Read gitonga 1 Thimoti 6 Bible Online

1 Thimoti 6 - gitonga bible

1 Thimoti 6

¹Vale va gu dzikhumbi va na ninge githawo ga vafumeli vawe, gasi gu si poyidwi lina la Nungungulu gumogo ni nayo waye.

²Ava vafumeli vawe va gu vakhodwa, va nga va kanyisi khu gukhavo vandriyawe, khavbo gu vbwetegago gu thuma khu lihaladzo kholu va gu thumela mukhodwa a godwago khu Nungungulu. Khiso esi u yelago gu va hevbudza ni gu va embela.

³A gu bani a romo muthu a hevbudzago silo nya guhambane, a si landri sihevbulo nya lisine sa Pfhumu yathu Jesu Kristo, a gu sihevbulo nya gululame,

⁴uyoyo muthu nya matshandza, gambe khati gilo. Muthu nya gudwale, khwa gu wusa maregera ni guphikizana, lidiwo, milembo, guvalana, gusingedzelana guvivba,

⁵ni guganedzana nya mahala, vathu nyambana mapimo, va guromo hwindzo ni lisine. Avo va gu dzega gukhodwa va gu gira wugwewo.

⁶Ina, gukhodwa gu ngu khala wugwewo wa gu gu gimbidzisa khu ndzila ni lisine.

⁷Kha hata ni gilo mafuni momu, hi na bwelela gambe nyambana gilo;

⁸Ha nga mana gilogyo nya guhodze ni gu ambala, si enede.

⁹Aholu, ava va vbwetago gughanya, va gu thegela gulingwani ni naphwini nya guvbwete silo nya singi nyambana giphaso. Khiso si girago vathu va bela guvivbani, va mbemba ni wurumba wawe.

¹⁰Kholu nala nya silo satshavbo khu dzitsapawu. Khu gu fumedwa khidzo, nya vangi va digide gukhodwa vaya bela guvivbani.

¹¹Aholu uwe u gu muthu wa Nungungulu ndreya ga silo soso. Vbweta lisine, ni gululama, ni gukhodwa, ni lihaladzo, ni gutimisela ni gurula.[8]

¹²Dwana litunga nya ladi nya gukhodwe, gasi u mane guvbanya nyamba vbela, ugo u nga ranedwa ugo. Khugo u nga ninga wufakazi vbakari nya vathu nya vangi.[9]

¹³ Nyi ngu gu lomba, mbeli ga Nungungulu a ningago guvbanya silo satshavbo, ni ga Kristo Jesu a nga ninga wufakazi nya lisine khovbeni ga Pontiyo Pilato.

¹⁴Sayisa sileletelo sesi u si vegisa gwadi nyambana libawa ni gusolega kala Pfhumu yathu Jesu Kristo a gu wuya.[10]

¹⁵Khu gikhati gyogyo, uye a na wonega khu tshivba ya wule a gu ni gidhumo ni tshivba yatshavbo, Pfhumu nya dzipfhumu, Mufumeli nya vafumeli.

¹⁶Khuye basi a sifigo. Uye khade gungangamelani gu si vbohedwigo khu muthu. Mwalo a mu wonidego, gambe mwalo a dzi kodzago gu mu wona. Ga uye, wudhumo ni tshivba kala gupindruga! Amen.

¹⁷Tivisa ava va gu sitetema nya dzithomba nya mafu yaya, va nga giri matshandza ambari gu tumba thomba nyamba tiya. Va na tumbe Nungungulu, oyu a hi ningago silo satshavbo hi si thumisa.

¹⁸Va na thume silo nya sadi, va khale sitetema khu magirelo nya yadi, va yeyedza lihaladzo ni gu ninga sisiwana.

¹⁹Khavbo va na manago thomba nya yingi yi na gu va thumelago, khu gikhati gi na gutago, gasi va mane guvbanya nya lisine.

²⁰Gigodwa gyangu Thimoti, vegisa gwadi gukhodwa u gu hakhidego nga thomba.[11] Ndreya ga maganelelo nya litigo ni gu ganedzana khu guti nya malipha.

²¹Nya vangi va pengisidwe khugo, va diga ndzila yawe nya gukhodwe. Wuhigo wa Nungungulu wu na khale ni enu. Amen!