Read gitonga Josuwa 6 Bible Online

Josuwa 6 - gitonga bible

Josuwa 6

¹Malimba ya Jeriko ma di segidwe, bwelo khavbo ma khotwa khu kotani nya guthave va na Israyeli, mwalo a nga bani a bela mwendro gu duga dhoropani.

²Khavbo avbo, PFHUMU Nungungulu a di embela Josuwa, khuye: Wona, nyi ningede mandzani gwago Jeriko, ni mufumeli waye gumogo ni dzindrena dzaye.

³Khu guralo, indrani enu mwatshavbo vama mu somidego nyimbi mu ya randrela lidhoropa gumogo khu litshigu, mu randrela maphuvbo yatshavbo. Mu na gira isoso livbandre na limwedo matshigu.

⁴Livbandre na vavili vaphasi nya mhamba va na thanga mbeli nya Ngasa nya Gidzumeledzwano, na va gu womba livbandre na mivili mipundru; khu litshigu nya livbandre na mavili, mu na dzundruluga lidhoropa livbandre na dzimbili dzinyondro, gumogo ni vaphasi nya mhamba na va gu womba mipundru.

⁵Gikhati yi wombwago khego khu gulaphisa, mupwa gudzungurula nya pundru, vathu vatshavbo gu vbwetega va gira ligwaha nya likhongolo ngudzu, likhokhola la lidhoropa li na thega vbavbatshi. Vathu va na bela dhoropani khu guvbiredza, moyo ni moyo a na hongola wulanga wu na manegago mbeli gwaye.

⁶Josuwa, mwamana wa Nuni, a di tombanisa vaphasi nya mhamba, a va embela, khuye: “Rwalani Ngasa nya Gidzumeledzwano, gumogo ni livbandre na vavili vaphasi nya mhamba ni livbandre na mivili mipundru, va thanga mbeli nya Ngasa.”

⁷Khu hwane nya isoso a di embela vathu, khuye: “Gimbilani mbeli. Dzundrulugani lidhoropa, uye a gu ni litshari a na thange mbeli nya Ngasa ya PFHUMU Nungungulu.”

⁸Na nga gu vbedza gu ganela Josuwa, livbandre na vavili vaphasi nya mhamba va nga bani vari ni livbandre na mivili mipundru va di phela gu gimbila vaya mbeli ga PFHUMU Nungungulu na va gu womba mipundru; Ngasa ya PFHUMU Nungungulu na yi gu landra khu hwane.

⁹Vama va nga bani va pharide matshari va di thanga mbeli ga vaphasi nya mhamba va nga bani va gu womba mipundru. Khu hwane, gu di gu landrela Ngasa, na va gu gimbila gu di pwala basi gudzuma nya mipundru.

¹⁰Khu guralo, Josuwa a di leletede vathu, khuye: “Mu nga kanyulugi, gambe mu nga pwadzi malito yanu ambari gu duga magana nya gukari khu kanani gwanu, kala litshigu nyi na ganelago, kheni: Huwatani! Mu na huwata khu tshivba ni tshivba.”

¹¹Ngasa ya PFHUMU Nungungulu yi di dzundruluga gumogo lidhoropa, va di wuya lizumbotunu, gasi guta lala avbo.

¹²Josuwa a di wuga ni mambagugya, vaphasi nya mhamba va di rwala Ngasa ya PFHUMU Nungungulu.

¹³Livbandre na vavili vaphasi nya mhamba va nga bani va gu womba mipundru va di thanga mbeli nya Ngasa ya PFHUMU Nungungulu, vama va somidego va di gimbila mbeli gwawe; wumbe tsawa wu di gimbila khu hwane nya Ngasa ya PFHUMU Nungungulu, na gu pwala gudzuma nya mipundru basi.

¹⁴Khu litshigu nya wuvili, va di dzundruluga gambe lidhoropa, va wuya lizumbotunu; va di gira kharati kala gu vbedza livbandre na limwedo matshigu.

¹⁵Khu litshigu nya livbandre na mavili, va di wuga ni mambagugya, va di gira idzosaye, va di dzundruluga livbandre na dzimbili dzinyondro lidhoropa, litshigu lolo la limwedo va di dzundruluga livbandre na dzimbili dzinyondro.

¹⁶Gikhati vaphasi nya mhamba va nga dzundrulugago livbandre na dzimbili dzinyondro na va gu womba mipundru, Josuwa a di embela vathu, khuye: “Huwatani, kholu PFHUMU Nungungulu a mi ningide lidhoropa!

¹⁷Lidhoropa, gumogo ni satshavbo si guromo umo, si emisedwe gu khungumudwa hiso bhi; gu na vbuluga basi Rahabhi nya gibhayi gumogo ni vatshavbo va na gu bani vari nyumbani gwaye, kholu uye sihide vaholeleli hi nga bani hi va rumede.

¹⁸Aholu dzi woneleni ga sile si lolelago, mwa gu tshuka mu dzega gimwegyo nya iso, mu na resa libango ga lizumbo la na Israyeli, gu na manega pfilupfilu.

¹⁹Khu guralo, parata, ndralama ni sombo satshavbo nya sugu ni simbi si na agisedwa PFHUMU Nungungulu, si na khala thomba yaye.”

²⁰ Vathu va di huwata, vaphasi nya mhamba va di womba mipundru. Vathu na va pwide gudzuma nya mipundru, va di gira gupwala huwa nya yikhongolo, makhokhola ma di khungumuga, va na Israyeli va di bela dhoropani moyo ni moyo a di hongola wulanga wu nga bani wu romo mbeli gwaye, li di wandrwa kharati lidhoropa.

²¹Satshavbo si nga bani si romo dhoropani va di si khungumulela, va songetela khu litshari vama, vanyamayi, sanana ni sikhosane gumogo ni dzimombe, dzinvuta ni dziburu.

²²Khavbo avbo, Josuwa a di embela vama va vavili va nga bani va dzude va ta holelela litigo, khuye: “Indrani nyumbani ga Rahabhi, nya gibhayi, mu ya mu dusa ni satshavbo si mu lumbago, kha nga edzi mu mu tumbisidego khidzo.”

²³Madzaha nya vasoli va di bela nyumbani, va dusa Rahabhi gumogo ni babe waye, mayi waye, vandriyaye ni valongo vaye vatshavbo ni satshavbo si nga bani si mu lumba; va va sayisa vbavbandze nya lizumbo la Israyeli.

²⁴Va di vbisa lidhoropa, va vbisa gambe ni satshavbo si nga bani si romo umo, vbavbandze ga ndralama, parata gumogo ni sombo satshavbo nya sugu ni simbi, va nga si ningelago si khala thomba ya Nyumbani ga PFHUMU Nungungulu.

²⁵ Josuwa a di ninga githawo womi wa Rahabhi, nya gibhayi, gumogo gambe ni wa ngamo ya babe waye, ni satshavbo a nga bani ari naso; khu magirelo yoyo, uye a di khala vbakari ga va na Israyeli kala na muhuno, khu kotani a nga sihago vasoli va vavili va nga rumedwa Jeriko khu Josuwa.

²⁶ Khavbo avbo, Josuwa a di gira gisambanyo gegi, khuye: “A na vadwe mbeli ga PFHUMU Nungungulu wule a na gu yedzago gu vbahedza lidhoropa leli la Jeriko! Gikhati a na girago khokhweni, gi nafe gyanana gyaye nya matiwula; gikhati a thelago malimba, gi nafe gyanana gyaye nya mahegiso.”

²⁷PFHUMU Nungungulu a diri ni Josuwa, ndruma yaye yi di phalalega ni litigo latshavbo.