Read gitonga Vahebheru 11 Bible Online

Vahebheru 11 - gitonga bible

Vahebheru 11

¹Gukhodwa gitiyiso nya silo si lindredwago. Gambe giyeyedzo nya gupwani somo khu lisine silo si si wonegigo.

²Kholu khu gukhodwa, vathu va gale va mane guzundzwa khu Nungungulu.

³ Khu gukhodwa, hi ngu pima gukhethu litigo li vangidwe khu lito la Nungungulu, esi si wonegago si vangidwe khu esi si si wonegigo.

⁴ Khu gukhodwa, Abheli ningede ga Nungungulu mhamba nya yadi nya guvbindre eyi ya Kayimi. Khu gukhodwa, zundzidwe khu Nungungulu kha nga muthu nya wadi, gu kala Nungungulu a hakha ningelo nya miphaso yaye. Khu gukhodwa gwaye, Abheli, ambari a fudego, a nga guganela.

⁵ Khu gukhodwa, Enoki dzegidwe a yiswa vbafuvbi ga Nungungulu nyamba wona gufa. Kha manwa khu muthu kholu a di dzegwa khu Nungungulu. Milowo nya Guage yari khiyo uye tsakiside Nungungulu na gu si gu dugeleli esi.

⁶Khu guralo, muthu nyamba khodwa kha dzi kodzi gutsakisa Nungungulu, kholu, oyu a hidzimelago ga Nungungulu fanede gukhodwa gukhuye Nungungulu womo, ni gukhuye a ngu tshatshazela avo va mu vbwetago.

⁷ Khu gukhodwa, Nowa pwide sitiviso sa Nungungulu nya esi si nga hadza gu dugelela, a nga bani a si kodzi gu si wona. Nowa a di yingela Nungungulu a gu gira ngalava, a bela umo uye ni ngamo yaye, a gu vbanyiswa. Khu guralo, a di kona litigo, a gu hakha ga Nungungulu wuzundzo nya gukhodwe.

⁸ Khu gukhodwa, Abrahama a di yingela, gikhati a nga ranwa. A khuga a hongola ga litigo a nga tumbiswago gu ningwa kha nga thomba yaye. A di diga litigo laye nyamba guti a gu hongola hayi.

⁹ Khu gukhodwa a diya khala nga muwuyi ga litigo lile a nga tumbiswago khu Nungungulu. A di vbanya mitshatshani gumogo ni Isaki ni Jakobe, va nga hakhago gitumbiso gya gimwegyo.

¹⁰Kholu, a di gu virela lidhoropa nya gutiye li si kodzigo gu khungumudwa, eli Nungungulu a nga li pima a wuya a li vbaha.

¹¹ Khu gukhodwa, Sara nuye manide mathomo nya gukhure mimba a velega gyanana, ambari a nga bani a vbindredwe khu tanga nya guvelege. Uye a di khodwa gukhuye Nungungulu a na tadzisa gitumbiso gyaye.

¹² Gambe, khu ga muthu moyo a nga bani a gu sayedwa nga muthu a fudego, gu velegidwe sanana nya gutale ngudzu nga dzinyeledzi dza ndzadzini, nyambana tengo nga mafu nya fungu wa phwani.

¹³ Vatshavbo vovo va fude na va tade khu gukhodwa. Kha va hakha esi va nga tumbiswago, aholu va si wone khu hwindzo va si tsakela, va dzi thula vawuyi, valuveli va vbindrago khu mafuni momu.

¹⁴Kholu avo va ganelago kharato, va ngu yeyedza gukhavo va gu dzi vbwetela litigo lawe.

¹⁵Nari pwani khu lisine va di dzinide gu bwelela ga litigo va dugedego umo, na va manide mathomo nya gubwelele tigoni va ngatago khumo.

¹⁶Aholu, avo va di vbweta litigo nya ladi ngudzu, litigo la ndzadzini. Nungungulu kha khali dzitshoni gu ranwa pwani Nungungulu wawe, kholu khuye a va dongisedego lidhoropa.

¹⁷ Khu gukhodwa, Abrahama, gikhati a nga lingwa, a di vbweta gu songa gyanana gyaye Isaki kha nga mhamba. Nungungulu a di tumbiside gu mu ninga sanana nya singi, ambari ulo, a di dongide gu songa gyanana gyaye gya gimwegyo a gira khigyo phaso nya mhamba.

¹⁸ Nungungulu a di mu embede, khuye: “Khu ga Isaki u na bani uri ni sanana.”

