Read gitonga Josuwa 3 Bible Online

Josuwa 3 - gitonga bible

Josuwa 3

¹Josuwa a di wuga ni mambagugya gumogo ni vatshavbo va na Israyeli, va khuga khu tigoni ga Sitimi, va hongola kala tsongoni wa Joridhani, vaya zumba vbale na va si gu tshatugi.

²Hwane nya matshigu mararu, vathangeli va di vbindra khu vbakari nya lizumbo, va ninga vathu gileletelo gegi, khavo:

³“Mwa gu wonani Ngasa nya Gidzumeledzwano gya PFHUMU Nungungulu wanu, na yi rwadwe khu vaphasi nya mhamba va na Levhi, mu na khuga vbalizumbotunu gwanu mu phara ndzila mu yi landra.

⁴Vbakari gwanu ni Ngasa gu na manege pfhuka nya guhambane khu kilometro mweyo. Khu magirelo yaya, mu na landra ndzila yoyo, kholu gima mu di si gimbili khiyo matshigu ma vbindridego.”

⁵Josuwa a di embela vathu, khuye: “Dzi agiseni, kholu mindru PFHUMU Nungungulu a na gira sisamadziso vbakari gwanu.”

⁶Khu hwane, a di embela vaphasi nya mhamba, khuye: “Dzegani Ngasa nya Gidzumeledzwano mu thanga mbeli nya vathu.” Khavbo avbo, avo va di dzega Ngasa nya Gidzumeledzwano va thanga mbeli ga vathu.

⁷PFHUMU Nungungulu a di embela Josuwa, khuye: “Muhuno nyi na phela gu gu khusedza mbeli ga vatshavbo va na Israyeli, gasi va dziti nya gukhavo, kha nga nyi nga bani nyiri ni Mosi, kharato gambe nyi na bani nyiri nago.

⁸U na ruma vaphasi nya mhamba va rwalago Ngasa nya Gidzumeledzwano khuwe, mwa gu vbohani tsongoni wa Joridhani, mu na ya ema bambe nya mati.”

⁹Khavbo avbo, Josuwa a di embela va na Israyeli, khuye: “Hidzimelani gasi mu ta yingisa magana ya PFHUMU Nungungulu wanu.”

¹⁰A engedza gambe, khuye: “Kharato mu na dzitini nya gukhenu Nungungulu a vbanyago womo vbakari gwanu, Uye gima kha na diga gu bhobha mbeli gwanu Vakhanani, Vahiti, Vahevhi, Vaperezi, Vagerezi, Vaamori, ni Vajebhuzi.

¹¹Wonani nya gukhenu Ngasa nya Gidzumeledzwano gya Pfhumu ya tigoni gwatshavbo yi ngu hadza gu tshatuga tsongo wa Joridhani mbeli gwanu.

¹²Hathani likhumi na vavili vama va na Israyeli, khu lihundzu ni lihundzu.

¹³Avbo vaphasi nya mhamba va na rwalago Ngasa nya Gidzumeledzwano gya PFHUMU Nungungulu, Pfhumu ya mafuni gwatshavbo, avbo va na kuhago khu migondro yawe mati nya tsongo wa Joridhani, ayo ma na tulega ma kabanega khu vbakari. Ni ayo matago khu vbatshani ma na ema ma wungedzelana.”

¹⁴Khavbo avbo, vathu, va di duga khu mitshatshani gwawe, va dongisela gu tshatuga tsongo wa Joridhani gumogo ni vaphasi nya mhamba va nga bani va thangide mbeli gwawe, na va rwade Ngasa.

¹⁵Gikhati va vbohidego tsongoni wa Joridhani avbo migondro ya vaphasi nya mhamba va nga bani va rwade Ngasa nya Gidzumeledzwano yi nga gandrago matini, bambe nya tsongo (kholu tsongo wa Joridhani wu di gu gugumuga wu goga funguni gwatshavbo, matshigu yatshavbo nya guvbwere)

¹⁶mati ma nga bani ma guta khu vbatshani ma di ema; ma wungedzelana ma khala gigomo ma gira kha nga libhulaho, ma anama kala vbafuvbi nya gitigwana ga talala wa Adhamu, gu khalago wubambe ga Saritani; ayo ma nga bani ma goga maya phwani ga Arabha, a gu Yiphwa nya Munyu, ma di pidwa yatshavbo. Khavbo avbo, vathu va di vbindra khu mbeli ga Jeriko.

¹⁷Aholu, vaphasi nya mhamba va nga bani va rwade Ngasa nya Gidzumeledzwano gya PFHUMU Nungungulu, va di ema havo hwe vbakari nya tsongo wa Joridhani, va na Israyeli vatshavbo va di vbindra khu mawundru nyamba na gana migondro, va tshatuga tsongo wa Joridhani.