Read gitonga Josuwa 22 Bible Online

Josuwa 22 - gitonga bible

Josuwa 22

¹Khu guralo, Josuwa a di ranisa va na Rubheni, va na Gadhi, gumogo ni gipandre nya lihundzu la na Manasi, a ta va embela, khuye:

² “Enu mu sayiside satshavbo mu leletedwego khu Mosi, githumi gya PFHUMU Nungungulu, gambe mu landriside sirumo sangu nyi mi rumidego.

³Khu ga gikhati gyatshavbo gegi kala na muhuno, kha mwa hambana ni vandriyanu. Aholu mu landriside khu gutumbega sileletelo satshavbo sa PFHUMU Nungungulu wanu.

⁴Gasi olu, PFHUMU Nungungulu wanu, a ningidego gurula vandriyanu a nga bani a va tumbiside, olu wuyani mitshatshani gwanu ga litigo li mu lumbago, eli Mosi githumi gya PFHUMU Nungungulu a mi ningidego tshatugo ga Joridhani.

⁵Gasi olu dzi woneleni mu zama gu landrisa khu gutumbega sileletelo ni milayo eyi Mosi githumi gya Nungungulu a mi leletedego, mu gola PFHUMU Nungungulu wanu, mu gimbila khu dzindzila dzaye, mu dzi ningela gwaye ni gu mu khozela khu monyo wanu watshavbo ni hefemulo wanu watshavbo.”

⁶Khavbo avbo, Josuwa a di va kategisa a va ruma va hongola; va bwelela mitshatshani gwawe.

⁷Mosi a di ningide ga gipandre nya lihundzu la Manasi, gitigwana gya Bhasani; Khu guralo, Josuwa a di ninga gipandre nya lihundzu, gitigwana vbakari ga vandriyawe va na Israyeli, khu tshatugo ga Joridhani, khu phuvbo ga Muhwadambo. Gikhati Josuwa a nga va rumelago gu hongola mitshatshani gwawe, a di va kategisa.

⁸A di va embela, khuye: “Bwelelani ni dzithomba nya dzingi mitshatshani gwanu, mitshambi nya gutale ngudzu, parata, ndralama, sugu, simbi ni guambala nya gutale ngudzu. Kabanelanani ni vandriyanu, iso mu phangidego ga valala vanu.”

⁹Khu guralo, sanana sa Rubheni ni sa Gadhi ni gipandre nya lihundzu la na Manasi, va di hambana ni sanana sa na Israyeli dhoropani ga Silo, gu manegelago tigoni ga Khanani, va phara ndzila nya guhongole tigoni ga Gileyadhi, litigo nya thomba a leletedwego Mosi khu PFHUMU Nungungulu, gu va ninga.

¹⁰Avbo va nga vbohago vbafuvbi ni Joridhani, tigoni ga Khanani, va na Rubheni, va na Gadhi ni gipandre nya lihundzu la na Manasi, va di emisa giluvelo nya gikhongolo vbafuvbi ni tsongo wa Joridhani.

¹¹Va na Israyeli va dipwa gupwani va na Rubheni, va na Gadhi ni gipandre nya lihundzu la na Manasi, va emiside giluvelo vbafuvbi ni Joridhani, vbinganoni ga Khanani khu phuvbo ga va na Israyeli.

¹²Avbo va na Israyeli va ngapwago esi, wu di tombana tshangano watshavbo wa na Israyeli dhoropani ga Silo gasi guya dwana navo.

¹³Khavbo avbo, va di rumela ga va na Rubheni, va na Gadhi, ni ga gipandre nya lihundzu la na Manasi, tigoni ga Gileyadhi, Fineya, mwamana wa muphasi nya mhamba Eliyazari,

¹⁴a diri gumogo ni likhumi vathangeli nya dzinyumba, muthangeli moyo khu mahundzu yatshavbo ya na Israyeli; moyo ni moyo nya avo a diri muthangeli nya sikwata nya likhumi mazana (1.000) ga linyumba lawe.

¹⁵Avbo va nga vbohago ga va na Rubheni, va na Gadhi ni gipandre nya lihundzu la na Manasi, tigoni ga Gileyadhi, va diya va embela, khavo:

¹⁶ “Tshangano watshavbo wa PFHUMU Nungungulu wu ngu ganela kharati, khuwo: Gasi giyeyiso muni mu gu nagyo nya guwugele Nungungulu wa Israyeli, olu muhuno mu hambanago ni PFHUMU Nungungulu, mu dzi emisela giluvelo gasi gu wugela PFHUMU Nungungulu?

¹⁷ Ina gighoho hi giridego tigoni ga Peyori gi dugwana gani, egi kala na muhuno hi si gu agiswigo ga igyo, ambari ulo tshangano wa PFHUMU Nungungulu wu thegedwego khu libango nya likhongolo, gani?

¹⁸Olu enu mwa gu vbweta gu wugela PFHUMU Nungungulu, gani? Muhuno enu mwa gu wugelani PFHUMU Nungungulu, mindru a na gorogela tshangano watshavbo wa Israyeli.

