Read gitonga 1 Pedro 3 Bible Online

1 Pedro 3 - gitonga bible

1 Pedro 3

¹ Enu nenu vanyamayi mu guromo wugadzi, yingelani vama vanu, gasi va gu bani varomo vambe va si khodwigo, va ndrindrwe vata khodwa, nasiri khu magana, aholu khu mavbanyelo ya vagadzi vawe.

²Kholu va na wona mavbanyelo yanu nya yadi nya githawo.

³ Mu nga dwaneli gu dzi mburisela khu vbavbandze, khu gu luga mindzudzu, ni guambala dziphera ni maniya nya ndralama, ni dzingandzu nya gurengwe khu dzitsapawu nya dzingi.

⁴Aholu, wumburi wanu wu na khale khu myonyoni gwanu, kholu, khuwo wumbiri nyamba vbela, wumburi nya liphuvbo nya gurule, nya ndruda, khiso si gu na ni lisima ga Nungungulu.

⁵Khidzo kharato, vanyamayi va gale nya ndruda va nga bani va dzi mburisela khidzo, va di vega gutumba gwawe ga Nungungulu, ni gu yingisa vama vawe.

⁶ Khidzo a nga gira Sara; a di yingisa Abrahama, a mu rana khuye pfhumu yaye. Enu mu na khala sanana saye mwa gu girani esi nya sadi nyamba thava gilo.

⁷ Enu nenu vama, vbanyani ni vagadzi vanu khu gurula ni githawo. Va phareni gwadi na mu gu dziti gukhenu nyamayi gyombo nya wukheta. Kholu avo navo va na hakha guvbanya gwa gumogo mu na gu hakhago nenu. Girani kharati gasi mu si dzuwungeli milombelo yanu.

⁸Gu vbwetega mwatshavbo mu hengela mapimo ni monyo moyo, mu golana khu gyanu khu lihaladzo nya wundruye, muri vathu nya gurule ni gu dzi sodzisa.

⁹Mu nga bweledzeli guvivba khu guvivba, ambari guvala khu guvala. Aholu kategisani kholu mu ranedwe guta hakha gikategiso.

¹⁰Kholu: “Oyu a vbwetago gu vbanya gwadi, ni gu wona matshigu nya gunengele, a nga ganeli silo nya guvivbe, gambe a na hegise gu lipha.

¹¹A na ndreye ga silo nya guvivbe, a gira iso nya sadi; a na vbwete gurula, a gu landrisa.

¹² Kholu, Pfhumu, maho yaye ma gu khedza vathu nya gululame; gikhati gyatshavbo a gu yingisa milombelo yawe. Aholu, a ngu wugela avo va girago guvivba.”

¹³Enu, mwa gu vbweta gu gira esi nya sadi, khu mani a na mi girelago guvivba?

¹⁴ Aholu mu na bani mu kategide mwa gu mana sisaniso khu kotani nya gugire iso nya sadi. Mu nga thavi muthu, gambe mu nga thurugi.

¹⁵Aholu rungudzani Kristo kha nga Pfhumu myonyoni gwanu, khalani na mu dongide gasi gu ningani phindrulo ni wevbini a na gu mi wudzisago khu mahungu nya gitumbo nya gukhodwe mu gu nago.

¹⁶Aholu, girani esi khu monyo nya gurule ni githawo, kha nga vathu va tengidego mapimoni gwawe, gasi mwa gu vadwa, vale va ganelago guvivba khu mavbanyelo yanu nya yadi nya wukristo, va na khala dzitshoni.

¹⁷Kholu, gwadi gusaniseka khu gu gira silo nya sadi, (a gu bani ari ugo guhaladza ga Nungungulu), guvbindra gu gira guvivba.

¹⁸Kristo nuye fude gumogo basi khu kotani nya sighoho, na gufela enu. Muthu nya wadi afela va nya guvivba, gasi gu va yisa ga Nungungulu. Uye fude khu givili, aholu wusidwe khu Liphuvbo nya Guage.

¹⁹A di hongola gambe aya tivisa Mahungu ga maphuvbo ma nga bani ma khothedwe.[6]

²⁰ Maphuvbo ya vale va ngamba yingela Nungungulu, gikhati uye a nga virela khu gutimisela, matshigu yale Nowa a nga bani a gu gira litaro. Avo nya vadugwana, nya livbandre na vararu vathu, va nga bani varomo litaroni, khavo va nga vbuluga gufa khu talo nya mati.

²¹Mati yale a diri giyeyedzo nya gubhapatiswe, mu vbanyiswago khugo enu, muhuno. Gubhapatiswa gogu khandri gwa gu handza givili khu vbavbandze, aholu, gitumbiso gi girwago ga Nungungulu, gi duga khu monyoni wu agidego. Guvbanyiswa gogu gwa guta khu guwuga ga Jesu Kristo.

²²A litidego ndzadzini aya khala nyamudye [7] ga Nungungulu, a fumela dzingilozi dzatshavbo ni vafumeli ni dzitshivba dzatshavbo dza ndzadzini.[8]