Read gitonga Vahebheru 6 Bible Online

Vahebheru 6 - gitonga bible

Vahebheru 6

¹Khu guralo, hongoleni hi dandre hiya mbeli gasi guya manela sihevbulo nya guvbelele, hi gu tshiya hwane dzindrima nya guhegule nya sihevbulo nya wukristo. Ethu kha hi na nga sasamedzela gambe nyaluphye matshina nya sihevbulo sesi, a gu aya: Fanelo nya gudige mithumo nyamba phasa gilo, ni gu khodwa ga Nungungulu;

²sihevbulo si ganelago khu mahungu nya gubhapatiswe; guhandzega mandza vakristo; ni gu tivisa guwuga ga vafudego, ni gulamudwa nya guhegise.

³Hongoleni mbeli! Nungungulu a gu dzina khiso hi na gu girago.

⁴Va na dzi khodza kharini gu dzi laya nyaluphye ava va nga diga gukhodwa? Kholu avo va diri guwonegelani ga Nungungulu, va di hakhide giningwa gya ndzadzini, gambe va di hakhide Liphuvbo nya Guage.

⁵Avo va di tugude khu guvbanya, gukhavo Mahungu ya Nungungulu khyadi, va di lingide gutshamba nya Mahungu ya Nungungulu, va gu wona siliwugiso nya mufumo wu natago.

⁶Ambari ulo, va di diga gukhodwa. Khu guralo, kha gu kodzegi gu wuya va dzi laya nyaluphye, kholu va gu khokhothela gambe sivilini gwawe Mwamana wa Nungungulu, va mu poyila.

⁷Nungungulu a ngu kategisa mafu ma hakha mati nya ndzadzi, gikhati gyatshavbo yi wago, ma gu ninga mihandro nya yadi ga vale va limago.

⁸ Aholu, mafu yale ma ningago likhabi nya miba basi, kha ma phasi gilo, ma gu vadwa khu Nungungulu ma hegisa khu gu vbiswa.

⁹Vandriyangu nya sigodwa, ambari nyi ganelago khu maganelelo yaya, nyi ngu tumba gwadi khu mahungu yanu gukheni mu hakhide makategwa nya guvbanyise.

¹⁰Nungungulu khwadi, kha divaledwi khu thumo mu wu giridego enu, ni lihaladzo mu li yeyedzidego, ni giphaso mu giridego ni olu mu nga gu girago ga vandriyanu nya vakristo.

¹¹Aholu, ethu ha gu gola ngudzu gukhethu moyo ni moyo nya enu a simame gu khathala kharato kala mahegiso, mu fela gu hakha esi mu si virelago.

¹²Kha hi vbweti gukhethu mu khale migara, aholu khalani vale va khodwego, muri ni gutimisela, gasi mu fela gu hakha esi mu tumbisidwego khu Nungungulu.

¹³Nungungulu a di gira gitumbiso ga Abrahama a sambanya gu gi tadzisa. Kha nga gu nga bani guri mwalo khongolo nya guvbindre uye, a di sambanya khu lina laye, khuye:

¹⁴ “Nyi ngu tumbisa gukheni nyi na gu kategisa uwe, nyi gu ninga sanana nyambana tengo.”

¹⁵Abrahama a di timisela, a si mana kharati esi Nungungulu a nga mu tumbisago.

¹⁶Muthu a gu sambanya, a gu sambanya khu lina la moyo a gu khongolo guvbindra uye. Gusambanya ga gu vbedza guganedzisana gwatshavbo.

¹⁷Nungungulu a di vbweta gu tiyisa gukhuye gikungo gyaye gima kha gi na vbindrugedza ga vale va nga fanela gu hakha gitumbiso gyaye, khu guralo, a di tiyisa gitumbiso khu gusambanya.

¹⁸Khu kharato, silo sivili [3] si si kodzigo gu vbindrugedza: Gitumbiso ni gisambanyo. Ga esi silo, Nungungulu kha dzi kodzi gu hi senga. Kharato, ethu hi tumbago uye hi ngu dzipwa na hi gu tiyisedwa khu gutumba hi ningidwego.

¹⁹ Gutumba gogu hi nago kha nga giwindri nya gutiye ni gulemela, nya gurikise guvbanya gwathu gu bela kala ndzadzini, vbagikhalotunu nya wufumu wa Nungungulu.

²⁰Khumo a hi thangedego, a gu bela umo Jesu, afela gu phasa ethu, a gu khala muphasi nya khongolo nya mhamba, kala gupindruga khu nayo nya wuphasi wa Melikisedheki.