Read gitonga Vahebheru 8 Bible Online

Vahebheru 8 - gitonga bible

Vahebheru 8

¹ Gilo nya gikhongolo ngudzu ga esi hi ganelago khu mahungu nya muphasi hi gu naye: Uye khuye Muphasi nya Khongolo a khadego ndzadzini khu nyamudye nya gikhalo nya wufumu wa Nungungulu nya Tshivba Yatshavbo.

²Uye a gu gimbidzisa thumo waye nya wuphasi nya mhamba Nyumbani nya Guage Ngudzu yi giridwego khu Nungungulu nasiri khu mandza nya vathu.

³Kholu muphasi watshavbo emisedwe gu ningela ga Nungungulu miphaso ni dzimhamba. Khu guralo, gu vbwetega Muphasi wathu nya khongolo nya mhamba a phare nuye gilogyo nya guningele.

⁴Nari gukhwatshi a di romo mafuni, kha nga hadza gu khala muphasi nya mhamba, kholu vomo vaphasi va thumago khu Nayo.

⁵Thumo wu girwago khu vaphasi vovo, wa gu pimedzela nga mwedzi nya thumo wa Ndzadzini. Khidzo Nungungulu a nga embelago Mosi gikhati a nga vbweta guvbaha Nyumba ya Nungungulu, khuye: “Wona gwadi, u gira satshavbo nga giwonelo nyi gu yeyedzidego gigomoni.”

⁶Khu lisine, Jesu pharisidwe thumo nya wuphasi nya wukhongolo guvbindra vaphasi vatshavbo. Gidzumeledzwano a giridego nya gutshanganise Nungungulu ni vathu gikhongolo, kholu, gi seketedwe khu gitumbiso nya gikhongolo ngudzu.

⁷Kholu, nari pwani gidzumeledzwano nya guhegule gi di vbelede, ga sa vbwetega gu manega gimbe gidzumeledzwano nya wuvili.

⁸ Kholu, Nungungulu, na wonide gukhuye vathu vaye va na ni nandru, a di ganela, khuye: “Wonani, ma ngu vboha matshigu, nyi na gu girago gidzumeledzwano nya giphya ni vathu va na Israyeli, ni vathu va Judha.

⁹Egi kha gi fanani ni gidzumeledzwano nyi nga hungago ni vababe vawe, litshigu nyi nga va phara khu mandza nyi va dusa tigoni ga Egipito. Avo kha va tumbega ga gidzumeledzwano nyi nga girago navo. Khu guralo, eni nyi di va nyenya, a ngu ganela Pfhumu.

¹⁰Egi khu gidzumeledzwano nyi na girago ni vathu va na Israyeli, hwane nya matshigu yale, a ngu ganela Pfhumu, khuye: Nyi na thela milayo yangu mapimoni gwawe, nyi yi lova myonyoni gwawe. Eni nyi na khala Nungungulu wawe, avo va na khala vathu vangu.

¹¹Mwalo ni moyo a na hevbudzago muthu kwawe, mwendro ndriyaye, khuye: Zama guti Pfhumu, kholu vatshavbo va na nyiti, gukhugela ava nya vadugwana kala nya vakhongolo.

¹² Kholu eni nyi na gira wuhindzi nyi va ditshedza sighoho sawe. Gima kha nyi na nga alakanya gambe guvivba gwawe.”

¹³Nungungulu a gukhuye “Giphya” gidzumeledzwano gegi, gu yeyedza gupwani egi nya guhegule gi vbindredwe khu gikhati gyaye. Gilo gi vbindredwego khu gikhati gyaye gi gumbide, gyomo vbafuvbi ni gufa.