¹⁹Abrahama a di khodwa gukhuye Nungungulu a na dzi kodza gu wusa Isaki khu ga vafudego. Hi na khethu Abrahama hakhide nyaluphye Isaki a nga wuswa khu ga vafudego.

²⁰ Khu gukhodwa, Isaki a di kategisa Jakobe ni Esawu, a va tumbisa silo si nga gutago.

²¹ Khu gukhodwa, Jakobe, marandra nya guhadza gufa, a di kategisa moyo khu moyo, sanana sa Josefe, a gu khozela Nungungulu na tshigamede vbandrongatunu gwaye.

²² Khu gukhodwa, Josefe, marandra nya guhadza gufa nuye, a di ganela khu gikhati nya guduge sanana sa na Israyeli, khu tigoni ga Egipito, a va ninga sileletelo nya edzi va na gu girago khidzo girumbi gyaye.

²³ Khu gukhodwa, Mosi, na velegidwe, a di sihwa migima miraru khu vavelegi vaye. Khu gu wona wumburi nya gyanana, kha va khala hwanga gu yeyisa nayo wa mufumeli.

²⁴ Khu gukhodwa, Mosi, na dandride a di bomba gu ranwa pwani mwamana wa nyamahegyane wa Faro.

²⁵Uye a di dzumela gusaniseka gumogo ni vathu va Nungungulu, guvbindra gu tsaka matshigwana madugwana khu silo nya gighoho.

²⁶A di wona nari tshukwana gu nyenywa khu kotani ya Kristo guvbindra gu fuma dzithomba dzatshavbo dza Egipito. Maho yaye ma di khedza tshatshazelo wu nga gutago.

²⁷ Khu gukhodwa, uye dugide khu Egipito nyambana hwanga khu likhulo la mufumeli. A di simama gutiya nga khwatshi a gu wona uye a si wonegigo.

²⁸ Khu gukhodwa, a di gira mikhuwo nya Phasika, a ruma gu todzwa novba malimba nya dzinyumba, gasi mumbembisi, a si songi sanana sawe nya matiwula sa va na Israyeli.

²⁹ Khu gukhodwa, va na Israyeli va di tshatuga yiphwa nya Gufuvile gukhwatshi va gu gimbila mafuni nya gubange. Gikhati Vagipiti va nga pima gu tshatuga navo, va di langaladzwa khu mati, vafa.

³⁰ Khu gukhodwa, va di thesa mabhiyo nya lidhoropa la Jeriko, hwane nya gu na va li dzuwulugede gipimo nya livbandre na mavili matshigu.

³¹ Khu gukhodwa, Rahabhi, nyamayi nya gibhayi, kha songwa gumogo ni vale va ngamba yingela Nungungulu, kholu uye a di hakha vasoli khu gurula.

³² Ginani nyi yelago gu ganela gambe? Gikhati gi rode, khu lisine nyi di gu vbweta gu ganela khu Gidheyoni, khu Bharaki, khu Samisoni, Jafeti, khu Dhavhidhe, khu Samuweli ni vaprofeti.

³³ Avo khu gukhodwa, va dwanide ni mifumo yatshavbo va yi pala. Va giride nya sadi, va gu hakha ga Nungungulu esi va nga tumbiswago. Va di sega magana nya dzinghala.

³⁴ Va di tshima nilo nya tshivba, va vbuluga gu songwa khu matshari. Va diri mwalo tshivba, aholu, va khade va nya tshivba. Va khade dzindrena litungani, va pala mabutho ya va nya guta.

³⁵ Vanyamayi va hakhide vafi vawe va nga wugago khu ga vafudego. Vambe va di saniswa kala gufa, va si dzumeli gu tshudwa, khu gutumba gukhavo va na wuga va bela guvbanyani nya gwadi.

³⁶ Vambe va di poyidwa, va khinyedwa. Vambe va di hungeledwa va thedwa mapasoni.

³⁷ Va di pfarwa khu siwindri, vambe va pidwa khu vbakari, vambe va songwa khu matshari. Va di legalega na va ambade malowo nya dzinvuta ni dziphongo. Va diri sisiwana, va saniswa ni gu poyidwa.

³⁸Va di pepetega giwulani ni sigomoni, va gu vbanya dziphagoni nya siwindri ni mavbalani. Litigo li di si lumbi avo.

³⁹Vatshavbo va hakhidwe khu Nungungulu khu kotani nya gukhodwe va nga bani vari nago. Aholu kha va hakha esi uye a nga va tumbisago.

⁴⁰Kholu, Nungungulu a hi dongisede gilo nya gyadi ngudzu, khegi: Avo ni ethu, hatshavbo hi khale vathu nya guvbelele.