Read gitonga Josuwa 7 Bible Online

Josuwa 7 - gitonga bible

Josuwa 7

¹Va na Israyeli va dzi vangede nandru khu silo nya guphangwe; kholu Akani, mwamana wa Karimi, mwamana wa Zabhidhi, mwamana wa Zera, nya lihundzu la na Judha a di dzega silo nya gulolele. PFHUMU Nungungulu a di gorogela sanana sa Israyeli.

²Khu guralo, Josuwa, a di rumela vama nya gukari nari khu Jeriko tigoni ga Ayi, gu khadego vbafuvbi ni Bheti-Avheni, gu khadego khu Khugadambo ga Bheteli, a di va embela, khuye: “Indrani mu ya holelela gwadi litigo.” Khu guralo, vama vale va di gwela va ya holelela litigo la Ayi.

³Va di wuya ga Josuwa vata mu embela, khavo: “Gu nga hongoli vathu vatshavbo; va na hongole basi tengo nya magumavili mazana (2.000) mwendro magumararu mazana (3.000) vama va ya sasela Ayi; u nga dzi garadzi khu gu dzega vathu vatshavbo va hongola iyoyo, kholu valala vadugwana.”

⁴Khu guralo, gu di hongola iyoyo vama nya tengo nya magumararu mazana (3.000) avo va nga ya tutuma mbeli ga vama va Ayi.

⁵Vama va Ayi va di songa magumararu na livbandre na moyo vama, vambe va va lundra gukhugela nyangwatunu nya siwindri, va ya va sasela relelotunu; myonyo ya vathu yi di nyiviliga yi vbindrugedza yi khala mati.

⁶Khavbo avbo, Josuwa a di pferula dzingandzu dzaye, a thega vbavbatshi khu khovbe mbeli nya Ngasa nya Gidzumeledzwano gya PFHUMU Nungungulu kala vbasilambotunu, uye gumogo ni madhota ya na Israyeli; va di phorola nguma hungoni.

⁷Josuwa a di ganela, khuye: “Yowe! PFHUMU Nungungulu, khu ginani u giridego vathu vava va tshatuga tsongo wa Joridhani, gasi guta va ningela mandzani ga Vaamori, va hi mbembisa? A di siri tshukwana na hi khade khu tshatugo wa khisikheyi wa Joridhani, gani?

⁸Ah! Pfhumu, nyi na kheni ginani? Kholu Israyeli a ningedzede hwambo mbeli ga valala vaye!

⁹Avbo Vakhanani ni vatshavbo vavbanyi va tigoni va na gu pwago esi, va na hi randrela va fuvisa lina lathu omu mafuni; khu guralo, U na khuwe ginani khu lina lago nya likhongolo?”

¹⁰Khavbo avbo, PFHUMU Nungungulu a di embela Josuwa, khuye: “Khuga u eme! Khu ginani u thegidego kharati khu khovbe mafuni?

¹¹Israyeli ghohide, a hambanisa gidzumeledzwano gyangu, gile Eni nyi nga mu leletelago, a dzega silo nya gulolele, va si siha, va si pata gumogo ni sibubu sawe.

¹²Khu guralo, khiso si nga gira va na Israyeli va si tiyi mbeli ga valala vawe, va ningedzela mihwambo yawe, kholu va dzi nyenyeziside. Mwa gumba dusani silo si nyenyezidego vbakari gwanu, gima kha nyi na khala gambe nanu.

¹³Indra u ya agisa vathu! U va embela, khuwe: Dzi agiseni litshigu la mindru kholu, PFHUMU Nungungulu wa Israyeli, a ngu ganela, khuye: Kha mu na dzi kodza gu tiya gu ema mbeli ga valala vanu na mu si gu dusi guvivba gu guromo vbakari gwanu.

¹⁴Mindru mu na hidzimelani vbafuvbi khu dzinyangwa dzanu; khu guralo, nyangwa yoyo PFHUMU Nungungulu a na gu yi emisago yi nata dzi wonegisa khu lipango ni lipango; ni lipango li na gu emiswago khu PFHUMU Nungungulu li na dzi bikela khu dzinyumba dzawe; ni nyumba yi na gu kombwago khu PFHUMU Nungungulu yi na dzi yeyedza khu vathu.

¹⁵Muthu wule a na gu manwago nari ni silo nya gunyenyeze a na vbiswa uye ni satshavbo si mu lumbago, kholu uye ndragide gidzumeledzwano gya PFHUMU Nungungulu a gira silo nya gunyenyeze ngudzu ga va na Israyeli.”

¹⁶Ni dzimindrudzile, nya litshigu li landrelago, Josuwa a di rumela gu vate vathu khu lihundzu ni lihundzu; aholu yi di modwa nyangwa ya Judha.

¹⁷A di hidzimisa vbafuvbi mahundzu yatshavbo ya na Judha, solo yi di ya thegela lihundzu la Zera, a di rumela linyumba la Zera li hidzimela khu mapango yawe, solo yi di thegela Zabhidhi;

¹⁸na rumide gu hidzimela ndranga yaye, khu moyo ni moyo, solo yi di thegela Akani, mwamana wa Karimi, mwamana wa Zabhidhi, mwamana wa Zera, nya lihundzu la na Judha.

¹⁹Khavbo avbo, Josuwa a di embela Akani, khuye: “Mwanangu, rungudza PFHUMU Nungungulu wa Israyeli, u mu zundza. Nyi embele iso u giridego, nyamba siha ni gimwegyo.”

²⁰Akani a di hakha Josuwa, khuye: Ina, kheni kamwe nyi ghohedego PFHUMU Nungungulu wa Israyeli. Iso nyi giridego khesi:

²¹Nyi di wona vbakari nya sombo si phangidwego, gifenengelo nya gumbure gya Bhabhiloni, ni mazana mavili (200) nya masekeli nya dzisikulu nya parata ni giwindri nya ndralama nya livbandre magumi dzisikulu, nyi di si dogorela nyi si dzega; nyi si kembela mafuni vbavbatshi nya tshatsha wangu, parata nyi yi vega khu vbavbatshi.

²²Josuwa a di rumela vama nya gukari vaya setsha tshatshani gwaye, va ya mana sombo si nga bani si sihidwe, parata na yiri khu vbavbatshi.

²³Va di si dusa khu vbale va si resa ga Josuwa gumogo ni ga va na Israyeli vata si vega mbeli ga PFHUMU Nungungulu.

²⁴Khavbo avbo, Josuwa, na wonwa khu va na Israyeli vatshavbo, a di mola Akani, mwamana wa Zera gumogo ni parata ni gifenengelo, giwindri nya ndralama, sanana saye nya sikhwathana niso nya sagadzyana, dzimombe dzaye, dziburu dzaye, dzinvuta dzaye, tshatsha waye ni satshavbo si nga bani si mu lumba a si yisa kovani ga Akori.

²⁵Na va vbohide vbale, Josuwa a di ganela, khuye: “Olu uwe u khadego mumbembisi wathu, PFHUMU Nungungulu a na gu mbembise nuye muhuno.” Ni vatshavbo va na Israyeli va di mu pfara khu siwindri; hwane nya gu bani va mu pfaride khu siwindri, va di ya mu vbisa niloni.

²⁶Va wungedzela vbatshani ga Akani gigomo nya gikhongolo nya siwindri gi nga guromo kala na muhuno.[3] Khavbo avbo, PFHUMU Nungungulu a di bosa likhulo laye. Khu guralo, wulanga wule wa gu ranwa kala na muhuno gupwani Kova wa Akori.