Read gitonga 1 Thimoti 5 Bible Online

1 Thimoti 5 - gitonga bible

1 Thimoti 5

¹U nga kawuki ni gu ronogela muthu nya khongolo nya guvbindre uwe, aholu, mu kawuke nga babe wago. Madzaha ma kawuke nga vandriyago.

²Vega githawo ga vanyamayi nya vakhongolo, nga vamayi; vale nya dzimbiri, nga vandriyago, khu githawo nya gikhongolo.

³Sayisa dzinoni dzi gu mwalo wawe nya gusayiswe khuye.

⁴Aholu, va gu bani vari ni sanana mwendro vatugulu, va ngu yela gu girela githawo valongo vawe, ni gu va bweledzela wuhindzi va nga giredwa khu sikhosane sawe. Kholu, khiso si tsakisago mahoni ga Nungungulu.

⁵Oyu a gu noni, khu lisine, nari mwalo waye, a gu vega gutumba gwaye ga Nungungulu gikhati gyatshavbo, a gu lombelela ni gu dhumisa Nungungulu wutshigu ni mihani.

⁶Aholu, oyu a dzi ningedzelago gutsakisa givili, ambari na gu vbanya, fude.

⁷Va dundrugise gambe esi, gasi va landrise fanelo yawe.

⁸Oyu a si sayisigo valongo vaye, ngudzungudzu va ndrangani gwaye, bombide gukhodwa guvbindra wule nyamba khodwa.

⁹Noni yi vbwetago gu bela tsawani nya dzinoni, gu vbwetega na yiri ni livbandre na limwedo magumi myaga, na yi vbanyide gwadi ni mwama waye.

¹⁰Gu vbwetega a tidwa nga nyamayi moyo a giridego mithumo nya gululame, a hevbudzidego gwadi sanana saye, a kodzago gu hakha sisiwana, a dzi vegidego vbavbatshi thumoni nya vakhodwa, a phasedzedego sisiwana sigaradzoni gwawe, a thumidego mithumo yatshavbo nya yadi.

¹¹U nga dzumeli gu hakha dzinoni dzi ngarigo sagadzyana kholu va nga dogorela gudzegwa, va hambana ni Kristo,

¹²va rwala nandru khu gu diga gisambanyo [7] gyawe nya guhegule.

¹³Va olovela gu khala basi, va gimbila khu ndranga ni ndranga, va ganelela mapepetela niso nyambaya khumo.

¹⁴Khu kharato, nya gu vbweta gukheni, dzinoni dzi ngarigo sagadzyana dzi dzegwe, dzi velega sanana, dzi sayise dzindranga dzawe, nyamba ninga wulanga nala a ganela guvivba khu gukhodwa gwathu.

¹⁵Kholu dzimbe dzinoni dzi ndreyide dzi gu landra Sathane.

¹⁶A gu bani a romo nyamayi nya mukhodwa, a gu ni dzinoni ndrangani gwawe, a na dzi sayise, gasi libandla li si lemedwi, li kodza gu sayisa dzinoni nyambana wawe.

¹⁷Vathangeli nya libandla, vale va thumago gwadi thumo wawe, va ngu yela gu zundzwa guvbindra pimo, ngudzungudzu ava va tshumayelago ni gu hevbudza.

¹⁸ Kholu, Milowo nya Guage yari, khiyo: “U nga segi likana nya mombe na yi gu vbula dzimbewu.” Yi engedza gambe, khiyo: “Githumi gi na ni fanelo nya guhakhe.”

¹⁹ U nga dzumeli gu hakha mahungu nya guketsarwi vathangeli nya libandla nyambana dzifakazi dzimbili ambari dzitharu.

²⁰Avo va ghohago va kawuke mwandrani, gasi vale vambe va fela gu khala hwanga.

²¹Nyi ngu gu lomba, mbeli ga Nungungulu ni Kristo Jesu ni dzingilozi nya guage, u gira wuhindzi u sayise sileletelo sesi, u si lamuli mahungu khu gupima gwago, ni gihathela.

²²U nga vbiredzeli gu handzega mandza muthu thumoni nya libandla, u nga rwali nandru nya sighoho sa mumbe muthu, gimbila khu mavbanyelo nya yadi.

²³U nga seli mati basi, sela gambe vbinyu vbadugwana, khu kotani nya ndrani gwago, ni madwali yago nyamba kala.

²⁴Aholu, sighoho sa vambe vathu si ngu tidwa khu vatshavbo, si si gu lamudwi, simbe sighoho si na tidwa khu hwane nya gikhati.

²⁵Khu magirelo ya mamowo, mithumo ya yadi, eyi yi tidwago ni eyi nyamba tidwa gima kha yi na sihala.