Read gitonga 2 Thimoti 1 Bible Online

2 Thimoti 1 - gitonga bible

2 Thimoti 1

¹Eni, Pawulo, Mupostoli wa Kristo Jesu khu guhaladza ga Nungungulu, nyi rumidwego gu tivisa gitumbo nya guvbanye, a hi giredego khu Kristo Jesu,

² nyi ngu gu lovela lidangalila leli uwe Thimoti, mwanangu nya gigodwa, kheni, Nungungulu Babe ni Kristo Jesu, Pfhumu yathu, va na gu ninge gutsaka ni lihaladzo ni gurula.

³Nyi ngu bonga Nungungulu, oyu nyi mu thumelago khu mapimo nya lisine, nga edzi va nga girago vakokwe vangu. Gikhati gyatshavbo nyi ngu gu dundruga wutshigu ni mihani milombeloni gwangu.

⁴Nyi ngu guti gulila gwago, nyi ngu dogorela gu gu wona gambe, gasi nyi tala khu gutsaka.

⁵ Nyi ngu dundruga gwadi gukhodwa gwago nyamba sengedzela, gu khade nga ogu a nga bani ari nago guhegula kokwe wago Loyidhe ni mayi vago Ewunise. Nyi ngu ganela khu lisine kheni khugosaye gukhodwa u gu nago uwe.

⁶Khu kharato, nyi ngu gu laya kheni sayisa gwadi, gikhati gyatshavbo giningwa gya Nungungulu u hakhidego khu gu handzegwa mandza yangu.[1]

⁷Kholu, Nungungulu kha hi ninga liphuvbo nya hwanga, aholu, a hi ningide liphuvbo nya tshivba ni lihaladzo ni gu dzi phara.

⁸Khu kharato, u nga khali dzitshoni gu fakaza Pfhumu yathu, gambe u nga khali dzitshoni khu eni nyi gu gibotshwa khu kotani yaye. Aholu saniseka gumogo ni eni khu kotani nya Ivhangeli nu gu tiyiswa khu tshivba ya Nungungulu.

⁹Khuye a hi vbanyisidego ni gu hi rana, nasiri khu mithumo yathu, aholu khu gudzina ni wuhigo waye, a nga hi dongisela galeyo gu hi ninga khu Kristo Jesu.

¹⁰Wuhindzi wowo wu wonegide khu guta ga Muvbanyisi wathu Kristo Jesu, a nga vbedza gufa a wonegisa gutumba nya guvbanye nya gupindruge khu Mahungu Yadi nya Ivhangeli.

¹¹ Khayo nyi nga emisedwa ayo gu khala muganeli ni mupostoli ni muhevbudzi.

¹²Khu kharato, nyi ngu saniseka khu silo sesi. Ambari ulo kha nyi khali dzitshoni kholu, nyi ngu muti oyu nyi vegidego gwaye gutumba gwangu, nyi ngu khodwa kheni khuye a gu na ni tshivba nya gu nyi sayise thumoni gwangu, kala nyi gu wu vbohisa mahegiso.[2]

¹³Phara khu gutiya ni gukhodwa ni lihaladzo u li manago ga Kristo Jesu, mahungu yaya nya yadi u ma pwidego ga eni, gasi ma khale giyeyedzo gwago.

¹⁴Vegisa sihevbudzo nya sadi u ningidwego, u phasedzedwa khu Liphuvbo nya Guage li vbahidego myonyoni gwathu.

¹⁵Uwe u ngu dziti nya gukhuwe vatshavbo va tigoni ga Aziya va nyi digide ambari nuye Figelo ni Herimogeni.

¹⁶Nungungulu a na girela wuhindzi ndranga ya Onesiforo kholu matshigu nya mangi a di nyi tangadzisa, a di si khali dzitshoni khu gumodwa gwangu.

¹⁷Gikhati a vbohidego Roma a dita nyi vbweta kala a nyi mana.

¹⁸Nungungulu a na mu girele wuhindzi litshigu nya gulamudwe. Mahungu nya mithumo a nga girago Efeso uwe u ngu mati gwadi guvbindra eni.