¹⁹Litigo nya thomba yanu mwa gu li wonani na li nyenyezide, tshatugani mu ta tigoni ga PFHUMU Nungungulu, avbo wu emisidwego avbo Tshatsha wa PFHUMU Nungungulu, mu nata mana avbo thomba vbakari gwathu; aholu mu nga wugeli PFHUMU Nungungulu ambari gu wugela ethu, mu vbahani giluvelo gi hambanago ni giluvelo gya PFHUMU Nungungulu wathu.

²⁰ Ina kamwe Akani, mwamana wa Zera, kha gira gighoho khu mahungu nya silo nya gunyenyeze, gani? PFHUMU Nungungulu kha gorogela tshangano watshavbo wa na Israyeli, gani? Kholu khandruye ekha a fudego khu kotani nya gighoho gyaye!”

²¹Va na Rubheni, va na Gadhi ni gipandre nya lihundzu la Manasi, va di phindrula vathangeli nya sikwata nya likhumi mazana (1.000) sa na Israyeli, khavo:

²²Nyadzitshivbe, Nungungulu, Pfhumu, Nyadzitshivbe, Nungungulu, Pfhumu, Uye a ngu dziti; Israyeli nuye a na dziti! Ethu ha gu bani hi giride esi khu gu hambana ni gu wugela PFHUMU Nungungulu ni gu mu ghohela, muhuno kamwe Uye a nga hi vbanyisi.

²³Ha gu bani hi gi emiside khu gu vbweta gu pfhurarela Pfhumu, mwendro gu vbweta gu ningela miphaso nya guvbiswe ni miningelo nya guhodzwe, mwendro gu ningela avbo miningelo nya gurule, Uye kamwe PFHUMU Nungungulu a na hi lamule!

²⁴Aholu hi giride esi khu gu thava gukhethu: Mindru sanana sanu si nata wudzisa sanana sathu, khiso: Gasi mwa gu felela ginani ga PFHUMU Nungungulu wa Israyeli?

²⁵Khu guralo, PFHUMU Nungungulu vegide tsongo wa Joridhani gasi gu khala vbingano vbakari gwathu ni enu sanana sa Rubheni ni sanana sa Gadhi; khu guralo, enu mu mwalo giavelo ga PFHUMU Nungungulu! Kholu, sanana sanu si nga khala gikhunguvanyiso nya gusegele sanana sathu gu ninga githawo PFHUMU Nungungulu.

²⁶Khu guralo, hi di khethu; hongoleni hi vbahe giluvelo, nasiri giluvelo nya miningelo nya guvbiswe ni miphaselo,

²⁷gasi igyo gi khala kha nga wufakazi vbakari ga ethu ni enu ni ga situgulwana sathu si natago hwane gwathu, gasi hi khozele mbeli ga PFHUMU Nungungulu, khu miningelo nya guvbiswe, ni miphaselo, gumogo ni miningelo nya gurule; gasi mindru sanana sanu, si si ganeli ga sanana sathu khiso: Mu mwalo giavelo ga PFHUMU Nungungulu.

²⁸Khu guralo, hi nga ganela khethu: Mindru, avo va gu ganela kharati avbo gwathu ni ga situgulwana sathu, hi na va hakha, khethu: “Wonani mavbahelo nya giluvelo gya PFHUMU Nungungulu, gi vbahidwego khu vababe vathu, nasiri giluvelo nya guningele miningelo nya guvbiswe ambari miphaso; aholu gi khale fakazi vbakari gwathu ni enu.

²⁹Ma na manege hwindzo ni ethu mapimo nya guwugele PFHUMU Nungungulu, hi diga gu mu landrela, khu gu bani hi vbahide giluvelo nya miningelo nya guvbiswe, miningelo nya guhodze ni dzimhamba; vbavbandze ga giluvelo gya PFHUMU Nungungulu wathu, gi guromo mbeli nya Tshatsha waye nya guage!”

³⁰Avbo va nga pwago magana ya sanana sa Rubheni, sa Gadhi ni ya gipandre nya lihundzu la na Manasi, muphasi nya mhamba Fineya, vathangeli nya tshangano ni vathangeli nya sikwata nya likhumi mazana (1.000) sa va na Israyeli, va nga bani vari gumogo naye, va di nengela.

³¹Fineya, mwamana wa muphasi nya mhamba Eliyazari a di embela sanana sa Rubheni, sa Gadhi ni sa gipandre nya lihundzu la Manasi, khuye: “Muhuno hi ngu dziti gukhethu PFHUMU Nungungulu womo vbakari gwathu, kholu gima kha mwa girani gighoho avbo Gwaye; khu guralo, mu vbulugide va na Israyeli mandzani ga PFHUMU Nungungulu.”

³²Fineya, mwamana wa muphasi nya mhamba Eliyazari, gumogo ni vathangeli, va di khuga khavbo ga va na Rubheni ni ga va na Gadhi, khu tigoni ga Gileyadhi, va bwelela tigoni ga Khanani ga va na Israyeli; vaya va embela mahungu yaya.

³³Va na Israyeli va di nengela khu phindrulo va nga yipwago, va bonga Nungungulu; gima kha va nga ganela gambe khu gu vbweta gu va dwanisa, ni gu ghoha litigo va khalago va na Rubheni ni va na Gadhi.

³⁴Khu magirelo yoyo va na Rubheni ni va na Gadhi va di rana giluvelo khavo i fakazi, kholu va di va embela, khavo: “Igyo i fakazi nya gupwani: Pfhumu basi khuye a gu Nungungulu.”