Read gitonga Josuwa 16 Bible Online

Josuwa 16 - gitonga bible

Josuwa 16

¹Litigo la sanana sa Josefa, va li manidego khu gu lola solo, la gukhugela Joridhani, gigomoni gya Jeriko khu phuvbo ga Khugadambo nya mati ya Jeriko, li hongola kala giwulani gi gwelago khu Jeriko khu gigomoni gya Bheteli.

²Khu Bheteli la gu duga kala Luzi, li vbindra khu vbinganoni wa Arike kala Ataroti;

³li relela li thonona Muhwadambo, vbinganoni wa Jafeti, kala vbinganoni wa Bheti-Horoni wa vbavbatshi kala Gezeri wu ya vbelela phwani.

⁴Khiyo thomba si hakhidego sanana sa Josefe: A gu uye Manasi ni Efrayimi.

⁵Khuwo owu vbingano nya thomba ya sanana sa Efrayimi, gukhedza khu dzindranga dzawe, gukhugela Khugadambo, Ataroti-Adhari kala Bheti-Horoni wa vbatshani;

⁶vbingano wa gu hongola gukhugela phwani gumogo ni Mikimetati, khu phuvbo ga Wuronga, wu dzundruluga wu hongola Khugadambo kala Tahanati-Silo, wu vbindra khu vbale kala Khugadambo wa Janowa;

⁷wa gu relela gukhugela Janowa wu hongola Ataroti gumogo ni Naharati, wu vboha Jeriko, wu ya vbelela Joridhani.

⁸Khu Tapuwa, vbingano wa gu hongola kala Muhwadambo ga gitsongwana gya Khanani wu ya vbelela phwani; eyi khiyo thomba nya lihundzu la va na Efrayimi, gukhedza khu dzindranga dzawe,

⁹aholu sanana sa Efrayimi si diri ni madhoropa yawe khu phuvbo, vbakari nya thomba ya va na Manasi; madhoropa yaya ma diri ni mitalala yawe.

¹⁰ Khu guralo, va na Efrayimi kha va nga dzi kodza gu tutumisa Vakhanani va nga bani va vbanya tigoni ga Gezeri. Khu guralo, kala na muhuno Vakhanani va nga gu simama gu vbanya tigoni mule, aholu va gu gurumedzwa gu livba gikhaba.