Read gitonga 2 Thimoti 2 Bible Online

2 Thimoti 2 - gitonga bible

2 Thimoti 2

¹Uwe, mwanangu, tiya gukhodwani ni wuhigo wutago khu ga Kristo Jesu.

²Esi u nga hevbulago gwangu vbakari nya dzifakazi nya dzingi, hevbudza vathu va tumbegidego va na gu kodzago gu hevbudza navo vambe.

³Tshaniseka gumogo ni eni sigaradzo ni gwangu gwatshavbo, nga musotshwa wa Kristo Jesu.

⁴Oyu a hongolago litungatunu aya dwana mwalo mahungu ni gu khedza silo nya guvbanye gwaye, a gu vega mapimo yaye ga muphari nya litunga, gasi a mu tsakisa.

⁵Muthu a gu hongola mapalisanatunu nya gututume a gu hakha na vbedzide thumo.

⁶Mulimi a thumidego a na ni fanelo nya guhegule khuye a hodza mihandro nya thumo waye.

⁷Si vegise gwadi esi nyi gu embelago, Pfhumu yi na gu phasa guti satshavbo sesi.

⁸Dundruga Jesu Kristo a wugidego khu ga vafudego. Uye khwa nyumbani ga Dhavhidhe, nga edzi nyi hevbudzago khidzo omu nya Ivhangeli nyi tivisago.

⁹Eni nyi ngu saniseka khu kotani nya Ivhangeli kala nyi hungwa dzitshinga kha nga gighevenga. Aholu, Mahungu ya Nungungulu kha ma hungwi dzitshinga.

¹⁰Khu guralo, eni nya gu timisela satshavbo khu kotani nya sihathwa, nya gu girela gukheni a navo va mane guvbanyiswa gogu ga Kristo Jesu, gumogo ni gidhumo nya gupindruge.

¹¹ Li tumbegide lito leli li gukhilo: “Ha gu bani hi fude ni Kristo, hi na vbanya gambe naye.”

¹²Ha gu saniseka gumogo naye, hi na fuma naye. Ha gu mu danga, uye nuye a na hi danga.

¹³Ha gumba tumbega ethu, uye a na simama gu tumbega, kholu uye kha dzi kodzi gu dzi danga abune.

¹⁴Va embele, u va dundrugisa silo sesi khu lina la Nungungulu, gasi gu si manegi guganedzisana nyamba phasa gilo, gu phalalegisa vale va pwago.

¹⁵Khala nu dzi dongisede u manega mbeli gwa Nungungulu nga githumi nyambana dzitshoni, nga idzo a dzinago khidzo uye. Khu kharato, ganela mahungu nya lisine, nya gululame.

¹⁶Hambana ni mabhulo nya guvivbe ma si phasigo gilo, kholu, ma ngu engedzela vathu gumba khodwa.

¹⁷Magana ya ava va ganelago kharato ma gu dandra nga gilondra nya likhoro. Vbakari gwawe khu Himenewu ni Fileto.

¹⁸Avo va hambanide ni lisine, khavo va vbedzago tshivba nya gukhodwe vambe vathu, khu gukhavo, guwuga ga vafudego gu vbindride.

¹⁹ Aholu tiyiso wu nga emiswa khu Nungungulu wu tiyide, wari khuwo: “Pfhumu a ngu va ti avo va gu vaye.” Gu lovidwe gambe pwani: “Vatshavbo vale va dhumisago lina la Pfhumu, kha va beli guvivbani.”

²⁰Nyumbani nya gitetema kha si khali basi sombo nya ndralama ni parata, aholu, somo gambe sombo nya guvatwe niso nya libumba. Simbe sa gu thuma khu matshigu nya makhongolo nya guhakhe vapfhumba, simbe si thuma matshigu yatshavbo.

²¹Khu kharato, oyu a handzegidego ga silo sesi, a na khala nga gyombo gi agidego, gi hathwa khu mune wa igyo a gi dongisela gu thuma satshavbo nya sadi.

²²Uwe u nga hengeli ni madzaha u dogorela esi nyamba yela. Vbweta lisine, ni gukhodwa ni lihaladzo ni gurula ga vatshavbo vale va lombelelago ga Pfhumu khu myonyo yi agidego.

²³U nga dzumeli gu hakha mahungu nya wupumbu. U ngu dziti gwadi nya gukhuwe ma gu vanga guhambana.

²⁴Oyu a guromo thumoni wa Pfhumu mwalo fanelo nya gubele nuye mihambanoni. Aholu, gu vbwetega gu pwanana ni vathu vatshavbo khu githawo ni gu kodza gu hevbudza lisine ni gu timisela guvivba gwatshavbo.

²⁵Gu vbwetega u kodza gu kawuka valala vaye khu gwadi, gasi Nungungulu, a gu dzina saye, a va ninge mapimo nya gulandre lisine.

²⁶Khu kharato, va na vbuluga naphwini wa Sathane va hungidwego khuwo, gasi va gire edzi dzaye a dzinago.