Read gitonga Vahebheru 3 Bible Online

Vahebheru 3 - gitonga bible

Vahebheru 3

¹Khu guralo, vandriyangu khu gukhodwa, enu mu ranidwego nenu khu Nungungulu, khusani maho mu khedza Jesu a rumedwego khu Nungungulu, guta khala Muphasi nya Khongolo nya mhamba nya gukhodwe hi gu sambanyago.

² Kholu uye tumbegide ga Nungungulu a mu emisidego thumoni momu, kha nga Mosi a nga tumbegago mithumoni yatshavbo ya Nyumbani ga Nungungulu.

³Kholu, nya nga olu muvbahi nya nyumba a gu na ni wuzundzo guvbindra nyumba a vbahidego, kharato nugo, Jesu a ngu fela gu ningwa wuzundzo nya wukhongolo guvbindra Mosi.

⁴Nyumba ni nyumba ya gu vbahwa khu muthu nya gukari, aholu, Nungungulu khuye Muvbahi nya silo satshavbo.

⁵Mosi tumbegide ngudzu Nyumbani ga Nungungulu, kha nga githumi, gasi gu ninga wufakazi nya silo Nungungulu a nga vbweta gu si tivisa khu gikhati gyakone.

⁶Aholu, Kristo tumbegide kha nga Gyanana gi rwadego thumo nya gusayise Nyumba ya Nungungulu. Ethu hi na khala nyumba yaye ha gu tiya ga esi hi si tumbago.

⁷Khu kharato, kha nga li ganelago Liphuvbo nya Guage omu nya Milowo, khilo: Muhuno, mwa gupwa lito la Nungungulu,

⁸mu nga bangisi mihungo kha nga litshigu vababe vanu va nga nyi wugela, va nyi linga giwulani.

⁹Ambari ulo va nga wona esi nyi nga girago giwulani, gipimo nya magumana myaga.

¹⁰Khidzo kharato nyi nga khala giviti navo, nyi ganela, kheni: “Ava vathu nya guvivbedwe khu myonyo, kha va dzini gu landrisa dzindzila dzangu.”

¹¹ Nyi di khala giviti nyi sambanya, kheni: “Ava vathu gima kha va na nga bela tigoni nya gitumbiso, wulangani nya guhefemule nyi wu dongisedego.”

¹²Vandriyangu, dzi woneleni gasi a si manegi ni moyo vbakari gwanu, nya monyo nya guvivbe ni gumba khodwa a ndreya a diga Nungungulu a vbanyago.

¹³Aholu, tiyiselanani khu gyanu, gikhati gyatshavbo, na mu nga gu vbanya ga litshigu li ranwago pwani “Muhuno” li thudwago khu Milowo nya Guage. Girani esi, gasi ni moyo wanu a si sengwi khu gighoho a banga hungo.

¹⁴Khu lisine, ethu hi ngu hengela ni Kristo, gambe hi na simama gu hengela naye, ha gu tiya kala mahegiso ni gutumba hi nga bani hiri nago guhegulani.

¹⁵ Milowo nya Guage yari, khiyo: “Muhuno, mwa gupwa lito la Nungungulu, mu nga bangisi mihungo yanu, kha nga vababe vanu va nga nyi wugela.”

¹⁶Gasi khu va mani va ngapwa lito la Nungungulu bwelo khavbo va mu wugela? Khu vatshavbo vale va nga duswago khu Mosi tigoni ga Egipito.

¹⁷Gasi khu va mani va nga swihadza Nungungulu gipimo nya magumana myaga? Khu vale va ngafago giwulani khu kotani nya sighoho sawe.

¹⁸Gasi Nungungulu a di thula va mani gikhati a nga sambanyago, gukhuye: “Ava vathu gima kha va na nga bela tigoni nya gitumbiso, nyi nga va dongisela guya hefemula umo?” A di thula vale va nga mu wugelago.

¹⁹ Khavbo avbo, hi ngu wona gukhethu, gumba khodwa gwawe khugo gu nga va tandregisa gu bela tigoni nya guhefemule va nga tumbiswago.