Read gitonga 2 Thimoti 4 Bible Online

2 Thimoti 4 - gitonga bible

2 Thimoti 4

¹Eni nyi ngu gu sambanyisa mbeli ga Nungungulu ni ga Kristo Jesu a na gutago ata lamula va nya guvbanya ni va nya gufa khu gu dzi wonegisa ga Kristo ni mufumo waye. Nyari, kheni:

²Ganela Mahungu nya Yadi u simamisa gu gira kharato, gikhati nya gugaradze nigyo nya guvbevbuge kawuka, luleka ni gu khongotela khu gutimisela gwatshavbo ni gu hevbudza.

³Kholu, gi nata gikhati vathu va na gu bombago sihevbudzo nya guvbanyise; olu va gu ni dzindzeve nya gunyaganyele, va na dzi vbwetela vahevbudzi nya vangi, va na ganelago silo si tsakisago myonyo yawe.

⁴Va na diga gu yingisa sihevbudzo nya lisine va gu tutumela mitsheketo.

⁵Aholu, uwe tiya u timisela sigaradzo satshavbo, dzi vegise thumoni gwago nya gutivise Mahungu nya Yadi, u vbedzisa thumo wago.

⁶A gu bani ari eni, nyi lulamide gu khala mhamba kholu, gikhati gyangu nya gufe gi ngu vboha.

⁷Nyi dwanide litunga nya ladi. Nyi vbedzide gututuma ni gu sayisa gukhodwa gwangu.

⁸Olu gu tshade basi gu hakha tshatshazelo wangu owu Pfhumu a na gu nyi ningago khu litshigu lakone. Uye khuye Mulamuli nya lisine. A na nyi ninga tshatshazelo, nasiri eni basi, aholu ni vale vatshavbo va nga lindrela khu lihaladzo gu wuya gwaye.

⁹Vbiredza nugunugu olu ute eno gwangu,

¹⁰ kholu, Dhemasi a nyi digide khu gu vbweta silo nya mafu, hongode Tesalonika, Kresiseti hongode Galatiya, Tito hongode Dhalimasiya.

¹¹ Khu Luka basi a gu ni eni. Delu ni Marko, kholu a ngu nyi phasa thumoni momu.

¹² Tikiko nyi mu rumede Efeso.

¹³ Wa guta, delu ni libhadzi langu nyi nga li divala Trowade, ndrangani ga Karpo. Delu gambe ni mabhuku, ngudzungudzu aya nya gulowe vbamalowotunu.

¹⁴ Alesandre, mupfhuli nya dzisimbi a nyi hosede ngudzu; Pfhumu a na mu bweledzela mayelano ni mithumo yaye.

¹⁵Dzi wonele nuwe gwaye kholu khuye a nga wusa sigaradzo ni gu ganedza tshumayelo yathu.

¹⁶Gulamudwani gwangu nya guphele mwalo na moyo a nga nyi emela, vatshavbo va di nyi diga. Nungungulu a na va tsetselele.

¹⁷Aholu, Pfhumu yi diri ni eni yi nyi ninga tshivba nya gutivise Mahungu maphya nya Yadi ma hakhwa khu va nya mayigo. Khu kharato, nyi vbulugide kanani nya nghala

¹⁸Pfhumu a na nyi vbulugisa guvivbani gwatshavbo, a na nyi ninga guvbanya Wufumuni gwaye wa ndzadzini. Wudhumo wu na ningwe Uye kala gupindruga. Amen.

¹⁹ Losedzela Prisila ni Akila ni ndranga ya Onesiforo.

²⁰ Erasito tshade Korinto, Trofimo nyi mu tshide na gu dwala tigoni ga Mileto.

²¹Gira tshivba ute eno gi si gu pheli girame.[5] Ewubhulo, Pudenti, ni Linu, ni Klawudhiyo ni vathu vatshavbo va Nungungulu va ngu gu losedzela ngudzu.

²²Pfhumu a na khale ni uwe, wuhigo wa Nungungulu wu na khale ni enu. Amen.