Read gitonga Josuwa 20 Bible Online

Josuwa 20 - gitonga bible

Josuwa 20

¹PFHUMU Nungungulu a di embela gambe Josuwa, khuye:

²“U na embela sanana sa Israyeli, khuwe: Dzi hatheleni madhoropa nya wuthavelo, kha nga idzo nyi mi leletedego khidzo khu ga Mosi.

³Gasi muthu nya gukari a gu songa muthu khu guphazama; a na kodza gu thavela umomo, gasi gu dzi vhikela ga avo va vbwetago gu phodza.

⁴Oyu a songidego muthu a na thavela ga limwedo nya madhoropa yoyo, aya ema nyangwani nya lidhoropa, a thela mahungu yaye ga madhota ya dhoropani, avo va na mu hakha va mu ninga wulanga nya gukhale vbakari gwawe.

⁵Uye a vbwetago gu phodzela novba a gu landra, avo kha va na ningela oyu a songidego muthu mandzani gwaye, kholu uye kha songa kha gwenye ambari khu gu vengana ni muakelane waye

⁶A na simama gu khala dhoropani momo, kala a ta phathani nya madhota gasi guta lamudwa, kala afa muphasi nya khongolo nya mhamba a thumago gikhati gyogyo. Khavbo avbo, uye a songidego muthu a na bwelela gaya gwaye, dhoropani a nga thavago khumo.”

⁷Kharati, va di emisa madhoropa ya Kadesi, tigoni ga Galileya, gigomoni gya Nafitali; Sikemi, gigomoni gya Efrayimi; Kiriyati-Aribha, (mwendro Hebroni), gigomoni gya Judha.

⁸Khu tshatugo ga Joridhani, khu Khugadambo ga Jeriko, va di hatha Bhezeri, nya lihundzu la na Rubheni, panini ga giwulani, Ramoti, tigoni Gileyadhi nya lihundzu la Gadhi; ni Golani, tigoni ga Bhasani, nya lihundzu la Manasi.

⁹ Khayo aya madhoropa ma emisedwego ga sanana satshavbo sa Israyeli, gumogo ni muluveli a vbahidego vbakari gwawe, gasi a thavele umo watshavbo wule, a songago muthu nya gukari khu guphazama, gasi a si songwi khu wule a nga mu hosela a vbwetago gu phodza, kala aya ema mbeli nya phatha nya tshangano nya madhota.