Read gitonga Vahebheru 5 Bible Online

Vahebheru 5 - gitonga bible

Vahebheru 5

¹Ni wevbini muphasi nya khongolo nya mhamba a hathidwego vbakari nya vathu, a gu emisedwa gu thumela Nungungulu gasi gu phasa vathu, thumo waye khu gu ningela ga Nungungulu miningelo ni dzimhamba nya guhandze sighoho.

²Uye a na ni fanelo nya gutimisele vale nya sipumbu, ni ava va ghohago, kholu uye nuye gighohi.

³ Khu guralo, gu vbwetega a ningela dzimhamba, nasiri khu sighoho nya vathu basi, aholu, khu esi saye nuye.

⁴ Mwalo a dzi hathelago abune thumo wowu nya wuphasi nya mhamba, vbavbandze nya gu ranwe khu Nungungulu, kha nga Aroni a nga ranwago.

⁵ Ambari nuye Kristo, kha dzi gira abune Muphasi nya khongolo nya mhamba. Khu Nungungulu a nga mu rana a mu ninga wuzundzo wowo, gikhati a nga khuye: “Uwe u Gyanana gyangu, muhuno nyi gu velegide.”

⁶ Wumbe wulanga nya Milowo nya Guage a ngu ganela gambe, khuye: “Uwe u muphasi nya mhamba kala gupindruga, khu nayo nya wuphasi wa Melikisedheki.”

⁷ Matshigu a nga vbanya mafuni, Jesu a di gira milombelo khu gugaradzega ni gu lila ga Nungungulu a gu ni tshivba nya gu mu vbulugise gufani. Milombelo yaye yi di hakhwa, kholu a diri muthu nya gukhathalele Nungungulu.

⁸Ambari ulo a nga bani ari Mwamana wa Nungungulu hevbude gu yingela khu sisaniso a si manego.

⁹Na tadzisegide thumoni gwaye, a di khala gibuga nya guvbanye nya gupindruge ga vale va mu yingelago.

¹⁰Nungungulu a di mu gira muphasi nya khongolo nya mhamba khu nayo nya wuphasi wa Melikisedheki.

¹¹Khu mahungu yaya, hi na ni silo nya singi nya gu mi hevbudze, aholu, si ngu garadza gu mi tshamuselani, kholu enu mu ngu garadza gu si mana.

¹²Khu gikhati gyatshavbo mu hevbudego, mu di hadza olu na muri vahevbudzi, aholu, mu nga gu vbweta gambe gu hevbudzwa dzindrima nya guphele nya Mahungu ya Nungungulu. Wulanga nya gu olu na mu gu hodza guhodza nya gutiyele, enu mu nga gu vbwetani sanu gu mama mahwe.

¹³ Uye a vbwetago mahwe, a si gu kodzi gupima iso nya sadi niso nya guvivbe kholu ngari gyanana.

¹⁴Guhodza nya vathu vakhongolo khogu nya gutiye, kholu avo va hevbude va kodza gu hambanisa esi nya sadi ni esi nya guvivbe.