Read gitonga Jakobe 3 Bible Online

Jakobe 3 - gitonga bible

Jakobe 3

¹Vandriyangu, mu nga dwaneli mwatshavbo gu khala vahevbudzi, kholu, kha nga mu dzitigo, ethu hi hevbudzago hi na mana gulamudwa nya gugaradze ngudzu guvbindra vambe.

²Kholu ethu hatshavbo hi ngu hosisa. Oyu nyamba hosisa guganelani gwaye muthu a vbeledego, a na ni tshivba nya gu dzi phare wurumba waye.

³Ethu hi ngu thela matomu kanani nya dzikavalu gasi dzi hi yingela, hi kodza guruma givili gyaye gyatshavbo.

⁴Hongoleni hi khedze gambe mataro, ambari ma gu makhongolo ngudzu, ma vetwa khu dziphuvbo nya dzikhongolo, ma gu rumwa khu lemi, a gu gilwana gidugwanana, ma gu hongola umo mugimbidzisi a gu vbwetago.

⁵Khidzo gambe kharato, lidimi gipandre gidugwanana nya givili, aholu, li ngu dzi gugumugisa khu silo nya sikhongolo. Wonani, likhabi nya likhongolo ngudzu li ngu dzi kodza gu rothwa khu tshahe nya nilo!

⁶Lidimi li khade nga nilo. Litigo nya guvivbe li gu na ni wulanga givilini gwathu, li ngu nyenyezisa wurumba wathu watshavbo. Na li khondrisidwe khu nilo wa Sathane, li ngu dzi kodza guvbisa guvbanya gwathu gwatshavbo.

⁷Kholu muthu a ngu dzi kodza gu fumela sivangwa satshavbo, sirengo nya likhabi, ni sinyoni, ni sirengo si khwirirago khu lididi mafuni, ni sa matini si ngu fuywa ni gu fumwa khu vathu.

⁸Aholu, mwalo na moyo a dzi kodzidego gu fumela lidimi laye. Li vivbide, li tade khu wuhungu nya gusonge, mwalo a dzi kodzago gu li phara.

⁹ Khu lidimi, hi ngu rungudza Nungungulu a gu Babe wathu, khu ilo gambe, hi ngu vala vathu va giridwego khu mufananiso wa Nungungulu.

¹⁰Khu kanani ga gumogo, hi ngu dusa magana nya gurungudze ni magana nya guvale. Vandriyangu, kha gu vbwetegi kharato.

¹¹Ina gi ngu dzi kodza gifefe gya gimwegyo gu dusa mati nya dosi ni mati nya guvave, gani?

¹²Vandriyangu, mu di nga wonani nguyu wu gu velega dzikhure, mwendro ndzowe wu velega maguyu, gani? Khidzo gambe kharato, gifefe nya mati nya guvave kha gi dzi kodzi gu dusa mati nya dosi.

¹³Womo muthu, vbakari gwanu, a gu ni guti ni mapimo, gani? A na dzi yeyedze khu mavbanyelo yaye nya yadi, ni mithumo ya yadi, khu gu dzi nogisa ni guti.

¹⁴Aholu, mwa gu khala lidiwo, likhulo ni wugundreli myonyoni gwanu, mu nga liphi gukhenu mu na ni guti.

¹⁵Guti gogo kha guti khu ga Nungungulu, aholu, khwa mafuni momu, mavbanyelo nya liphuvbo nya guvivbe.

¹⁶Kholu avba gu manegago lidiwo ni wugundreli, gu na manega pfilupfilu ni silo satshavbo nya guvivbe.

¹⁷Aholu guti gutago khu ga Nungungulu khu gule gu tengidego, nya gurule, nya gwadi, nya gutale khu wuhindzi. Wa gu ninga mihandro nya mithumo ya yadi. Guti gogu gu mwalo maalakanyo nya guvivbe, mwendro gu pfhadzedzela.

¹⁸Vale va vbahago gurula, va gu yala gurulani, va gu vbwera mihandro nya guvbanye nya gululame.