Read gitonga Tito 1 Bible Online

Tito 1 - gitonga bible

Tito 1

¹Eni Pawulo, githumi gya Nungungulu, mupostoli wa Jesu Kristo, nyi ngu lova lidangalila leli. Nyi hathidwe nyi rumedwa gasi guta phasa ni gu tiyisa vathu va Nungungulu gukhodwani, ni gu va yisa lisineni li hevbudzwago khu nayo wathu,

²li gu seketedwa khu gutumba nya guvbanye nya gupindruge. Nungungulu a si liphigo, a hi tiviside ogu guvbanya khu gale ni gale.

³Khu gikhati gyakone, tiviside guvbanya gogu khu magana yaye, Mahungu yoyo ma pharisidwe eni; eni nya gu ma huwelela khu guruma gwa Nungungulu, Muvbanyisi wathu.

⁴ Nyi ngu lovela uwe Tito, gyanana gyangu nya lisine gukhodwani, gukhodwa ogu a gu gwago ni gwangu. Wuhigo ni gurula gwa Nungungulu Babe wathu ni ga Kristo Jesu, Muvbanyisi wathu gu na khale ni uwe.

⁵Nyi gu tshide gidwane gya Kereta gasi u fela gu lulamisa esi si nga tshadego gu lulamiswa, ni gu vega vathangeli nya libandla madhoropani gwatshavbo. Alakanya sileletelo sangu:

⁶Muthangeli gu vbwetega nari muthu nyambana gihoso ni vathu, a gu ni nyamayi moyo basi; sanana saye siri vakhodwa, nyambana ndruma nya guvivbe ni gumba yingisa.

⁷Kholu muthangeli nya Libandla, a rwadego thumo nya gusayise silo sa Nungungulu, gu vbwetega nari muthu nyambana gihoso, nyamba dzi gugumugisa, nyambana wukhusu, a si gu bewudzi, nyambana sighirimuka, a si gu pari nya wugwewo nya guvivbe.

⁸Aholu, gu vbwetega oyu a kodzago gu hakha vapfhumba, a gola esi nya sadi, gu vbwetega muthu nya mapimo a gu ni lisine, a gu mukhodwa, ni ndruda;

⁹gu vbwetega oyu a tiyidego, a tumbegidego omu nya sihevbudzo nya lisine, afela gu kodza gu tiyisa vakwawe khu sihevbudzo nya lisine, ni gu kawuka ava va ganedzago sihevbudzo sesi.

¹⁰Kholu vomo nya vangi, ngudzungudzu ava va tago khu nayoni nya Vajudha, va gu vawugeli, va pfhadza vakwawe khu maganelelo yawe nya wupumbu.

¹¹Gu vbwetega u va sege magana yawe, kholu va ngu dzuwungela dzindranga dzatshavbo va gu hevbudza esi si si yeligo na va gu dwanela gu mana dzitsapawu khu silo nya dzitshoni.

¹²Khidzo a nga ganelago moyo nya muprofeti wawe wa gidwane gya Kereta, khuye: “Vathu va Kereta vathu nya malipha gikhati gyatshavbo, sirengo nya gugaradze, makhondrobwa, migara.”

¹³Iso a ganedego lisine. Khu guralo, gu vbwetega u va kawuke khu tshivba gasi va fela gu tiya gukhodwani nya lisine;

¹⁴Va nga luzi gikhati khu gu yingisela mitsheketo nya guganedwe khu Vajudha, ni sihevbudzo nya tumbunugo nya guvangwe khu vathu va hambanago ni lisine.

¹⁵Satshavbo si agide ga ava va agidego. Aholu, gi mwalo gi agidego ga vale nyamba aga, nyamba khodwa, kholu maalakanyo ni mapimo yawe ma tade khu ndzilo.

¹⁶ Vari khavo va ngu muti Nungungulu, aholu mithumo yawe yi ngu va ganedza, kholu va tade khu livengo ni gumba yingisa. Kha va kodzi gu gira ni gimwegyo nya gyadi.