Read gitonga Vahebheru 2 Bible Online

Vahebheru 2 - gitonga bible

Vahebheru 2

¹Khu kharato, hi na thele kota ngudzu khu lisine hi li pwidego, gasi hi si ndreyi ga ilo.

²Gutadzisegide gupwani mahungu hi tivisidwego khu dzingilozi dza Nungungulu makhongolo ngudzu; ava va ngamba ma landrela ni gumba ma yingela va hakhide tsayiso yawe.

³Hi na vbulugisa guwani ethu, ha gu nyenya guvbanyiswa gogu nya gukhongolo? Guhegula khuye mune Pfhumu a nga tivisago guvbanyiswa gogu. Khu hwane, vale va nga mu pwago, vata hi tivisa ethu gukhavo lisine.

⁴Nungungulu tadziside wufakazi wawe khu gu gira siwoniso ni siliwugiso, yeyedzide tshivba yaye, a kabanisela siningwa nya Liphuvbo nya Guage, khu magirelo nya guhambanelane, kha nga guhaladza gwaye.

⁵Nungungulu kha ninga dzingilozi dzaye tshivba nya gufumele litigo li nga gutago, eli hi ganelago khilo.

⁶Aholu, womo wulanga nya gukari Milowo nya Guage yi ganelago, khiyo: “Oh, Nungungulu, ginani muthu nya gukala u mu alakanya? Mwendro ginani gyanana nya muthu, gu kala u dzi garadza khu uye?

⁷U mu giride, u mu vega vbavbatshi, gutshala vbadugwana basi gu fanana ni dzingilozi dzago gikhati gidugwanana, u mu khusedzide u gu mu tadza khu gidhumo ni rungudzo,

⁸ u mu ningide tshivba nya gufumele silo satshavbo.” A gupwani Nungungulu a mu ningide “Tshivba nya gufumele silo satshavbo” gu yeyedza gupwani gimwalo ni gimwegyo gi si fumedwigo khu uye. Aholu ethu hi si gu woni gukhethu khu lisine muthu a ngu fumela silo satshavbo.

⁹Aholu, hi ngu wona Jesu a nga vegwa gikhati gidugwanana vbavbatshi nya dzingilozi dza Nungungulu, olu a khusedzidwego a gu ningwa gungangamela ni gidhumo, khu gufa a gu manego. Nungungulu, khu wuhindzi waye, dzinide gu vbindrugedza gufa ga Jesu a gu gira guvbanya nya vathu.

¹⁰Khu lisine, a diri fanelo ya Nungungulu, Pfhumu ni Muvangi nya silo satshavbo, gu gira Jesu a khala muthu nya guvbelele khu sitshaniso, ni gu yisa wudhumoni sanana saye nya singi, kholu Jesu khuye a si yisago guvbanyani.

¹¹Jesu a agisago vathu sighoho sawe, ni ava va agisidwego, vatshavbo Babe khuye wa moyo. Khidzo kharato, Jesu a si khaligo dzitshoni gu va rana khuye vandriyaye.

¹² Uye a ngu ganela, khuye: “Oh, Nungungulu, nyi na pwadza lina lago ga vandriyangu, nyi na embelela wudhumo wago vbakari nya tshangano.”

¹³ A ngu ganela gambe, khuye: “Ga Nungungulu nyi na vega gutumba gwangu gwatshavbo.” A engedza gambe, khuye: “Kheni oyu gumogo ni sanana Nungungulu a nyi ningidego.”

¹⁴Sanana a si thulago khu vathu nya givili ni novba. Jesu a dzi giride idzosaye ni avo afela gu pala, khu gufa gwaye, Sathane a nga bani ari ni tshivba nya gusonge.

¹⁵Kharato, tshude vale va nga vbanya nga dzikhumbi gikhati gyatshavbo nya guvbanye gwawe, khu gu thava gufa.

¹⁶Uye kha tela guta phasedzela dzingilozi dza Nungungulu, aholu, guta phasedzela situgulwana sa Abrahama.

¹⁷A di fanela gu khala idzosaye ni vandriyaye [2] siloni satshavbo, gasi a khale Muphasi nya Khongolo nya mhamba, a gu na ni wuhindzi ni gutumbega thumoni nya gu va tshanganise ni Nungungulu, gasi gu tsetseledwa sighoho nya vathu.

¹⁸Olu, uye a ngu dzi kodza gu phasedzela ava va lingwago, kholu uye nuye lingidwe a gu mana gusaniseka.