa khu Mosi guya holelela litigo; nyi ngari ni tshivba nya guye nyimbitunu guya dwana, guhongola ni guwuya.

¹²Gasi olu nyi ninge litigo la musigomoni momu eli PFHUMU Nungungulu a li ganedego litshigu lile, kholu litshigu lile u pwide gupwani Vaanaki va nga gu khala mule ni madhoropa yawe nya makhongolo nya gubhiywe. A gu dzina saye PFHUMU Nungungulu a na ni eni, nyi na va tutumisa, kha nga a nyi tumbisidego.

¹³Josuwa a di kategisa Kalebi, mwamana wa Jefoni, a mu ninga Hebroni kha nga thomba yaye.

¹⁴Khidzo kharalo, Hebroni gu lumbago Kalebi, mwamana wa Jefoni, mukenezi, kala na muhuno, kholu uye a simamide gu landrisa khu gutumbega PFHUMU Nungungulu wa Israyeli.

¹⁵Hebroni khu gale gu di gu ranwa gupwani Kiriyati-Aribha; Aribha yoyu a diri mwama nya guthavisege vbakari ga va na Anaki. Gukhugela avbovbo, tigoni gu di manega gurula.