Read gitonga Jakobe 1 Bible Online

Jakobe 1 - gitonga bible

Jakobe 1

¹ Eni Jakobe, githumi ya Nungungulu ni ya Pfhumu Jesu Kristo, nyi ngu losa likhumi na mavili mahundzu ma phalalegidego ni litigo latshavbo.

²Vandriyangu, ni gevbini gilingo mu gi manago, tsakani, mu nengela.

³Kholu mu ngu dzitini nya gukhenu, gukhodwa gwanu gwa gu pala silingo gu ngu ninga gutimisela.

⁴Aholu gutimisela gu vbwetega gu manega ni mithumo ya yadi yi vbeledego, mu fela gu khala vathu va vbeledego nyambana gihoso.

⁵ A gu bani a romo moyo wanu a keneledwago khu guti, a na gu lombe ga Nungungulu a ningago khu wuhindzi ga vatshavbo nyamba sola, a na ningwa.

⁶Aholu a na lombe khu gukhodwa, nyamba kanakana, kholu, oyu a kanakanago a gu fanana ni mavimbi ya phwani ma legalegiswago khu phuvbo.

⁷Muthu nya guralo, a nga alakanyi gukhuye a na hakha gilogyo ga Pfhumu.

⁸Uyoyo muthu nya myonyo mivili, a ngu legalegiswa dzindzilani dzaye dzatshavbo.

⁹Aholu ndriyathu nya gisiwana a na nengele a gu ningwa guvbanya nya wutshukwana.

¹⁰Gitetema nigyo gi na nengele gya gu tshiswa vbavbatshi, kholu gi na mwalalega kha nga genge nya mwasi.

¹¹ Kholu, nga olu lidambo li dzurago khu tshivba, wu banga mwasi khu lihani, gu thega genge, wu vbela wumburi watshavbo, kharalo nugo, gi na wu na gitetema umo nya wugwewo waye.

¹²Kategide muthu a timiselago gu lingwa kholu, hwane nya gu na lingidwe, a na hakha gihugu nya guvbanye gi nga tumbiswago khu Pfhumu ga vale va mu golago.

¹³Muthu a gu lingwa a nga ganeli, khuye: “Khu Nungungulu a nyi lingago.” Nungungulu kha dzi kodzi gu lingwa khu guvivba, gambe kha lingi muthu.

¹⁴Aholu muthu ni muthu a gu lingwa khu gudogolela nya monyo waye, wu mu ndrindrago, wu mu senga.

¹⁵Gudogolela gwa gu bela monyoni nya muthu gu khura mimba gu velega gighoho, gighoho na gi giridwe gya gu vanga gufa.

¹⁶Mu nga dzi pfhadzi, vandriyangu nya sigodwa,

¹⁷Satshavbo nya sadi hi hakhidego ni giningwa nya gululame sa guta khu ndzadzini. Satshavbo sa guta khu ga Babe, Muvangi nya satshavbo si wenengedzago ndzadzini. Uye kha vbindrugedzi, gambe gi mwalo gwaye gi yeyedzago gu vbindrugedza.

¹⁸Khu gudzina gwaye, a hi velegide [1] khu tshivba nya lito nya lisine, gasi hi khala nga matiwula nya sivangwa saye satshavbo.

¹⁹Sitini gwadi esi, vandriyangu nya sigodwa; muthu ni muthu a na vbiredze gupwa, a hwela gu ganela, a hwela gu goroga.

²⁰Kholu, likhulo nya muthu kha li giri gululama gu godwago khu Nungungulu.

²¹Khu guralo, digani sihena satshavbo nya gunyenyeze, ni mavbanyelo yatshavbo nya guvivbe. Hakhani khu gurula Mahungu ya Nungungulu a yalago myonyoni gwanu, aya ma dzi kodzago gu mi vbanyisa.

²²Khalani valandrisi nya mahungu yaya, mu si khali basi vayingisi, mu dzi kanganyisa khu magana nya gukanganyise.

²³Kholu oyu a pwago mahungu a si ma thumisi, a gu khala nga muthu a hongolago vbalibonatunu aya dzi wona edzi a guromo khidzo;

²⁴kholu na dzi bonide, a gu hongola aya divaledwa khu edzi a guromo khidzo.

²⁵Aholu, muthu a khedzisago gwadi Nayo nya gululame wu hi ningago gutshulega a tiya ga uwo, a si tsakiswi basi khu gupwa, aholu, a landrisa esi Nayo wu rumago, a na kategiswa mithumoni yaye yatshavbo.

²⁶Oyu a alakanyago gukhuye mukhodwa, aholu a si kodzi gu phara lidimi laye, wukhodwa waye khandri wa gilo, a gu pfhadza monyo waye wurumba.

²⁷Wukhodwa nya lisine wu lulamidego mahoni ga Nungungulu Babe, khu ogu: Guya holela sigulungu ni dzinoni gusanisekani gwawe, ni gumba dzi nyenyezisa khu silo nya guvivbe sa mafuni momu.