Read gitonga Filemoni 1 Bible Online

Filemoni 1 - gitonga bible

Filemoni 1

¹Eni Pawulo, gibotshwa gya Kristo Jesu, gumogo ni ndriyathu Thimoti, hi ngu lovela Filemoni, gigodwa ni muphasedzeli wathu,

² ni ndriyathu Apiya, ni Arikipo, githumi gikhwathu ni libandla li tshanganago ndrangani gwaye:

³Wuhigo ni gurula mu na ningwe khu Nungungulu Babe wathu ni Pfhumu Jesu Kristo.

⁴Nyi ngu bonga ga Nungungulu wangu, na nyi gu gu alakanya gikhati gyatshavbo milombeloni gwangu,

⁵Kholu, nyi pwide mahungu nya gukhodwe ni lihaladzo u gu nalo ga Pfhumu Jesu Kristo ni ga sihathwa satshavbo.

⁶Nyi ngu lomba gukheni gukhodwa u hengelago gumogo ni ethu, gu na ninge mihandro, kala uti silo satshavbo nya sadi esi Kristo a girago guvbanyani gwathu.

⁷Nyi nengede ngudzu nyi salala khu kotani nya lihaladzo lago, kholu myonyo nya sihathwa yi rude khu kotani yago, wandruye.

⁸Khu guralo, ambari nyi gu ni fanelo khu ga Kristo, nya gu gu rume esi u yelago gu gira,

⁹khu lihaladzo nyi ngu gu lomba, eni Pawulo, nyi gu wa kharati, nyi gumbidego, olu nyi khadego gambe gibotshwa gya Kristo Jesu.

¹⁰Nyi ngu gu lomba khu gyanana gyangu Onesimo, nyi gi velegedego pasoni.

¹¹Uye gale a di si phasi gilo ga uwe, olu a na ni giphaso ngudzu ga uwe ni ga eni.

¹² Nyi mu rumede nyaluphye gwago, uwe mu hakhe gambe kha nga gyanana gya ndrani gwangu.

¹³Nyi di dzinide gu khala naye gasi gu nyi thumela a tshikedza wulanga wago pasoni momu nyi guromo khu kotani nya Ivhangeli.

¹⁴Aholu, kha nya gola gu gira gilo nyamba hegula khu gu dzumedziswa khu uwe, gasi wuhindzi wago wu si khali wa gu gurumedzwa, aholu wu khale nya gudzine gwago.

¹⁵A gu dzina saye a di hambana nago gikhati gidugwanana, gasi u fela gu mu mana u khala naye gikhati gyatshavbo.

¹⁶Nasiri gambe gu mu gira kha nga khumbi; aholu mu hakhe kha nga ndriyago, nyi mu golago ngudzu eni, aholu ngudzungudzu uwe, a gu ndriyago khu wuthu ni ga Pfhumu.

¹⁷Khu guralo, wa gu nyi wona nga pari yago, mu hakhe nga khwatshi kheni.

¹⁸A gu bani na gu ghohede mwendro mangava, si vege tengoni gwangu.

¹⁹Eni Pawulo, khu gyandza gyangu nyi ngu lova gukheni nyi na livba satshavbo. Kha nyi ganeli gukheni u na ni nandru gwangu, nandru wakone khuwe wurumba wago.

²⁰Khidzo, wandruye, nyi di gu gola gukheni u nyi tangadzisa linani ga Pfhumu. Tangadzisa monyo wangu ga Kristo.

²¹Nya gu gu lovela esi khu gu tumba gu nyi yingela gwago; nyi ngu dziti gukheni u na gira guvbindra esi nyi gu lombidego.

²²Nyi dongisele gambe wulanga nya gute khala, kholu nyi ngu tumba gukheni khu tshivba nya milombelo yanu nyi na tshudwa, nyi wuya gambe gwanu.

²³ Epafrasi nyi gu naye pasoni momu, khu kotani ya Kristo Jesu, a ngu gu losedzela,

²⁴ gumogo ni Marko, Arisitariko, Dhemasi, ni Luka, vaphasedzeli vangu.

²⁵Wuhigo wa Pfhumu yathu Jesu Kristo wu na khale ni hefemulo wanu.